Абхъаз Республикэм икъэралыгъо сурэт къэгъэлъэгъуапIэу Сыхъум дэтым щылэ мазэм и 21-м машIоу къыщыхъугъэм абхъазхэм ялъэпкъ культурнэ кIэн зэрэхэкIодагъэм фэгъэхьыгъэ къэбарыр къыхэтыутыгъагъ. Сурэт къэгъэлъэгъуапIэм ихъарзынэщ чIэлъыгъэ сурэт 4000-м щыщэу машIом къыхахыжьышъугъэр 200 ныIэп.

[caption id="attachment_144732" align="aligncenter" width="800"] Апснымедиа[/caption] [caption id="attachment_144733" align="aligncenter" width="800"] Апснымедиа[/caption]

Апснымедиа тызэрэщигъэгъозагъэмкIэ, къагъэнэжьыгъэ сурэт­хэр зэтырагъэуцожьыным пае УФ-м культурэмкIэ и Министерствэ IэпыIэгъу лIыкIо куп Аб­хъаз Республикэм ыгъэкIуагъ. Урысыем музейхэмкIэ IэкIыб зэпхыныгъэхэмкIэ и Департамент итхьаматэ игуадзэу Наталья Чечиль лIыкIо купым ипащ.

Абхъаз Республикэм культурэмкIэ и Министерствэ ипресс— къулыкъу ипащэу Сария Маршан къызэриIотагъэмкIэ, С. Чанба ыцIэ зыхьырэ Абхъаз драматическэ театрэм ахьыжьыгъэ сурэт 200-р къатхыхьэ. Виктор Щегловым, Хуты Авидзба, Сергей Сангаловым, Сергей Габелия, Виссарион Цвижба ахэр яIэшIагъэх. Сурэтхэр къызатхыхьэхэкIэ, Абхъаз Лъэпкъ тхылъ­еджапIэм ахэр къа­хьыжьыщтых ыкIи зэтегъэуцожьын IофшIэнхэр щырагъэ­жьэщтых.

[caption id="attachment_144734" align="aligncenter" width="800"] Апснымедиа[/caption]

АР-м исурэтышIхэм я Союз ипащэу Елена Абакумовам тызэрэщигъэгъозагъэмкIэ, Урысыем исурэтышIхэм я Союз изичэзыу зэфэс мазаем и 8-м Москва щыкIощт.

«Абхъазхэм къащышIыгъэ тхьамыкIагъом — якультурнэ кIэн зэрэчIанагъэм — зэфэсым енэгуягъо щытегущыIэнхэкIэ. Ахэм IэпыIэгъу тызэрафэхъун тлъэ­кIыщт шIыкIэхэми тягупшысэщт. Адыгеим исурэтышIхэм алъэны­къокIэ тызэрадеIэшъущтыр — Абхъаз сурэт къэгъэлъэгъуапIэм ихъарзынэщ игъэкъужьыгъэным пае тисурэтышIхэм яIэшIагъэхэм ащыщхэр яттыщтых, — тыщигъэгъозагъ Елена Абакумовам.

Тэу Замир.