ГъэцэкIэжьынхэр лъагъэкIотэщтых
Илъэси 10 имыкъупэм къыкIоцI — фэтэрыбэу зэхэт унэ 909-рэ ыкIи сомэ миллиардрэ миллион 330-рэ. Къатыбэу зэтет унэхэм ягъэцэкIэжьынкIэ шъолъыр программэр зылэжьэрэ илъэсхэм язэфэхьысыжьхэр къышIыгъэх Адыгеим ишъолъыр оператор.
[caption id="attachment_144871" align="aligncenter" width="800"] АР-м игъэкIотыгъэ гъэцIэкIэжьынхэмкIэ и Фонд ихъарзынэщ[/caption]
2014-рэ илъэсым къыщегъэжьагъэу программэм Iоф ешIэ, ар 2047-м нэс телъытагъ.
БлэкIыгъэ илъэсыр пштэмэ, ахэм афэдэ уни 126-рэ республикэм щагъэкIэжьыгъ. Ащ фэшъхьафэу унэ 12-мэ яхьылъэIэт (лифт) 34-у зиIофшIэгъу пIалъэ икIыгъэхэр ащызэблахъугъэх. ПстэумкIи сомэ миллион 350-рэ фэдиз апэIухьагъ.
— Унэу дгъэцэкIэжьырэмэ янахьыбэм язытет дэй дэд. Ащыщхэр жъы дэдэх, зыкIи агъэкIэжьыгъэхэп. Ахэтых ахэм ежь унэм щыпсэухэрэм яамалкIэ чIыпIэ-чIыпIэу агъэкIэжьыхэрэр, ау ащ фэдэхэр макIэх, — къыхегъэщы АР-м къатыбэ унэхэр игъэкIотыгъэу гъэцэкIэжьыгъэнхэмкIэ и Фонд ипащэ иIэнатIэ зыгъэцэкIэрэ Иуаныкъо Бислъан.
Зэрэхабзэу, IофшIэнхэм республикэм ирайонхэр зэкIэ къызэлъаубытых. БлэкIыгъэ илъэсым анахь унабэ зыщагъэцэкIэжьыгъэр Тэхъутэмыкъое районымрэ Мыекъуапэрэ. Мыхэм унэ зэтетхэр ащынахьыб. Адыгеим щылэжьэрэ шъолъыр операторым къызэрэхигъэщырэмкIэ, псэуалъэу агъэкIэжьыщтыр цIыфхэм ахъщэ къызэраугъоирэм занкIэу епхыгъ. Урысыер зэрэщытэу пштэмэ, Адыгеим мы лъэныкъомкIэ гурыт чIыпIэр еубыты.
— 2023-м ахъщэ угъоинымкIэ къэгъэлъэгъонышIухэр тиIэхэу илъэсыр зэфэтшIыжьыгъ — игъэкIотыгъэ гъэцэкIэжьыным ыпкIэ къэзытырэмэ япчъагъэ процент 97,1-м нэдгъэсыгъ. Пстэуми анахь чанэу мы лъэныкъомкIэ Iоф зышIэрэр Адыгэкъал — проценти 110,4-рэ, анахь макIэу къызщаугъоигъэр Шэуджэн районыр ары — процент 75,8-рэ. Аужырэ илъэсхэр зэбгъапшэхэмэ, ащ фэдэ «ахъщэ зэхадзэм» имэхьанэ цIыфхэм нахь къагурыIо хъугъэ. Къин зытлъэгъугъэр IофшIэныр зетэгъэжьакIэр ары, — еIо Иуаныкъо Бислъан.
ГъэцэкIэжьыныпкIэр къэзымытырэмэ шъолъыр операторым Iоф адешIэ. Непэрэ мафэм ехъулIэу ахэм алъэныкъокIэ дэо тхылъ мин 27395-рэ хьыкумым агъэхьыгъ. Джырэ уахътэм ехъулIэу сомэ миллион 253,7-у чIыфэу зэтырагъэуагъэм щыщэу 124-р къатыжьыгъ.
КъэIогъэн фае, блэкIыгъэ илъэсым игъэкIотыгъэ гъэцэкIэжьыным ыпкIэ зытыхэрэм япчъагъэ нэбгырэ 3700-кIэ нахьыбэ хъугъэ. ПсэолъэшI IофшIэнхэр игъэкIотыгъэу республикэм зэрэщыкIохэрэм къыдыхэлъытагъэу къатыбэу зэтет унэ 71-рэ кIэу къыхэхъуагъ. ПстэумкIи лицевой счет мин 58-м нахьыбэ къызэIухыгъ.
Мы илъэсымкIэ IофшIэнхэр зыщыкIощт унэхэри къэнэфэгъахэх. Къатыбэу зэтет псэолъи 151-рэ ахэм къызэлъаубытыщт ыкIи сомэ миллион 312,9-рэ ахэм апэIухьанэу агъэнэфагъ. ДжырэкIэ тхьапэхэм ягъэхьазырын ыуж итых, апэрэ гъэтхэ мэфэ фабэхэм IофшIэнхэр аублэщтых. ПстэумкIи илъэсыбэхэм ателъытэгъэ республикэ программэм къатыбэу зэтет унэ 1654-рэ агъэкIэжьынэу къыдыхэлъытагъ.
Анцокъо Ирин.