Хабзэр амыукъонымкIэ АР-м икоординационнэ зэIукIэ изэхэсыгъо республикэм и Правительствэ зычIэт унэм щыкIуагъ. Адыгеим и ЛIышъхьэу КъумпIыл Мурат ар зэрищагъ.

[caption id="attachment_144807" align="aligncenter" width="800"] А. Гусев[/caption]

Зэхэсыгъом хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиныр, АР-м хэдзынхэмкIэ и Гупчэ комиссие, ипрокуратурэ, хэ­гъэгу кIоцI IофхэмкIэ и Министерствэ, щынэгъончъэнымкIэ Федеральнэ къулыкъум АР-мкIэ и ГъэIорышIапIэ, Урысыем и Следственнэ комитет АР-мкIэ иследственнэ гъэIорышIапIэ, Урысыем и МЧС АР-мкIэ и ГъэIорышIэпIэ шъхьаIэ, Рос­гвардием АР-мкIэ и ГъэIорышIапIэ, уплъэкIунхэр зэхэзыщэрэ къулыкъухэм, муниципалитетхэм япащэхэр.

УФ-м и Президент ихэдзынхэр зыщыкIощт лъэхъаным цIыфхэр жъугъэу зыщызэIукIэщтхэ чIыпIэхэмрэ хэдзыпIэ­хэмрэ ящынэгъончъагъэ гъэпытэгъэнымкIэ амалэу зэрахьащтхэм Iофтхьабзэм хэлажьэхэрэр атегущыIагъэх. ХэдзынхэмкIэ комиссиехэм ахэтхэм якъэухъу­мэн епхыгъэ Iофыгъохэми шъхьафэу ахэплъагъэх. УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым пшъэрылъ зэрафишIыгъэм диштэу зэхэсыгъом зыщалъыIэсыщтхэ Iофыгъо­хэр агъэнэфагъэх.

АР-м хэдзынхэмкIэ и Гупчэ комиссие и Тхьаматэу Сэмэгу Нурбый зэхэсы­гъом къызэрэщиIуагъэмкIэ, УФ-м и Президент ихэдзынхэм апае ренэу Iоф зышIэщт хэдзэкIо комиссие 265-рэ, пIэлъэ гъэ­нэфагъэкIэ Iоф зышIэщт участкэ хэдзэкIо комиссии 3 республикэм щызэхащэщт. Адыгеим ис хэдзэкIо мин 342,6-м ехъу­мэ амакъэ атынэу фитыныгъэ яI. Мэзаем и 17-м къыщегъэжьагъэу гъэтхапэм и 7-м нэс участкэ хэдзэкIо комиссиехэм ахэтыщтхэм яхэдзынкIэ хэдзакIохэм макъэ арагъэIун фае. Зэхэсыгъом къы­зэрэщаIуагъэмкIэ, Iахьзэхэлъ обществэу «Ростелекомым» хэдзынхэр зыщыкIощт унэхэм видеокамерэхэр аригъэуцоу ригъэжьагъ. Общественнэ уплъэкIунхэмкIэ Гупчэу АР-м и Общественнэ палатэ щызэхэщагъэм ахэм къарыхьэхэрэр лъагъэкIотэщтых. Мыекъуапэ имэрэу Геннадий Митрофановым къызэрэхигъэщыгъэмкIэ, хэдзэ­кIо мини 130,5-м ехъу муниципалитетым щатхыгъ. ХэдзыпIэ участкэ 72-рэ Мые­къуапэ щызэхащагъ. Ахэм ащыщэу 45-р гъэсэныгъэмкIэ учреждениехэм ащыIэх, адрэхэр — культурэмкIэ, псауныгъэм икъэухъумэнкIэ псэуалъэхэм, къэралыгъо учреждениехэм, предприятиехэм. Участкэ 60-мэ видеокамерэхэр ачIагъэуцощтых. Амакъэ зыщатыщт чIыпIэхэм металлодетекторхэр ащагъэфедэщтых. Бюллетеньхэр загъэхьазырхэкIэ участкэ комиссиехэр чэщи мафи къагъэгъунэщтых. Къэралыгъо системэу «Хэдзынхэр» зыфиIорэм аварием илъэхъан электроэнергиер зэрэIэкIагъэхьащт схемэри агъэнэфагъ.

