«Точка кипения» зыцIэ проектым къыдыхэлъытагъэу цифрэ шIэныгъэм­кIэ ыкIи киберщынэгъончъэнымкIэ Урысые гъэсэныгъэ проектэу «Цифрэ мышIэныгъэр дэгъэзыжьыгъэныр» зы­фиIорэ зэIухыгъэ республикэ Iоф­тхьабзэр МКъТУ-м щырагъэкIокIыгъ. Темэ шъхьаIэу ащ иIагъэм зэреджагъэхэр — «Интернет хъытыум щынэ­гъончъэу ухэтыныр».

[caption id="attachment_144607" align="aligncenter" width="800"] МКъТУ-м ипресс-къулыкъу.[/caption]

ЗэIукIэм хэлэжьагъэх Мыекъопэ гимназиеу N 5-м икIэлэеджакIохэу я 7 — 8-рэ классхэм ащеджэхэрэр ыкIи икIэлэегъаджэхэр. Республикэм инэмыкI еджапIэмэ ялIыкIохэр пэIудзыгъэ шIыкIэм тетэу Iофтхьабзэм къыхэлэжьэнхэ амал яIагъ, ар къязытыгъэр къэбар-коммуникационнэ платформэу «Сферум» зыфиIорэр ары.

ЗэIукIэр зэращагъ МКъТУ-м къэбар щынэгъончъэнымкIэ ыкIи бгъэфедэн плъэкIырэ информатикэмкIэ кафедрэм ипащэу Цундышкэ Вячеславрэ Респуб­ликэ естественнэ-хьисап еджапIэм гъэ­сэныгъэ цифровизациемкIэ и Гупчэ ипащэу Елена Пономаренкэмрэ.

ЗэIукIэм хэлажьэхэрэм къагурыIуагъ интернетым узыхахьэкIэ сакъы­ныгъэ къызхэбгъэфэн зэрэфаер, арымырмэ, къиныгъохэм уяолIэн зэрэ­плъэкIыщтыр. Джащ фэдэу кIэлэеджа­кIомэ арагъэ­шIагъ мыхъун къэбарэу интернетым къырагъа­нэрэм иягъэ нэ­ужым къызэрякIыжьыщтыр, IофшIэным культурэу пылъыр, иягъэ къямыкIэу гаджетхэр сыхьат пчъагъэу зэрагъэфе­дэщтхэр. ЩыIэныгъэм щыщ щысэхэр къахьыхэзэ, зещакIохэр къызытегущыIэхэрэр нахь алъагъэIэсыным пылъыгъэх. ШIэныгъа­кIэу аратыгъэр зэрагурыIуагъэри ауплъэ­кIужьыгъ, афагъэхьазырыгъэ ушэтыныр арагъэкIугъ.

Гъэсэныгъэмрэ шIэныгъэмрэкIэ ­Адыгэ Республикэм и Министерствэ яIэпыIэгъоу Iофтхьабзэр рагъэкIокIыгъ. УрысыемкIэ мы проектэу «Цифрэ мышIэныгъэр дэгъэзыжьыгъэныр» зыфиIорэм изэхэщакIохэр цифрэхэмкIэ УФ-м и Министерств, гъэсэныгъэмкIэ УФ-м и Министерств ыкIи АНО-у «Цифрэ экономикэр». Проектым игъусэх Сбербанкым и ШIушIэ фондэу «Вклад в будущее», VК, Avito ыкIи Лабораториеу Kaspersky.