Абрэдж Амир Адыгэ къэралыгъо университетым июридическэ факультет ия 4-рэ курс щеджэ. Сэнэхьатэу къыхихыгъэр лъэшэу ыгу рехьы, мы лъэныкъомкIэ шIэныгъэ куухэр зэригъэгъотынхэм пылъ.

[caption id="attachment_144657" align="aligncenter" width="800"] Абрэдж А.[/caption]

Амир Мыекъуапэ къыщыхъугъ, лицееу N 35-м щеджагъ, я 9-рэ классыр къызеухым Мыекъопэ къэралыгъо гуманитар-техническэ колледжым чIэ­хьагъ, юрист сэнэхьатым феджагъ, джы апшъэ­рэ гъэсэныгъэ зэрегъэгъоты.

— СищыIэныгъэкIэ щысэ зы­тес­хынхэр сиIэх, сятэжъэу Абрэдж Заур илъэс пчъагъэрэ Пщыжъхьэблэ гурыт еджапIэм ипэщагъ, сятэу Абрэдж Рэмэзан полицием иполковник. СицIыкIугъом къыщегъэжьагъэу ахэм сакIырыплъыгъ, шIэныгъэ уиIэмэ лъэгапIэхэм узэранэсыщтыр къызгурыIуагъ. Нахьы­жъхэр къызэрэсщыгугъы­хэрэр къызэрэзгъэшъыпкъэжьыщтым ыуж сит. Апэрэ курсым сисэу шIэныгъэ-практическэ конференцием сыхэлэжьэнэу синасып къыхьыгъ ыкIи джащ дэжьым научнэ IофшIэныр зэрэсшIогъэшIэ­гъоныр къызгурыIуагъ, нахь игъэ­кIотыгъэу зэзгъашIэу езгъэ­жьагъ, — еIо Амир.

КIэлэ ныбжьыкIэр апшъэрэ еджапIэм щызэхащэрэ Iофтхьабзэхэм чанэу ахэлажьэ. ПравэмкIэ факультетым щырагъэ­кIокIырэ научнэ-практическэ конференциехэм илъэс къэс защеушэты. Урысыем ишъолъыр зэфэшъхьафхэм ащыщ ныбжьыкIэхэр онлайн ыкIи офлайн шIыкIэм тетэу ахэм ахэлажьэх.

— СищыIэныгъэ гъогу шIэныгъэм зэреспхыгъэм сырыкIэгъожьырэп, джыри ар лъызгъэкIотэнэу сыфай. Шъолъыр ыкIи дунэе Iофтхьэбзэ зэфэшъхьафхэм сахэлажьэ ыкIи амалэу сиIэмкIэ зэрифэшъуашэу закъыщысэгъэлъагъо. Аспирантурэм сычIэхьажьыщт. ШIэныгъэ куу зиIэ цIыфхэм шъхьакIафэ афэсэшIы — еIо тигущыIэгъу.

Абрэдж Амир Адыгэ къэралыгъо университетым щызэхащэрэ конференциехэм чанэу ахэлажьэ. ИакъылкIэ илэгъухэм къазэрэхэщырэм гу лъатагъ ыкIи апшъэ­рэ еджапIэм зэрэчIахьэу юридическэ факультетым истудент научнэ обществэ хагъэхьагъ, нэужым ащ пащэ фашIыгъ. ДжырэкIэ зыщеджэрэ университетым инаучнэ обществэ ипащэ игуадз. Цыхьэ къызэрэфашIыгъэм осэ ин зэрэритырэр ыкIи езыгъэджэрэ кIэлэегъаджэхэр, джащ фэдэу факультетым идекан, студент научнэ обществэм ипащэхэр IэпыIэгъу къызэрэфэхъухэрэмкIэ зэрафэразэр кIэ­лэ ныбжьыкIэм къыIуагъ.

Апэрэ курсым къыщегъэжьагъэу ныбжьыкIэхэр шIэныгъэм нахь пыщагъэ хъунхэм фэшI студент научнэ обществэм Iофыгъо зэфэшъхьафхэр зэшIуехых, конференциехэр зэхещэх. Джащ фэдэу кIэлэеджакIохэм, гурыт сэнэхьат зэзыгъэгъотырэ ныбжьыкIэхэм Iоф адашIэ.

Абрэдж Амир ыгукIэ къыхихыгъэ сэнэхьатым феджэ, мы лъэныкъомкIэ шIэныгъэ куухэр зэригъэгъотынхэм пылъ. НыбжьыкIэ пэпчъ еджэным мэхьанэу иIэр игъом къыгурыIон, щыIэныгъэм чIыпIэ гъэнэфагъэ щиубытын зэрэфаер ащ къыхегъэщы.

— ШIэныгъэ уимыIэу щыIэныгъэм зи къыщыбдэхъущтэп. Узыфеджэ­рэ сэнэхьатыр пшIогъэшIэгъон зыхъукIэ лъэгапIэхэм уанэсыщт, — къыIуагъ кIэухым Абрэдж Амир.

ДЕЛЭКЪО Анет.