Пыдзэфэ пытэхэм ядэ­щын фэгъэзэгъэ шъолъыр опе­раторым монополием пэшIуекIогъэнымкIэ Фе­де­ральнэ къулыкъум и ГъэIорышIапIэу АР-м щы­Iэм къыхигъэщыгъэгъэ хэу­къоныгъэр ыгъэтэрэ­зыжьыгъ.

Къулыкъум къызэрэщаIуагъэмкIэ, хъызмэтшIэпIищмэ къатыгъэ тхьаусыхэ тхылъхэр ары Iоф къызэIуахыным ушъхьагъу шъхьаIэ фэхъугъэр. Шъолъыр операторым зэзэгъыны­гъэу дашIыгъэм итыр ыукъуагъ, ­игъом хэкIыр Iуищыгъэп.

— «ЭкоЦентрэм» ифэIо-фашIэхэр зыгъэфедэхэрэр цIыфэу республикэм исхэр, юридическэ лицэхэр ары. ХэкIыр Iузыщын фаеу Адыгеим мы зыр ары итыр. Ащ фэшI нэмыкI компание зэзэгъыныгъэ дашIынэу фитыныгъэ цIыфхэми, юридическэ лицэхэми яIэп, — къыщаIуагъ монополием пэшIуекIогъэнымкIэ Федеральнэ къулыкъум и ГъэIорышIапIэу АР-м щыIэм. Шъолъыр операторым хэукъоныгъэр охътэ кIэкIым ыгъэтэрэзыжьыныр шIокI зимыIэ Iофэу зэрэщытыр къызщиIорэ тхылъыр антимонопольнэ къулыкъум ыгъэхьыгъ. ПIалъэу ащ ыгъэнэфагъэм диштэу ар зэрагъэцэкIагъэр компаниеми тхылъхэмкIэ къыушыхьатыжьыгъ. Ау ащ пай къэмынэу операторым административнэ пшъэдэкIыжь ыхьыщт.