Адыгеим и ЛIышъхьэу КъумпIыл Мурат АР-м хэгъэгу кIоцI IофхэмкIэ и Министерствэ иIофышIэхэм язэхэсыгъоу щыIагъэм хэлэжьагъ. Ар зы­фэ­гъэхьыгъагъэр 2023-рэ илъэсымкIэ оперативнэ-къулыкъу Iоф­шIэным икIэуххэмрэ 2024-рэ илъэсым иапэрэ кIэлъэныкъо Iофэу ашIэщтымрэ ары. Зэхэсыгъор зэрищагъ АР-м хэгъэгу кIоцI IофхэмкIэ иминистрэу Олег Безсмельницыным.

Зэхэсыгъом хэлэжьагъэх федеральнэ инспектор шъхьаIэу Сергей Дрокиныр, АР-м и Къэралыгъо Совет — Хасэм и Тхьаматэу Владимир Нарожнэр, респуб­ликэм ихэбзэухъумэкIо къулыкъухэм япащэхэр.

АР-м хэгъэгу кIоцI IофхэмкIэ иминистрэ зэхэсыгъор къызэIуихызэ къызэрэхигъэщыгъэмкIэ, республикэм хэбзэгъэ­уцугъэр укъуагъэ щымыхъунымкIэ пшъэрылъэу зыфашIыжьыгъагъэхэр икъоу гъэцэкIагъэ хъугъэх. Олег Безсмельницыным АР-м и ЛIышъхьэ, рес­публикэм игъэцэкIэкIо ыкIи ихэбзэгъэуцу къулыкъухэм шIуагъэ къэзытырэ IэпыIэгъоу къаратыгъэм пае зэрафэразэр къыIуагъ. Ащ ишIуагъэкIэ Адыгеим непэ зыпкъитыныгъэ илъ. Ащ нэмыкIэу къы­хэгъэщыгъэн фае общественнэ чIыпIэхэм ащызэрахьэгъэ бзэджэшIагъэхэмкIэ республикэр илъэсэу икIыгъэм анахь бзэджэшIэгъэ макIэ зыщызэрахьагъэхэм зэрахалъытагъэр. Джащ фэдэу бзэджэшIагъэхэм якъыхэгъэщынкIи ищыкIэгъэ Iофтхьабзэхэр дэгъоу зэрэзэшIуахыгъэ­хэр къыIуагъ.

Республикэм а лъэныкъомкIэ Iофэу щызэшIуахыгъэхэм игъэкIотыгъэу къатегущыIагъ АР-м и МВД иштаб ипащэу, хэгъэгу кIоцI къулыкъумкIэ полковникэу Максим Черносмагэ. Ащ къызэриIуагъэм­кIэ, илъэсым къыкIоцI бзэджэшIэгъэ 3797-рэ республикэм щагъэунэфыгъ, ыпэрэ илъэсым елъытыгъэмэ, процент 13,5-кIэ ар нахь макI. БзэджэшIагъэхэм япчъагъэ къызэрэщыкIэрэр илъэситIу фэдиз хъугъэу республикэм щагъэунэфы. Ащ дакIоу лъэныкъо заулэхэмкIэ Iоф­тхьабзэу зэшIуахыхэрэм джыри нахь зарагъэушъомбгъун зэрэфаер зэхэсы­гъом къыщаIуагъ. Ахэм зыкIэ ащыщ къэбар ыкIи телекоммуникационнэ технологиехэр къызфагъэфедэхэзэ бзэджэшIагъэу зэрахьэхэрэм, гъогухэм тхьамыкIагъоу къатехъухьэхэрэм къакIегъэчыгъэныр, хэбзэнчъэу республикэм куп гъэнэфагъэ­хэр къызэрихьэхэрэм пэшIуекIогъэныр.

ИгъэкIотыгъэу а лъэныкъомкIэ Iофэу агъэцакIэрэм икIэуххэм къатегущыIа­гъэх хэгъэгу кIоцI IофхэмкIэ Министерствэм и ГъэIорышIапIэ ипащэу Юрий Гапоновыр ыкIи мы министерствэм гъогузекIоныр щынэгъончъэнымкIэ и ГъэIорышIапIэ ипащэу Андрей Огурцовыр.

Зэхэсыгъом илъэхъан къызэраIуагъэм­кIэ, мы лъэхъэнэ благъэхэм пстэуми анахьэу анаIэ зытырагъэтын фаер общественнэ щынэгъончъагъэр ары. Урысые Федерацием и Президент ихэдзынхэм языфэгъэхьазырын зыщыкIорэ лъэ­хъаным ащ мэхьанэшхо иI. АР-м и ЛIышъхьэ къызэгущыIэм а лъэныкъом анахьэу анаIэ тыраригъэдзагъ.

«Хэгъэгум ишъолъыр анахь щынэгъон­чъи 5-мэ Адыгеир ащыщ. Хэгъэгу кIоцI IофхэмкIэ къулыкъухэм яIофышIэхэм язэдегъэштэныгъэ, ячаныгъэ бэкIэ елъы­тыгъ ащ фэдэу зэрэщытыр. ТапэкIи нахь дэгъоу Iофхэр а лъэныкъомкIэ зэрэзэшIотхыщтхэм тынаIэ тедгъэтын фае. Джыри зэ къэсэIожьы республикэм общественнэ ыкIи социальнэ зыпкъитыныгъэ илъыным тишъыпкъэу зэкIэми тынаIэ тедгъэтын зэрэфаер, цIыфхэм зэхашIэн фае ахэр къызэраухъумэхэрэр, хабзэм, хэбзэухъумэкIо къулыкъухэм цыхьэу ахэм афашIырэм а пстэуми адакIоу нахь зыкъыIэтыщт. Республикэм псынкIэу хэхъоныгъэ ышIынымкIэ, анахь мэхьанэ зиIэ лъэныкъохэмкIэ проектышхохэр пхырытщынхэмкIэ, цIыфхэм ящыIакIэ зыкъыIэтынымкIэ а пстэуми яшIуагъэ къэкIощт», — къыIуагъ КъумпIыл Мурат.

