Урысые политическэ партиеу «Единэ Россиер» кIэщакIо зэрэфэхъугъэм тетэу обществэм изэкъогъэуцонкIэ Штаб Адыгеим къыщызэIуахыгъ. ГъэрекIо къыщегъэжьагъэу тихэгъэгу ащ фэдэ штабхэр щыIэх. Мыекъуапэ иурамэу Пролетарскэм тет унэу N 449-м Штабыр чIэт.

[caption id="attachment_144744" align="aligncenter" width="800"] А. Гусев[/caption]

Адыгеим и ЛIышъхьэу КъумпIыл Мурат Штабым щыIагъ, ар къызэпиплъы­хьагъ, Iоф щызышIэхэрэм адэгущыIагъ.

Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, УФ-м и Къэралыгъо Думэ идепутатэу Хьасанэкъо Мурат, Урысые политическэ партиеу «Единэ Россием» и Тхьаматэу Д. А. Медведевым ишъолъыр общественнэ приемнэу Адыгэ Республикэм щыIэм ипащэу Наталья Широковар, къэлэ мэрием, фондэу «Хэгъэгум иухъумакIо­хэр» зыфиIорэм, АР-м и Общественнэ палатэ, АР-м ибзылъфыгъэхэм я Союз, ныбжьыкIэ общественнэ движением япащэхэр, волонтерхэр.

Штабым икъызэIухын хэлэжьагъэх УФ-м и Президентэу Владимир Путиным ицыхьэшIэгъу цIыфхэр, ахэм ащыщэу Урысыем IофшIэнымкIэ и ЛIыхъужъэу, УФ-м и Общественнэ палатэ хэтэу, тхакIоу МэщбэшIэ Исхьакъ, АР-м ибзылъфыгъэхэм я Союз итхьаматэу Вэрэкъо Хьалимэт, Мыекъопэ гурыт еджапIэу N 7-м хьисапымкIэ икIэлэегъаджэу, зэнэкъокъоу «Урысыем илъэсымкIэ икIэлэегъэджэ анахь дэгъу» зыфиIорэм ифиналистэу Сергей Левченкэр.

Наталья Широковам къызэриIуагъэмкIэ, Адыгеим и ЛIышъхьэ пшъэрылъ къызэрафишIыгъэм тетэу охътэ кIэкIым къыкIоцI Штабым Iоф ышIэу ригъэжьагъ. ЦIыфхэм ятхылъхэм яугъоинкIэ ыкIи язэхэфынкIэ ищыкIэгъэ пстэури мыщ къыщыдалъытагъ. ЗэхэщакIохэм зэIукIэ­хэр, къэгъэлъэгъонхэр, семинархэр, лъэтегъэуцохэр мысатыушI, общественнэ организациехэм, хэушъхьафыкIыгъэ дзэ операцием хэлажьэхэрэм яунагъо­хэм ыкIи нэмыкIхэм адыряIэн ямурад.

Патриотическэ пчыхьэзэхахьэхэр Штабым щыкIуагъэх, кIэлэцIыкIухэмрэ ныбжьыкIэхэмрэ мастер-классхэр афызэхащагъэх, реабилитационнэ медицинэмкIэ вебинар щыIагъ. Урысыем и ПрезидентынымкIэ кандидатэу Владимир Путиным зэрэдырагъаштэрэр къэзыушыхьатырэ IэпэкIадзэхэр, предложениехэр мыщ щаугъоих.

Адыгеим и ЛIышъхьэ Штабым испикер-зал, цIыфхэмрэ общественнэ организацие зэфэшъхьафхэмрэ Iоф защадашIэщт унэхэр къызэпиплъыхьагъэх. Республикэм ипащэ зэрэхигъэунэфыкIыгъэмкIэ, ар къалэм игупчэ ит, транспорткIи, лъэсэуи уекIолIэнкIэ Iэрыфэгъу. ЦIыфхэр зыгъэгумэкIырэ Iофыгъохэм язэшIохын чанэу хэлэжьэным фэхьазырхэм мыщ Iоф щашIэ.

«Обществэм изэкъогъэуцонкIэ Штабыр проект гъэшIэгъонхэр зыщызэхагъэуцощт гупчэ хъунэу сэгугъэ. Ныбжь зэфэшъхьаф зиIэхэр, ныбжьыкIэхэр, кIэлэ­еджакIохэр социальнэ Iофтхьабзэхэм ахэлэжьэнхэмкIэ ищыкIэгъэ пстэури мыщ къыщыдэлъытагъ. Анахьэу анаIэ зытырагъэтын фаер республикэм исхэр зыгъэгумэкIырэ Iофыгъохэм язэшIохын ары. Штабым иIофшIэнкIэ лъэныкъо шъхьаIэхэм ар зэу ащыщ хъун фае», — къыIуагъ КъумпIыл Мурат.

ЗэIукIэм зэфэхьысыжь къыфишIызэ республикэм ипащэ къызэрэхигъэщыгъэм­кIэ, цIыфхэм игъоу алъэгъухэрэм язэшIохын екIолIэкIэ тэрэз къафэгъотыгъэным, ахэм къакIэкIон ылъэкIыщтыр пэшIорыгъэшъэу къидзэгъэ­ным мэхьанэшхо яI. Республикэм ипащэ зэрилъытэрэмкIэ, обществэр зэкъогъэуцогъэнымкIэ Штабым иIофышIэхэр социальнэ Iофтхьабзэхэм чанэу ахэлажьэхэзэ, республикэм исхэр зыгъэгумэкIырэ Iофыгъохэр зэшIохыгъэ хъущтых.

АР-м и ЛIышъхьэ ипресс-къулыкъу