Я 32-рэ зэхэсыгъу
Урысые Федерацием и Президент ихэдзынхэм языфэгъэхьазырын фэгъэхьыгъэ зэхэсыгъо тыгъуасэ АР-м хэдзынхэмкIэ и Гупчэ комиссие щыкIуагъ. Iофтхьабзэр зэрищагъ ащ и Тхьаматэу Сэмэгу Нурбый.
Хэдзынхэм ахэлажьэхэрэм яправовой культурэ хэзыгъэхъощт Iофтхьабзэу зэхащэщтхэм, хэдзын комиссием хэтхэм яегъэджэн, нэмыкIхэми атегущыIагъэх.
АР-м хэдзынхэмкIэ и Гупчэ комиссие ипащэ игуадзэу Елена Майор къызэриIуагъэмкIэ, хэдзын комиссием хэтхэм IэпыIэгъу афэхъущт тхылъ цIыкIухэр икIыгъэ илъэсым къыдагъэкIыгъэх, ащ пэIухьанэу щытыгъэмкIэ джы хэдзэкIо ныбжьыкIэхэм апае Iофтхьэбзэ зэфэшъхьафхэр зэхащэщтых. ГъэрекIо республикэм икъалэхэм ыкIи ирайонхэм ныбжьыкIэ комиссиехэр ащызэхащагъэх. Ащ хэтхэр нэIуасэ зэфэхъунхэм, яшIэныгъэхэм ахагъэхъоным фэшI Iофтхьабзэхэр зэхащэщтых. Джащ фэдэу студентхэм «Школа выборов» зыфиIорэр, лекциехэр, семинархэр, тренингхэр, Iэнэ хъураехэр афызэхащэщтых. Хэдзын фитыныгъэм епхыгъэ олимпиади рагъэкIокIыщт.
Шъугу къэдгъэкIыжьын мыгъэ апэрэу «ИнформУИК» зыфиIорэ проектыр Адыгеим зэрэщагъэфедэщтыр. Мэзаем и 17-м ар аублэщт. Хэдзын комиссием хэтхэм унагъохэр къакIухьащтхэшъ, ахэм хэушъхьэфыкIыгъэ ныбалъэхэр, паIохэр ащыгъыщтых, джащ фэдэу ясурэт зытет бэйджхэр аIыгъыщтых.
Республикэм ирайонхэм ыкIи икъалэхэм ащыIэ чIыпIэ комиссиехэм хэдзынхэм зызэрафагъэхьазырырэми зэхэсыгъом щытегущыIагъэх.
ДЕЛЭКЪО Анет.