Щылэ мазэм и 30-м къалэу Мыекъуапэ нэ­мыц-фашист техакIохэм къатырахыжьи, шъхьафит зашIыжьыгъэр илъэс 81-рэ мэхъу.

[caption id="attachment_144649" align="aligncenter" width="800"] В. Шепталенко[/caption]

Дзэ Плъыжьым ичастьхэр псэемыблэжьэу заощтыгъэхэми, 1942-рэ илъэсым, Хэгъэгу зэошхом игъэмафэ, нэмыцыдзэхэм сыд ишIыкIэми — цIыфыбэ кIуачIэр ыкIи техникэр къыз­фагъэфеди, Краснодар ыкIи Адыгеир аштэгъагъ. Мэзи 5-м ехъум (шышъхьэIум и 9-м къыщегъэжьагъэу щылэ мазэм и 29-м нэс) Мыекъуапэ фашистхэм аIыгъыгъ. Ау оккупацием илъэхъан мы чIыпIэм щыпсэурэ цIыф жъугъэ къызэрыкIохэм яхэгъэгу шIулъэгъу, ялIыблэнэгъэ-гушхуагъэ техакIохэм ракIыкIын алъэкIыгъэп. Къэлэдэсхэм ащыщхэр шъэфкIэ мэзым хэт партизан отрядхэм адеIэщты­гъэх, псэемыблэжьыгъэх, хъурэ-­шIэрэм ахэр щагъэгъуазэщтыгъэх, амал зэряIэу, шхын го­рэ­хэри, нэмыкIэу зыфэещт го­рэ­хэри афахьыщтыгъэх. Фашистхэм апэшIуекIохэмэ язаохэзэ, партизан отрядым икомандирыгъэу Ф. Стрельниковыр, партизанхэу Н. Абрамовыр, К. Журавлевыр, М. Чубит, В. Сапуновыр ыкIи нэмыкIхэри фэхыгъэх. ЛIыхъужъныгъэ лIыблэнагъэу къахэфагъэм паекIэ, нэ­бгыришъэ пчъагъэм орденхэр ыкIи медальхэр афагъэшъошагъэх. Гитлеровцэхэм тикъалэ къумалыгъэ Iае щызэрахьагъ, лажьи-хьакъи зимыIэгъэ нэбгырэ пшIы пчъагъэр палъагъ, хэкум щызэтыраукIагъэр мини 4-м кIэхьэ. Тикъалэ зэхакъу­тагъ, утынышхо рагъэшIыгъ.

ХьэкIэ-къокIэгъэ ин зэрахьэу, тицIыфхэм ини, цIыкIуи, хьэр псашъо арагъэщагъ. Щылэ мазэм и 30-м 1943-рэ илъэсым Мыекъуапэ Закавказскэ фронтым идзэхэм шъхьафит ашIы­жьыгъ. Ащ пыдзагъэу псынкIэу къалэм изэтегъэуцожьын зырагъэушъомбгъугъ.

Къэрэмыхъужь ащ фэдэ зэожъ хьазаб!

Мамырныгъэр щыIэмэ, Iоф пшIэмэ, ушхэщт ыкIи ущыIэщт.

ШIэжьыр агъэлъапIэзэ

Адыгеир шъхьафит зашIыжьыгъэ мафэм фэгъэхьыгъэ Iофтхьабзэу «Вахта памяти» зыфиIорэр республикэм щаублагъ.

ПсэупIэу Дахъо зэхахьэ щыкIуагъ. Мыщ 1943-рэ илъэсым пыир къыщызэтырагъэуцуи, Мыекъопэ лъэныкъомкIэ хы ШIуцIэ Iушъом Iуагъэхьагъэп.

Адыгеим и ЛIышъхьэ ыкIи хэбзэгъэуцухэм ацIэкIэ къызэ­рэугъоигъэхэм закъыфигъэзагъ шъолъыр парламентым ипащэу Владимир Нарожнэм.

— Мыщ ти Сталинград цIыкIу щыгъэпсыгъагъ. ТIогъогогъо бы­ракъ Плъыжьыр зыфагъэшъоша­гъэу НКВД-м ия 23-рэ погранполк, партизан отрядхэм ядзэ­кIолIхэм текIоныгъэ зекIор Мые­къопэ лъэныкъомкIэ рагъа­жьи, районым ипсэупIэхэм пыир ащагъэкIодызэ къалэм екIужьыгъэх, — къыIуагъ ащ.

Республикэм ыубытырэ чIы­налъэр илъэсныкъорэ къэдзы­хьэгъагъ ыкIи фашистхэм ажэ­хэхьанхэмкIэ Темыр-Кавказ опе­рацием ишIуагъэкIэ шъхьафит хъужьыгъэ. Заом фэгъэ­хьыгъэ тарихъ хъугъэ-­шIагъэхэр къыIотагъэх АР-м иветеранхэм я Совет итхьаматэу Къоджэ Аслъан. ХэкIодагъэхэм зы та­къи­кърэ афэ­шъыгъуагъэх, шъхьа­фитныгъэм фэбэнэгъэ дзэкIолIхэм яшIэжь саугъэт къэгъагъэхэр кIэралъхьагъэх.

Адыгеим икъушъхьэлъэ чIыпIэхэр арых шъолъырым ишъхьа­фитыныгъэ икъыдэхын къыз­щырагъэжьагъэр. Ащ пае мы зэхахьэмкIэ аублагъ илъэс къэс зэхащэрэ Iофтхьабзэу «Вахта памяти» зыфиIорэр.