Тарихъым егъэшIэрэу къыхэнэщт
Урысыем и Президентэу Владимир Путиным пшъэрылъ къызэрафишIыгъэм тетэу Адыгеим и ЛIышъхьэу КъумпIыл Муратрэ Къыблэ дзэ округым идзэхэм япащэ ипшъэрылъхэр пIэлъэ гъэнэфагъэкIэ зыгъэцакIэу Владимир Кочетковымрэ Урысыем и ЛIыхъужъ къыфагъэшъошэгъэ Дышъэ Жъуагъор полковникэу Роман Тороховым иунагъо ратыжьыгъ. Республикэм и Правительствэ зычIэт унэм Iофтхьабзэр щыкIуагъ.
[caption id="attachment_144679" align="aligncenter" width="800"] А. Гусев[/caption]
ХэушъхьафыкIыгъэ дзэ операцием ипшъэрылъхэр дэгъоу зэрэщигъэцакIэхэрэм, лIыхъужъныгъэшхо къызэрэзхигъэфагъэм афэшI дзэкъулыкъушIэм тын лъапIэр къыратынымкIэ тхылъхэр агъэхьазырыгъагъэх, ау идунай зехъожь нэуж ары ар къызыфагъэшъошагъэр. Урысыем и Президент 2023-рэ илъэсым тыгъэгъазэм и 16-м ышIыгъэ УказымкIэ Роман Тороховым УФ-м и ЛIыхъужъыцIэ къыфаусыгъ.
ДзэкъулыкъушIэм янэ-ятэхэр, ишъхьэгъусэ, ыпхъу зэIукIэгъум къырагъэблэгъагъэх. Къыблэ дзэ округым идзэхэм япащэ игуадзэу, генерал-лейтенантэу Владимир Жароври Iофхьабзэм хэлэжьагъ.
[caption id="attachment_144676" align="aligncenter" width="800"]
А. Гусев[/caption]
Илъэс 39-рэ къэзыгъэшIэгъэ Роман Тороховым Урысыем ишъолъыр зэфэшъхьафхэм дзэ къулыкъур ащихьыгъ, Къыблэ Осетиеми, Сириеми ипшъэрылъхэр дэгъоу ащигъэцэкIагъэх. ДзэкъулыкъушIэм Донецкэ Народнэ Республикэм и ЛIыхъужъыцIэ, ЛIыхъужъныгъэм иорден, Суворовымрэ Жуковымрэ ямедальхэр, медальхэу «За отвагу», «За боевые отличия» зыфиIохэрэр къыфагъэшъошагъэх.
Адыгеим и ЛIышъхьэ офицерым иунагъо фэтхьаусыхагъ, Роман Тороховым фэдэхэм Урысыем идзэ щытхъу къызэрэфахьырэр къыIуагъ.
«ТичIыпIэгъу хэгъэгум ищынэгъончъагъэ игъэпытэн иIахьышIу хишIыхьагъ. Апэрэ мафэхэм къащегъэжьагъэу Роман Тороховыр хэушъхьафыкIыгъэ дзэ операцием хэлэжьагъ. ЗиIоф хэшIыкIышхо фызиIэ, зи Хэгъэгу шIу зылъэгъурэ офицерэу ар щытыгъ, цIыфыгъэшхо хэлъыгъ. Ащ хьалэлэу и Хэгъэгу къулыкъу фихьыгъ, пытагъэрэ блэнагъэрэ хэлъыгъ», — къыIуагъ КъумпIыл Мурат.
Адыгеим и ЛIышъхьэ зэрэхигъэунэфыкIыгъэмкIэ, Урысыем и ЛIыхъужъэу Р. Тороховым ыцIэ Урысыеми республикэми ятарихъ егъэшIэрэу къыхэнэщт, зышъхьамысыжьэу и Хэгъэгу къулыкъу зэрэфихьыгъэмкIэ ныбжьыкIэхэм ренэу щысэтехыпIэу яIэщт.
[caption id="attachment_144678" align="aligncenter" width="800"]
А. Гусев[/caption]
Генерал-лейтенантэу Владимир Кочетковри Роман Тороховым иунагъо фэтхьаусыхагъ, дзэкъулыкъушIэ шъыпкъэу ар зэрэщытыгъэр, Урысыем ифедэхэр псэемыблэжьэу къызэригъэгъунагъэр къыхигъэщыгъ.
«Роман Тороховыр лIыхъужъ шъыпкъэу, командир IэпэIасэу щытыгъ. ТэркIи, къыухыгъэ училищым икурсантхэмкIи ар ренэу щысэтехыпIэу щытыщт.
[caption id="attachment_144680" align="aligncenter" width="800"]
А. Гусев[/caption]
Донецкэ Народнэ Республикэмрэ Луганскэ Народнэ Республикэмрэ яцIыфхэми, дзэкIолIхэми ящыIэныгъэ ащ къыухъумэзэ, идзэ пшъэрылъ ыгъэцэкIагъ», —къыIуагъ Владимир Кочетковым. Офицерыр япащэу Украинэм ипсэупIэ пчъагъэ шъхьафит ашIыжьыгъ, Роман Тороховым дзэкIолIхэр атакэм къыфиIэтыщтыгъэх. БлэкIыгъэ илъэсым ишэкIогъу мазэ ар фэхыгъ.
Урысыем и ЛIыхъужъ игупсэхэм республикэми, Къыблэ дзэ округми япащэхэм зэрафэразэхэр къаIуагъ IэпыIэгъу къызэрафэхъухэрэм, яшIэжь Роман зэрэхэлъым афэшI. Ахэм чIэнэгъэшхо зэрашIыгъэр, нэмыкIхэр IэпыIэгъу къызэрафэхъугъэхэм якъин къазэрэфигъэпсынкIагъэр къаIуагъ. Ны-тыхэм акъо ищыIэныгъэ щыщ пычыгъо заулэхэм ягугъу къашIыгъ.
Дышъэ Жъуагъор Роман Тороховым иунагъо етыжьыгъэным фэгъэхьыгъэ Iофтхьабзэм джащ фэдэу хэлэжьагъэх федеральнэ инспектор шъхьаIэу Сергей Дрокиныр, АР-м и Къэралыгъо Совет – Хасэм и Тхьаматэ игуадзэу, Урысыем и ЛIыхъужъэу Цэй Эдуард, АР-м и ЛIышъхьэрэ АР-м иминистрэхэм я Кабинетрэ и Администрацие ипащэу Владимир Свеженец, АР-м идзэ комиссарэу Александр Авериныр, Мыекъуапэ иадминистрацие ипащэу Геннадий Митрофановыр.
АР-м и ЛIышъхьэ ипресс-къулыкъу