СурэтышI ныбжьыкIэхэм якъэ­лэ зэнэкъокъу шъхьэихыгъэу «Блокадный Ленинград» зыфиIоу Ленинград шъхьафит зашIыжьыгъэр илъэс 80 зэрэ­хъурэм фэгъэхьыгъэм щатекIуа­гъэхэм культурэм и Унэу «Гигантым» медальхэмрэ кубкэхэмрэ къащаратыжьыгъэх. Iофтхьабзэр зэхэзыщагъэхэр культурэмкIэ Мыекъопэ къэлэ гъэIорышIапIэмрэ культурэм и Унэу «Гигантымрэ».

[caption id="attachment_144812" align="aligncenter" width="800"] Александра Балабась.[/caption]

Илъэси 7-м къыщегъэжьагъэу 18-м нэс зыныбжь нэбгырэ 50 зэнэкъокъум хэлэжьагъ. Гъэсэныгъэ языгъэгъотырэ организациехэм якIэлэеджакIохэр, Мые­къуапэрэ Адыгэ Республикэм ирайонхэмрэ культурэмкIэ яуч­реждениехэм яклубхэм къякIуалIэхэрэр ахэм ахэтыгъэх. КультурэмкIэ къэлэ гъэIорышIапIэм къызэрэщаIуагъэмкIэ, зэнэкъокъур зытегъэпсыхьэгъагъэр яхэгъэгу шIу алъэгъоу кIэлэцIыкIухэр пIугъэнхэр ары.

— КIэлэцIыкIухэм ятворческэ амалхэм зыкъызэIуядгъэхыным, ячIыгу гупсэ, ятарихъ шIу ядгъэ­лъэгъуным тыпылъ. СурэтышI ныбжьыкIэ сэнаущхэр къыхэтэгъэщых, IэпыIэгъу тафэхъу, Хэгъэ­гум къырыкIощтымкIэ ахэм пшъэ­дэкIыжь зэрахьырэр агуры­тэгъаIо, — къыIуагъ культурэмкIэ къэлэ гъэIорышIапIэм испециалист шъхьаIэу Ирина Вара­кута.

Анастасия Лаврентьевар, Богдана Дубровинар, Елизавета Лебедевар, Нина Коробовар, Алиса Ловцовар ыкIи Полина Фриз зэнэкъокъум щатекIуа­гъэх. СурэтышI ныбжьыкIэ 19-мэ дипломхэр къаратыгъэх. Зэнэкъокъум щатекIуагъэ­хэми, хагъэунэфыкIырэ чIыпIэхэр къыщыдэзыхыгъэхэми медальхэмрэ кубкэхэмрэ къафагъэшъошагъэх.

КIэлэцIыкIухэм ясурэтхэм якъэгъэлъэ­гъон щылэ мазэм и 31-м нэс культурэм и Унэу «Гигантым» щыкIощт.

Александра Балабась.