Урысые Iофтхьабзэу «ЛIыхъужъхэм язэдэгущыIэгъу» зыфиIорэм къыдыхэлъытагъэу Мыекъопэ гурыт еджапIэу N 11-м чIэсхэм хэушъхьафыкIыгъэ дзэ операцием иветеранэу Андрей Васнецовым зэIукIэгъу щыдыряIагъ.

[caption id="attachment_144584" align="aligncenter" width="800"] Мыекъопэ къэлэ администрациер[/caption]

Къэралыгъо фондэу «Хэгъэгум иухъу­макIохэр» зыфиIорэм ишъолъыр къутамэ ащ кIэщакIо фэхъугъ. Ащ ипащэ игуа­дзэу Джарымэ Еленэ шъолъыр къутамэм ипшъэрылъхэм ыкIи яIофшIэн кIэлэеджа­кIохэм къызафеIуатэм ыуж къэзэрэугъо­игъэхэр ветераным нэIуасэ фишIыгъэх. ХэушъхьафыкIыгъэ дзэ операцием лIы­гъэу щызэрихьагъэхэм афэшI ащ ЛIы­хъужъныгъэм иорден къыфагъэшъошагъ.

ЩыIэныгъэ гъогу гъэшIэгъон къэзыкIугъэ цIыфым дэгущыIэнхэ амал кIэлэ­еджакIохэм яIагъ. Запасым щыIэ подполковникым ныбжьыкIэхэм нахь ашIо­гъэшIэгъоныщт лъэныкъохэр къафиIотагъэх: фронтым мафэхэр зэрэщагъа­кIохэрэр, ащ щыIэкIэ-псэукIэу щыряIэр, дзэкIолIхэм язэфыщытыкIэ, хъугъэ-шIэгъэ гъэшIэгъонэу зыхафэхэрэр ыкIи ежьхэм анахь мэхьанэ зиIэ Iофэу ашIэн фаехэр. КIэлэеджакIохэм шъхьэихыгъэу упчIабэ Андрей Владимир ыкъом ра­тыгъ, ежьми игуапэу ахэм джэуапхэр къаритыжьыгъэх.

Iофтхьабзэм икIэухым еджакIохэм ащыщхэу зиIахьылхэр дзэ операцием хэлэжьагъэхэр е щыIэхэр лIыхъужъэу къырагъэблэгъагъэм кIэрыхьэхэзэ, лIыгъэ зекIуакIэу зэрихьагъэхэмкIэ зэрэфэразэхэр раIуагъ.