Непэ ныдэлъфыбзэм изытет тызы­гъэгумэкIырэ Iофыгъо шъхьаIэхэм ащыщ. Адыгабзэм рыгущыIэхэрэм япчъагъэ ихэгъэхъон ыкIи бзэм изэ­гъэшIэн япхыгъэ Iофтхьабзэхэр кIэлэегъаджэхэм игъэкIотыгъэу ра­гъэкIокIых.

Нэгъой Щамсэт Хьатыгъужъыкъое гурыт еджапIэу Хьаткъо Ахьмэд ыцIэ зыхьырэм икIэлэегъадж, исэнэхьаткIэ апшъэрэ ­ква­лификацие иI. Илъэс 33-рэ хъугъэу мы еджапIэм Iут. «Шэуджэн районым икIэлэегъэджэ анахь дэгъу-2023-рэ» зыфиIорэ цIэр Щамсэт къыфагъэ­шъошагъ, лъэпкъ проектэу «Гъэ­сэныгъэм» къыхиубытэу зэ­хащэрэ зэнэкъо­къухэм апэрэ чIыпIэхэр къащихьыгъ. Щамсэт —уахътэм диштэрэ кIэлэ­егъадж.

«Адыгабзэм итхьамаф» зыфиIорэ Iофтхьа­бзэр мазэм зэ еджапIэм щызэхищэнэу пшъэрылъ зыфигъэуцужьыгъ. Ащ ишIуагъэкIэ кIэлэеджа­кIохэм адыгабзэр нахь куоу зэраригъэшIэщтым ицыхьэ телъ.

«КIэлэцIыкIум игъэсэныгъэ-пIуныгъэ кIэлэегъа­джэм ипшъэрылъ шъхьаI. ИцIыкIугъом ащ акъылэу ептырэр ары зэрыпсэущтыр. УкIэлэегъаджэу, мафэ къэс кIэлэеджа­кIохэм уахэт хъумэ, амалыкIэхэм уалъэхъу. КIэлэегъаджэ пэпчъ еджакIу, шIэныгъакIэхэр зэригъэгъотыным пылъ. Хъытыум зэлъиубытыгъэ дунаим хэт сабыйхэм ашIогъэшIэгъонын алъэкIыщт десэхэр бгъэхьазырыныр IэшIэхэп. «Адыгабзэм итхьамаф» зыфиIорэ Iофтхьабзэм ныдэльфыбзэм изэгъэшIэнкIэ ишIуагъэ къэкIонэу сэгугъэ. Апэ­рэм­кIэ, кIэлэ­еджэкIо цIыкIухэм янэ-ятэхэр Iофтхьабзэм хэсщагъэх. Еджа­кIохэм ны­дэлъфыбзэмкIэ яшIэны­гъэхэр къэзы­Iэтыщт шIы­кIэ-амалышIу­хэр зэрагъотыщтхэр агурызгъэIуагъ. Адыгэбзэ зэ­гъэшIэным кIэлэцIыкIу­хэр пыщэгъэнхэм «Адыга­бзэм итхьамафэ» изэнэкъокъухэр фэлажьэ. Щылэ мазэм Iофтхьабзэу зэхэсщагъэм «Адыгабзэм хэт фэIаз?» шъхьэу фэсшIыгъ. Пшъэ­рылъэу згъэу­цугъэхэр игъорыгъоу сэгъэцакIэх», — еIо Нэгъой Щамсэт.

КIэлэеджакIохэр ап­шъэрэ классым исхэ нахь мышIэми зэнэкъокъум ча­нэу хэлэжьагъэх, апэрэ лъэбэкъу пытэхэр адзыгъэх. КIэлэегъаджэр иIоф­шIэн фэшъыпкъэу фэла­жьэу, адыгабзэм изэгъэшIэн куоу дэлажьэмэ бзэр кIодыщтэп.

Лъэпшъыкъо Фатим.