Республикэм и ЛIышъхьэу КъумпIыл Муратрэ Рос­имуществэм ичIыпIэ гъэIо­рышIапIэу Краснодар краимрэ Адыгэ Респуб­ликэмрэ ащыIэм ипащэу Дмитрий Рудойрэ АР-м и Правительствэ и Унэ IофшIэгъу зэIукIэгъу щызэ­дыряIагъ. Д. Рудоир бэмы­шIэу а IэнатIэм Iуагъэхьагъ.

[caption id="attachment_144825" align="aligncenter" width="800"] А. Гусев[/caption]

Iофтхьабзэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзауррэ ащ игуадзэу ЛIыхэсэ Махьмудрэ, АР-м и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Хъоткъо Саниет, АР-м мылъку зэфыщытыкIэхэмкIэ и Комитет итхьаматэу Ирина Бочарниковар, Росимуществэм ичIыпIэ гъэIорышIапIэу Краснодар краимрэ Адыгэ Респуб­ликэмрэ ащыIэм ипащэ игуадзэу Гъунажьэкъо Аслъан.

Адыгеим и ЛIышъхьэ чIыпIэ гъэIорышIапIэм шIуагъэ къэзытырэ зэфыщытыкIэхэу дыряIэ хъугъэхэр къыхигъэщыгъэх ыкIи федеральнэ мылъкум пэщэныгъэ дызехьэгъэным епхыгъэ къэралыгъо пшъэрылъхэм язэшIохынкIэ тапэкIи зэфыщытыкIэу азыфагу илъхэр гъэфедэгъэнхэм мэхьанэшхо зэриIэр къыIуагъ.

«Къэралыгъо мылъкум игъэзекIон тэрэзэу пэщэныгъэ дызехьэгъэным къикIырэр шъолъы­рым ибюджет ихахъохэри на­хьыбэ хъунхэр ары. ЧIыгу Iахь пэпчъ экономикэмкIэ шIуагъэ къызэритыщтым телъытагъэу гъэфедэгъэн фае. Къэралыгъо мылъкум къыхиубытэхэрэр зэкIэ хъызмэтым епхыгъэу тымыгъэ­федэхэ хъущтэп», — къыIуагъ КъумпIыл Мурат.

[caption id="attachment_144826" align="aligncenter" width="800"] А. Гусев[/caption]

Дмитрий Рудой къыIуагъ рес­публикэм ихэбзэ къулыкъухэм зэдэлэжьэныгъэу адыряIэр нахь пытэ хъуным, нахь зиушъомбгъуным анаIэ зэрэтырагъэтырэр.

«Республикэм ипащэхэм инэу сафэраз гъусэныгъэ пытэ къызэрэддыряIэм пае. Тэри Iофыгъоу къэуцухэрэр зэкIэ псынкIэу зэшIохыгъэ хъунхэм тынаIэ тетэгъэты. Анахь пшъэрылъ шъхьаIэу тиIэр — Урысые Федерацием ибюджет амал зэри­IэкIэ нахь хэдгъэхъоныр ыкIи къытфэгъэзэгъэ чIыпIэхэм хэ­хъоныгъэ ашIынымкIэ тишIуагъэ ядгъэкIыныр ары», — къыхигъэщыгъ Дмитрий Рудой.

ЗэIукIэгъум илъэхъан лъэныкъо гъэнэфагъэхэмкIэ язэдэлэжьэныгъэ зэрэгъэпсыгъэщтым иIофыгъохэм атегущыIагъэх. АР-м и ЛIышъхьэ мэхьанэшхо зиIэ лъэныкъохэм зыкIэ ащыщым — тарихъым исаугъэтхэр, культурнэ кIэным ипсэуалъэхэр къэухъумэгъэнхэм алъэныкъокIэ язэдэлэжьэныгъэ нахь зырагъэ­ушъомбгъун зэрэфаер къыхигъэ­щыгъ.

«Республикэм итарихъ унэхэр зэкIэ зыпкъ игъэуцожьыгъэнхэм епхыгъэ IофшIэныр зэкIэлъыкIокIэ гъэнэфагъэ иIэу тэгъэцакIэ. А Iофыр нахь псынкIэу ыкIи нахь шIуагъэ къытэу лъыгъэкIотэгъэным пае шъуиведомствэ джыри нахь гъусэныгъэ пытэ дытиIн фае, сыда пIомэ а тарихъ мэхьанэ зиIэ псэолъа­бэхэр федеральнэ мылъкум хэхьэх. ЦIыфхэмрэ къэралыгъом­рэ яфедэхэм такъыпкъырыкIызэ, тIэ зэкIэдзагъэу, нахь шIогъэ ин къыкIакIоу зэкIэми тызэдэлэжьэн фае», — къыIуагъ Къум­пIыл Мурат.

АР-м и ЛIышъхьэ ипресс-къулыкъу