ЦIыфхэм Iэрыфэгъу щыIакIэ яIэнэу
[caption id="attachment_144642" align="aligncenter" width="800"] Шэртэнэ Мурат.[/caption]
ПсэупIэ-коммунальнэ хъызмэтым зэпыу имыIэу Iоф ышIэным, цIыфхэм псыр, гъэстыныпхъэ шхъуантIэр, электроэнергиер, нэмыкIхэр икъоу аIэкIэгъэхьэгъэнхэм республикэр лъэшэу пылъ.
Ащ пае УФ-м и Правительствэ амал пстэоу къытырэр ыгъэфедэзэ, хъызмэтым епхыгъэ инфраструктурэр егъэкIэжьы.
ГущыIэм пае, псы къабзэр икъоу щыIэным фэшI 2019 — 2022-рэ илъэсхэм псэолъэ 13 Адыгеим щагъэпсыгъ. ГъэрекIо «ПсэупIэр ыкIи къэлэ гъэпсыкIэр» зыфиIорэ лъэпкъ проектым ипхырыщын пае атIупщыгъэ федеральнэ проектэу «Псы къабзэм» къыдыхэлъытагъэу псыкъычIэщыпIэ 14 ашIыгъ.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, илъэсэу къихьагъэм джыри псэолъи 6 ашIынэу агъэнэфагъ. Ахэр станицэу Дондуковскэр, къуаджэхэу Нэшъукъуай, Пэнэжьыкъуай, Натыхъуай, поселкэхэу Лъэустэнхьабл, Отраднэр ары зыщагъэпсыщтхэр.
Джащ фэдэу мы лъэпкъ проектым ипхырыщын пае аштэгъэ федеральнэ проектэу «Iэрыфэгъу къэлэ щыIакIэ гъэпсыгъэныр» зыфиIорэр зыщыIэ 2017-рэ илъэсым къыщегъэжьагъэу пстэумкIи общественнэ чIыпIэ 275-рэ Адыгеим щызэтырагъэпсыхьажьыгъ. ИкIыгъэ 2023-м изакъоу пштэмэ, ащ фэдэ чIыпIэ 12 ыкIи фэтэрыбэу зэхэт унэхэм ящагухэу 34-рэ агъэкIэжьыгъ.
ИлъэсыкIэу къихьагъэми а IофшIэнхэр лъагъэкIотэщтых. ПстэумкIи чIыпIэ 36-рэ агъэкIэжьын гухэлъ яI. Ащ щыщэу 6-р общественнэх, 30-р фэтэрыбэу зэхэт унэхэм ящагух. Мы уахътэм подрядчикэу IофшIэнхэр зыгъэцэкIэщтхэм зэзэгъыныгъэу адашIыщтыр агъэхьазыры.
ХЪУТ Нэфсэт.