ХагъэунэфыкIырэ чIыпIэхэр къыдахыгъэх
Атлетикэ псынкIэмкIэ Къыблэ федеральнэ шъолъырым ичемпионатрэ ипервенствэрэ къалэу Краснодар щыкIуагъэх.
Урысыем ишъолъыр 12-мэ яспортсмен 797-мэ заушэтыгъ. Зэнэкъокъухэм ахэлэжьагъэхэр ныбжьыкIэхэр ары.
Адыгэ къэралыгъо университетым физическэ культурэмкIэ ыкIи дзюдомкIэ и Институт иапэрэ курс щеджэрэ Екатерина Анохинамрэ магистранткэу Ирина Дровалевамрэ текIоныгъэр къыдахыгъ, ахэм метрэ 800 ыкIи 200 къачъыгъ. Типшъашъэхэр зыгъасэхэрэр Ю. П. Баевыр ыкIи И. В. Петлюра.
Джащ фэдэу тиапшъэрэ еджапIэ къэзыгъэлъэгъогъэ нэмыкI спортсменкэхэми хагъэунэфыкIырэ чIыпIэхэр къафагъэшъошагъэх. Анахь гъогу кIыхьэу метрэ 3000 хъурэм щызэнэкъокъугъэхэм азыфагу ятIонэрэ чIыпIэр къыщыдихыгъ аспиранткэу Марина Мартыновам, ащ итренерыр спорт дисциплинэхэмкIэ кафедрэм ипрофессорэу О. Б. Немцевыр. Метрэ 200 къэзычъыгъэхэм къахэщыгъэх ыкIи медальхэр къахьыгъэх Екатерина Анохинамрэ Ирина Дровалевамрэ.
Адыгэ къэралыгъо университетым ипресс-къулыкъу