АР-м хэгъэгу кIоцI IофхэмкIэ иминистрэу Олег Безсмельницыным зэрэхигъэунэфыкIыгъэмкIэ, хэдзынхэмкIэ комиссиехэм IэпыIэгъу афэхъущт, хэукъо­ныгъэхэр зытхыщт купхэр къулыкъум щызэхащагъэх. Мэзаем и 26-м къыщегъэжьагъэу гъэтхапэм и 8-м нэс полицием иIофышIэхэр хэдзэкIо комиссиехэр зычIэтыщт унэхэм яуплъэкIун хэлэжьэщтых. Терактхэр, нэмыкI бзэджэшIагъэ­хэр зэрамыхьанхэмкIэ IофшIэнхэр агъэ­лъэшыгъэх. Полицием, Росгвардием яIофышIэ мини 3-м ехъу, народнэ дружинэхэм, унэе ухъумэкIо организациехэм ахэтхэр общественнэ рэхьатныгъэм икъэухъумэн хэлэжьэщтых.

[caption id="attachment_144808" align="aligncenter" width="800"] А. Гусев[/caption]

Росгвардием АР-мкIэ и ГъэIорышIапIэ ипащэу Олег Якушевым хэбзэ къулыкъухэм, унэе ухъумэкIо предприятиехэм, хэбзэухъумэкIо къулыкъухэм зэдэлэжьэныгъэу адыряIэм къытегущыIагъ. Граждан Iашэхэр зиIэхэу хэдзынхэр зыщыкIощт чIыпIэхэм апэблагъэу псэухэрэм ахэр зэраIыгъырэ шIыкIэр ГъэIорышIапIэм ыуплъэкIугъ. НепэкIэ хэукъоныгъи 146-рэ къыхагъэщыгъ, Iэши 102-рэ къа­Iахыгъ, протоколхэр зэхагъэуцуагъэх. Хэдзыныр зыщыкIощт мафэм патрульхэм хэдзыпIэ чIыпIэхэм апэблагъэу Iоф ашIэщт.

ГъэIорышIэпIэ шъхьаIэм ипащэу Станислав Илющенкэм АР-м и МЧС хэ­дзынхэм зэрафэхьазырым къытегущы­Iагъ. Ащ зэрэхигъэунэфыкIыгъэмкIэ, ошIэ-дэмышIэ Iофхэр къызыхъухэкIэ цIыфхэм ягъэкощынкIэ ГъэIорышIапIэр хэдзэкIо комиссиехэм IэпыIэгъу афэ­хъущт. Хэдзынхэр зыщыкIощт мафэхэм МЧС-м икъулыкъухэм гъэлъэшыгъэ шIыкIэм тетэу Iоф ашIэщт.

Хэдзыным зызщыфагъэхьазырырэ лъэ­хъаным, ар зыщыкIощт мафэхэм цIыфхэм ящынэгъончъагъэ къэзыухъумэн фэе къулыкъухэм язэдэлэжьэныгъэ нахь зэрагъэлъэшын фаер Адыгеим и ЛIышъхьэ шъхьафэу къыхигъэщыгъ.

«ЩынэгъончъэнымкIэ амалхэр икъоу зехьэгъэнхэ фае. Оперативнэ Iофхэм язытет къызэIыхьан зэрилъэкIыщтыр къыдалъытэзэ, къулыкъоу зэхащагъэхэр зэрэзэдэлэжьэщтхэр икъоу уплъэкIугъэн фае. ПэшIорыгъэшъ амалхэр зэкIэ тэ мызэу, мытIоу дгъэфедагъэх, пащэ пэпчъ пшъэдэкIыжьэу ыхьырэр зынэсырэр къыгурыIон фае. Мыщ дэжьым теурыкIуагъэ къызыхагъафэ хъущтэп. ТицIыфхэм ящынэгъончъагъэ, ящыIэныгъэ, япсауныгъэ къарыкIощтыр ащ елъытыгъэщт», — къыIуагъ КъумпIыл Мурат.

Зэхэсыгъом икIэух АР-м и ЛIышъхьэ пшъэрылъ гъэнэфагъэхэр къулыкъухэм афишIыгъэх. Анахь къызыщыуцугъэхэм ащыщ хэдзынхэр зэрэкIохэрэм ыкIи ахэм якIэуххэм япхыгъэ къэбар нэпцIхэр зэрахатIупщыхьэхэрэм къэбарлъыгъэIэс амалхэм игъом цIыфхэм анаIэ атырарагъэдзэн зэрэфаер. Экстремист, радикальнэ еплъыкIэхэр ныбжьыкIэхэм, кIэ­лэеджакIохэм ямыIэнхэм, зэщыгъэкъон Iофхэм ахэр ахамыщэнхэм анаIэ нахь лъэшэу зэрэтетын фаер зэхэсыгъом къыщаIуагъ. Джащ фэдэу хэдзын Iоф­тхьабзэхэм мэхьанэу яIэр агурыгъэIогъэнымкIэ общественнэ организациехэм, движениехэм япащэхэм зэIукIэгъухэр зэрадыряIэн фаер хагъэунэфыкIыгъ.

АР-м и ЛIышъхьэ ипресс-къулыкъу