АР-м и Лъэпкъ тхылъеджапIэ краеведениемрэ литературэмрэкIэ иотдел тхылъ къэгъэлъэгъон зэфэшъхьафхэр щызэпэIутых. Нэ­плъэгъур анахь зыфэзыщэрэр «Адыгеим иолимпийскэ хъишъ» зыфиIорэр ары.

[caption id="attachment_144785" align="aligncenter" width="800"] Кощ­хьэблэ район администрациер[/caption]

Тиадыгэ шъолъыр икIыгъэ я ХХ-рэ лIэшIэгъум ия II-рэ ныкъо къыщегъэжьагъэу спорт лъэпкъ­хэмкIэ тикIалэхэм, ти­пшъашъэхэм гъэхъагъэхэр зэрашIыгъэхэм уегъэразэ. Ахэр анахь лъэгэпIэ инхэм зэранэсыгъэхэр гушIуагъо.

Атлетикэ онтэгъумкIэ анахь дэгъухэм ащыщ Олимпийскэ чемпионэу, СССР-м спортымкIэ изаслуженнэ мастерэу Чыржьын Мухьарбый Нурбый ыкъор. Щылэ мазэм и 1-м ащ ыныбжь 75-рэ хъугъэ, тыгу къыддеIэу спортсмен цIэрыIом псауныгъэ пытэкIэ, мамырныгъэкIэ, гухахъокIэ тыфэлъаIо.

МэфэкI къэгъэлъэгъоным Мухьарбый ищыIэныгъэ ыкIи игъэхъагъэхэр къизыIотыкIырэ гъэзет ыкIи журнал тхыгъэхэр, тхылъхэр, илъэс зэфэшъхьафхэм тырахыгъэ сурэтхэр, гу­къэкIыжь фабэхэр, шIуфаIохэр хэлъых.

Чыржьын Мухьарбый Адыгэ автоном хэкумкIэ къуаджэу Кощ­хьаблэ щылэ мазэм и 1-м, 1949-рэ илъэсым къыщыхъугъ. Атлетикэ онтэгъумкIэ зигъэсэныр икъуаджэ 1963-рэ илъэсым щыригъэжьэгъагъ. Апэрэ тренерэу иIагъэр СССР-м спортымкIэ имастерэу Дзэгъэщтэ Хьаджбый. 1967 — 1968-рэ илъэсхэм къалэу Краснодар дэт спорт еджапIэу «Спартак» зыфиIорэм СССР-м изаслуженнэ тренерэу Ю. П. Саркисян ипащэу зыщиушэтыгъ. 1969-рэ илъэсым СКА-м, нэужым 1971-рэ илъэсым ЦСКА-м ахэтыгъ.

[caption id="attachment_144786" align="aligncenter" width="800"] ТхылъеджапIэр[/caption]

1971-м — СССР-м ичемпион хъугъэ. 1971 — Дунэе чемпионатым джэрз медаль Лима къыщихьыгъ. 1972 — ­Европэм ичемпи­онат ящэнэрэ щыхъугъ (Кон­станца). 1972 — СССР-м ичемпионат ятIо­нэрэ чIыпIэр къы­щы­ди­хыгъ (Таллин). 1972 — Олимпийскэ чемпион (Мюнхен). 1973 — СССР-м ичем­пион (Донецк). 1973 — Европэм ичем­пион (Мадрид). 1973 — Дунаим ичемпион (Гавана). 1974 — СССР-м ичемпион (Тбилиси). 1974 — СССР-м ичем­пион (Верона). 1975 — СССР-м ичем­пион (Вильнюс).

«Кощхьаблэ къыдэкIыгъэ Батыр» зыфиIорэ хэутыгъэ журнал тхыгъэм адыгэгу зиIэ Чыр­жьын Мухьарбый советскэ хьы­лъэIэтхэмкIэ апэрэу я ХХ-рэ Олим­пиадэм дышъэ медаль къы­зэрэщихьыгъэр, къенэкъокъущтыгъэхэр лъэш дэдагъэхэми, зэратекIуагъэр, гущыIэм пае, Кучевыр — Европэм ичемпионыгъ, Башановскэр — тIогъогогъурэ олимпийскэ чемпио­ныгъ, къыщеIо.

Мы спорт лъэпкъым IэпэIэ­сэныгъэ ин ищыкIагъ. А зэкIэ къыгурыIоу Мухьарбый псыхьагъэ зыщыхъугъэр дзэ къулыкъур ары. Адыгэ кIалэу Кощхьаблэ щапIугъэм, щэч хэлъэп, зыщыщ адыгэ лъэпкъым, лIакъом, икъуа­джэ, анахьэу хэгъэгум ацIэ ыIэтыгъ.

Непэ Олимпийскэ че­мпионэу Чыржьын Мухьарбый икъуаджэу Кощхьаблэ щэпсэу, лIэужыкIэм щысэ фэхъу, щыIэныгъэм иIахь хелъхьэ.

Мамырыкъо Нуриет.