Ащ нэмыкIэу АР-м и ЛIышъхьэ къыгъэнэфагъэх гъэцэкIэкIо хабзэм икъулыкъухэм яIофшIэнкIэ анахь лъэшэу анаIэ зытырагъэтын фэе пшъэрылъхэр. Республикэм и ЛIышъхьэ къызэриIуагъэм­кIэ, цIыфхэм ялъэIу тхылъхэм лъэшэу анаIэ атырагъэтын, ахэм зигугъу къашIы­хэрэр икъоу зэхэфыгъэн, гъогузекIонымкIэ шапхъэу щыIэхэр зыукъохэрэм нахь пхъэшагъэ хэлъэу адэзекIогъэн фае. Илъэс къэс Адыгеим джырэ уахътэм диштэрэ, шапхъэхэр зыукъохэрэм гъунэ алъызыфын зылъэкIырэ камерэхэр щагъэуцух, мы лъэхъаным 160-рэ респуб­ликэм щагъэфедэ. Мы илъэсым ахэм джыри 16 ахагъэхъон мурад яI. Хьылъэ­хэу гъогухэм ащызэращэхэрэм ялъытыгъэу шапхъэхэр укъуагъэ мыхъунхэм тегъэпсыхьэгъэ автоматическэ пости 4 республикэм щагъэфедэ. Мы илъэсым джыри кIэу 2 агъэпсыщт.

Телефон гъэпцIакIохэм апэшIуекIорэ бэнэныгъэм тегъэпсыхьагъэу АР-м и ЛIышъхьэ игъо къафилъэгъугъ зэхэфын IофшIэныр агъэлъэшынэу, связымрэ банкхэмрэ яоператорхэм зэдэлэжьэныгъэ дэгъу адыряIэнэу АР-м и ЛIышъхьэ къыхигъэщыгъ республикэм иобщест­веннэ, дин ыкIи волонтер организациехэм зэдэлэжьэныгъэ адыряIэным мэхьанэшхо зэриIэр. БзэджэшIагъэхэм апэшIуекIорэ Iофтхьабзэхэм шIуагъэу къатырэм нахь зыкъегъэIэтыгъэным ар фэлэжьэщт.

«Урысыем и Президентэу Владимир Путиным къызэриIуагъэмкIэ, цIыф лъэпкъ зэфэшъхьафыбэмэ къахэкIыгъэ­хэу тихэгъэгу щыпсэухэрэм язэкъотныгъ ары Урысыем кIочIэ шъхьаIэу иIэр, сыд фэдэрэ къиныгъохэр щыгъэзыегъэнхэмкIи ащ ишIуагъэ къэкIо. Арышъ, обществэр зэтечыгъэ хъуным, цIыфхэр зэщыхъогъэн­хэм фэблэрэ пстэуми псынкIэу гъогур афызэпыбзыкIыгъэн фае», — къыIуагъ республикэм и ЛIышъхьэ.

Республикэм зыпкъитыныгъэ илъыным пае тапэкIи а къулыкъухэм гъусэныгъэ адыриIэным зэрэфэхьазырыр КъумпIыл Мурат къыхигъэщыгъ. Къулыкъум Iофэу ышIэрэм нахь шIогъэшхо къыкIэкIоным пае республикэм амалэу щыIэр зэкIэ щагъэфедэщт. Урысыем и МВД Джэджэ районымкIэ иотдел зычIэтыщт административнэ унакIэу агъэпсыгъэр а лъэныкъомкIэ щысэу хъун ылъэкIыщт.

ИкIэухым республикэм и ЛIышъхьэ АР-м хэгъэгу кIоцI IофхэмкIэ и Министерствэ иIофышIэхэм илъэсэу икIыгъэм Iофэу агъэцэкIагъэм пае зэрафэразэр къыIуагъ. ХэушъхьафыкIыгъэ дзэ операцием къэралыгъо пшъэрылъхэр щызыгъэцакIэхэу а чIыпIэхэм ящынэгъончъагъэ къэухъумэгъэнымкIэ зишIуагъэ къакIохэрэм рэзэныгъэ гущыIэхэр ащ афиIуагъ.

Полицием иIофышIэхэу зипшъэрылъхэр анахь дэгъоу зыгъэцакIэхэрэм икIэухым шIухьафтынхэр аратыжьыгъэх. Хэбзэгъэуцугъэм игъэпытэнкIэ гъэхъагъэу яIэхэм апае АР-м и ЛIышъхьэ ирэзэныгъэ тхылъ аратыжьыгъ полицием иполковникэу Лариса Шубинам, хэгъэгу кIоцI IофхэмкIэ къулыкъум иподполковникэу Елена Аксанычевам, юстициемкIэ майорэу Кубэщыч Айдэмыр, полицием ипрапорщик шъхьаIэу Евгений Плотниковым, хэгъэгу кIоцI къулыкъумкIэ старшэ лейтенантэу Наталья Сафошкинам, полицием имайорэу Уджыхъу Бислъан, полицием имайорэу  Шэуджэн Руслъан. IофышIэ заулэмэ АР-м и Къэ­ралыгъо Совет — Хасэм ирэзэныгъэ тхылъхэр, Урысыем и МВД икъулыкъу тынхэр афагъэшъошагъэх.

АР-м и ЛIышъхьэ ипресс-къулыкъу