Къэралыгъом хахъо ышIыным пай
Мы илъэсым игъэтхапэ «Сильные идеи для нового времени» зыфиIорэ Iофтхьабзэр къэралыгъом икъэлэ шъхьаIэ щыкIощт.
Ащ къыдыхэлъытагъэу, сатыушIхэу, хъызмэтшIапIэхэу ыкIи цIыф къызэрыкIоу къэралыгъор пытэнымкIэ, хэхъоныгъэ ышIынымкIэ гупшысакIэхэр зиIэхэм щылэ мазэм и 31-м нэс япроектхэр зэхэщакIохэм афагъэхьын алъэкIыщт. Ащ икIэщакIор Стратегичекэ гукъэкIхэмкIэ агентствэмрэ фондэу «Росконгрессымрэ».
Экономикэм, технологиякIэхэм, социальнэ хэхъоныгъэхэм, гъэсэныгъэм, щыIэныгъэм ялъэныкъо пстэури нахьышIу шIыгъэнымкIэ лъэбэкъухэр зыдзырэ цIыф пэрытхэр, общественнэ зэхахьэхэр, хабзэм иIофышIэхэр зэфэщэгъэнхэр ыкIи ахэр зэдэлэжьэнхэр, ягупшысэхэмкIэ зэдэгощэнхэр, хэкIыпIэхэр къызэдагъотынхэр Iофтхьабзэм ипшъэрылъ шъхьаI.
Адыгеири ащ чанэу хэлажьэ. Непэрэ мафэм ехъулIэу республикэм ипроекти 9 ащ агъэхьыгъ. Ащ къыщыгъэлъэгъуагъэхэм ащыщ къоешIыным фэгъэзэгъэ Цышэ Казбек. «Мэкъумэщ гъомылапхъэхэр» зыфиIорэ лъэныкъомкIэ ащ ипроект къегъэлъагъо. ИхъызмэтшIапIэ зыригъэушъомбгъумэ, мэкъумэщ къыдэгъэкIыжьыным хахъо ышIынымкIэ ишIуагъэ къэкIонэу елъытэ. Къуаеу ыщэрэр нахьыбэ ышIымэ, щэм икъыдэгъэкIыжьын зиушъомбгъущт. Ары зыхъукIэ былымхэр зыIыгъ хъызмэтшIапIэхэм къаугъоирэ щэр нахьыбэ ашIыным дэлэжьэщтых.
— ТигъэщхэкIхэр язытеткIэ анахь дэгъухэм ащыщых. Ижъырэ адыгэ къоеихыкIэкIэ ахэр тэгъэхьазырых, щымыщ ахатлъхьэрэп. ЗыхэтшIыкIырэри щэ шъыпкъ. Къоеихыным хахъо едгъэшIыным тыпылъ. Тигухэлъыр, къыдэдгъэкIырэм хэдгъахъомэ, IэкIыбым къыращырэ къуаехэр гъэмэкIэгъэнхэр ары, — къыддэгощагъ Цышэ Казбек.
«Сильные идеи для нового времени » зыфиIорэ Iофтхьабзэр УФ-м и Президентэу Владимир Путиным иунашъокIэ 2020-рэ илъэсым къыщегъэжьагъэу зэхащэ. Нэбгыришъэ пчъагъэмэ ягукъэкIхэр ащ къырахьылIэх ыкIи анахь дэгъоу алъытэхэрэм ыужыкIэ амал араты щыIэныгъэм ахэр щыпхыращынхэу. Непэрэ мафэм ехъулIэу проект мини 10-м нахьыбэ форумым агъэхьыгъах. Хэлэжьэн шIоигъоныгъэ зиIэу, ау джыри зипроектхэр къэзымыгъэлъэгъуагъэхэм джыри ащ фэдэ амал яI. Щылэ мазэм и 31-м нэс ахэр аугъоих.
Анцокъо Ирин.