Адыгеим ветеринариемкIэ икъулыкъу ныбжьыкIэ IофышIэхэр ищыкIагъэх. Ау сэнэхьат гъэшIэгъонэу ветеринар врачыр бэмэ къыхахэу пфэIощтэп.

«Къуаджэм щыIакIэ дэлъэп» бэмэ аIо. Ау ар зэрэмышъып­къэр къеушыхьаты Байкъулэ Долэт. Илъэс 28-рэ зыныбжь кIалэр Джыракъые щэпсэу. Былымхэм, щагубзыухэм яIэзэгъэнымкIэ сэнэхьатыр Пшызэ къэралыгъо мэкъумэщ университетым щызэригъэгъотыгъ. Еджэныр къызеухым ичылэ гупсэ къыгъэзэжьи, Iахьзэхэлъ обществэу «Дондуковскэ элеваторым» ибылымэхъо фермэ ветеринарэу Iухьагъ.

Сэнэхьатым икъыхэхын Долэт бэрэ егупшысагъэп, ицIыкIугъом къыщегъэ­жьагъэу былымхэм ахэ­тыгъ, ятэжърэ ятэрэ ягъусэу бы­лымхъунымкIэ адэIэпыIэщтыгъ.

— Былымхэр лъэшэу сикIасэх. СицIыкIугъом къыщегъэжьа­гъэу тиунагъокIэ тIыгъыгъэ чэмхэм, мэлхэм сахэтыщтыгъ. ИлъэсипшI сыныбжьэу чэщ горэм чэмыр къэсымэджагъэу, етшIэщтыр тымышIэу сятэрэ сэрырэ нэф къэшъыгъ. Джащ дэжьым сыгу исыубытагъ ветеринар сэнэхьатыр къыхэсхынэу, — еIо Долэт.

Сэнэхьат гъэшIэгъон, ау IэшIэхэп Iоф рыпшIэныр. Анахь къиныгъохэм ащыщ ахэм узырэр къыуаIон зэрамылъэ­кIырэр, ор-орэу зэкIэ бгъэунэфын фае.

— Былымхэр дэгъоу зыща­­- Iы­гъхэу, гъэщыри, лыри бэу къызщахьыжьхэрэм тифермэ ащыщ, илъэс къэс гъунэп­къакIэхэр зыфэтэгъэуцужьы. Уз щынагъохэм ахэр ащыухъу­мэгъэнхэм ренэу тынаIэ тет. Ащ пае илъэсым тIогъогогъо уплъэкIунхэр зэхэтэщэх. Ты­къэзыуцухьэрэ чIыопсыр амыушIоиным, зэрифэшъуашэу былымхэр Iыгъыгъэнхэм ыкIи ахэм гъомылэпхъэ къабзэ къатыным, — мы зэпстэуми зэ­пымыоу тадэлажьэ, —къытфиIо­тагъ Долэт.

ТигущыIэгъу къызэрэхигъэщыгъэмкIэ, мэкъу-мэщым хэхъоныгъэ езыгъэшIы­хэрэм былымхъуныр ащыщ. Щэр къэзытырэ былы­мышъхьэхэм япчъагъэ зыкъе­гъэ­Iэтыгъэн, лъэпкъышIухэр нахьыбэ шIыгъэнхэ фаеу ащ елъытэ.

Былымэхъо фермэм шъхьэ 400-м ехъу щаIыгъ. Кировскэ хэкум къыращи «голштинскэ» лъэпкъым текIыгъэу чэм ныбжьыкIэ шъхьэ 240-рэ ащ чIэт. Ахэм щэ бэу къаты, а пчъагъэм шъхьи 100 джыри къыхэхъощт. ШкIэ цIыкIуи 100 фермэм щаIыгъ.

Сэнэхьатым епхыгъэ IофшIэным дакIоу Долэт чIыгулэжь, щагубзыухэр ехъух, ещэх. КIэлэ чаныр къоджэ щыIакIэм рыраз, шIуагъэу хэлъыр къыгурэIо.

Лъэпшъыкъо Фатим. Сурэтыр: Байкъулэ Долэт ихъарзынэщ.