Грант 13 къырахыгъ
Президент грантхэм я Фонд ыкIи культурэ IофыгъуакIэхэмкIэ Президент Фондым 2024-рэ илъэсым ахъщэ IэпыIэгъу зэратыщтхэмкIэ зэнэкъокъум икIэух зэфахьысыжьыгъ.
Адыгеим иобщественнэ организации 7-мэ ащ текIоныгъэр къыщыдахыгъ, республикэмкIэ мэхьанэшхо зиIэ проектхэр лъэныкъо зэфэшъхьафхэмкIэ пхыращынхэу ахэм рагъэжьэщт.
Организациехэм ащ пае Iофышхо ашIагъ, егъэджэнхэр акIухэзэ яшIэныгъэхэм ахагъэхъуагъ, гражданскэ обществэм IэпыIэгъу етыгъэнымкIэ Гупчэр упчIэжьэгъу ашIыгъ, Iофыгъоу щыIэхэм защагъэгъозагъ. ГущыIэм пае, «Перезвон» зыфиIорэ организацием ипроектэу «НыбжьыкIэхэр — хэгъэгум ыкIи чыристан диным янеущырэ мафэх» зыфиIорэм культурэ IофыгъуакIэхэмкIэ Фондым игрантэу сомэ мин 488-рэ къырихыгъ. Чыристан диным икультурэ ащ пылъ ныбжьыкIэхэм нахь куоу нэIуасэ зыфашIын амал проектым къаритыщт.
Президент грантхэм я Фонд 2017-м къыщыублагъэу мысатыушI организациехэм апае илъэс къэс тIогъогогъо зэнэкъокъухэр зэхещэх. 2024-рэ илъэсымкIэ апэрэу щыIагъэм Адыгеим щагъэхьазырыгъэ проекти 6-мэ грантхэр къырахыгъэх. ТекIоныгъэр къыдэзыхыгъэхэр:
* Спорт акробатикэмкIэ АР-м и Федераций — «Начало — школа акробатики» зыфиIорэ проектымкIэ;
* Ассоциациеу «Экологический контроль и защита леса «Межвузовская лаборатория» зыфиIорэр, ипроект еджапIэхэм мэз хъызмэтшIапIэхэр ащыгъэпсыгъэнхэм фэгъэхьыгъ;
* Унагъохэм IэпыIэгъу ятыгъэным фэгъэзэгъэ мысатыушI организациеу «Унэгъо ныбжьыкI» зыфиIорэр — «Швейный коворкинг «Стежок к Победе» зыцIэ проектымкIэ;
* ЦIыфэу щыIэныгъэм чIыпIэ къин ригъэуцуагъэхэм шIушIэ IэпыIэ- гъу ятыгъэнымкIэ Гупчэу «Важные вещи» зыфиIорэр — проектыр — «Вместе сделаем Важные вещи»;
* Компьютерым фегъэджэгъэнхэмкIэ университет Гупчэу «Турбо» — «ИТ — старт для школьников» зыфиIорэ проектымкIэ;
* КIэлэцIыкIоу е зыныбжь илъэс 18-м нэмысыгъэу сэкъатныгъэ зиIэхэм янэ-ятэхэм я Урысые общественнэ организаций — проектэу «Служба социально-правовогои психологического со-провождения семей с инвалидностью ВОРДИ Адыгея» зыцIэмкIэ.
Сомэ миллион 11,3-рэ ауасэ социальнэ проект пстэумкIи пхыращыщт. А пчъагъэм щыщэу сомэ миллиони 6,6-р Фондым къытIупщыгъ. ЗэкIэмкIи шъолъыр 88-мэ къагъэхьыгъэ IофыгъокIэ 10827-рэ фондым къыфэкIуагъ, мысатыушI организациеу текIоныгъэр къыдэзыхыгъэр 1559-рэ мэхъу.