КIэу къыздихьыгъэхэр
ИлъэсыкIэ пэпчъ Урысые Федерацием ихэбзэгъэуцугъэхэм ащыщхэм зэхъокIыныгъэхэр афэхъух. 2024-ми кIэу къыздихьыгъэр макIэп.
Ахъщэ тынхэр
ГущыIэм пае, пенсиехэм, ны мылъкум, сабыир къызыхъукIэ зэтыгъоу къатырэ ахъщэм, ащ зэрэлъыплъэрэм пае ным мазэ къэс къыфакIорэм, ветеранхэм мазэ къэс къаратырэм, федеральнэ фэгъэкIотэн зиIэхэм мазэ къэс къафэкIорэ ахъщэ тыным, нэмыкI социальнэ IэпыIэгъухэм мы илъэсым къахэхъощт. IофшIапIэ Iумытхэм япенсие индексацие ашIыгъэу щылэ мазэм и 1-м къыщыублагъэу къаты, адрэхэм мэзэе мазэм, мэлылъфэгъум зэхъокIыныгъэхэр анэсыщтых.
ПсэупIэ-коммунальнэ фэIо-фашIэхэр
Джащ фэдэу охътэ зэфэшъхьафхэм хэбзэгъэуцугъэхэм зэхъокIыныгъэу афэхъугъэхэм кIуачIэ яIэ хъущт. Ахэм ащыщ фэтэрыбэу зэхэт унэхэм ачIэсхэм зэIукIэ ашIынышъ, ахэм зэдагъэфедэхэрэм ягъэкIэжьын фытегъэпсыхьэгъэ программэм къыдыхэлъытагъэу IофшIэнэу рашIылIэщтхэм зэхъокIыныгъэхэр афашIынхэу фитыныгъэ къэзытырэр.
ЦIыфхэм электроэнергием, псым, фабэм якIуапIэхэм, унэр машIом щызыухъумэрэ системэм язытет ежь-ежьырэу ауплъэкIунышъ, зэблэхъугъэн е гъэцэкIэжьыгъэн фаер къагъэнэфэнэу фитыныгъэ ащ къареты.
Хэбзэгъэуцугъэм зэхъокIыныгъэу фашIыгъэхэм 2024-рэ илъэсым иIоныгъо мазэ и 1-м кIуачIэ яIэ хъущт.
ПсэупIэ-коммунальнэ темэр лъыбгъэкIуатэмэ… Мы илъэсым ибэдзэогъу мазэ и 1-м ащ ифэIо-фашIэхэм ауасэ къаIэтыщт. Ащ фэгъэхьыгъэ унашъом къызэрэщиIорэмкIэ, къахэхъощт процентхэр, гурытымкIэ лъытагъэу, зыфэдизыщтхэр шъолъыр пэпчъ зэфэшъхьафыщт.
Социальнэ IэпыIэгъу зищыкIагъэхэм ар нахь афагъэпсынкIагъ. Ахэм псэупIэ-коммунальнэ фэIо-фашIэхэм апкIэ е ащкIэ чIыфэ зытелъхэм афытырагъэхъуагъэр (пеняр) затыкIэ, банкхэм, почтэм комиссиехэр аIахыжьыщтхэп.
Электроэнергием, гъэстыныпхъэ шхъуантIэм, псым, фабэм, нэмыкI фэIо-фашIэхэм апкIэ зитыкIэ комиссиеу ащ дитырэр къызфэкъинэу щыIэр макIэп. Арышъ, шэпхъакIэм цIыфхэм мы лъэныкъомкIэ яIофхэр нахь псынкIэ къызэришIыщтым Iо хэлъэп.
Мыщ фэгъэхьыгъэ зэхъокIыныгъэхэм бэдзэогъу мазэр ары кIуачIэ яIэ зыхъущтыр.
ХэушъхьафыкIыгъэ дзэ операцием хэлажьэхэрэр
Ахэм ыкIи яунагъохэм афэгъэзэгъэ къэралыгъо IэпыIэгъукIэхэми 2024-рэ илъэсым ищылэ мазэ и 1-м къыщыублагъэу кIуачIэ яIэ хъугъэ. Ахэм япсэупIэхэм е фэтэрыбэу зэхэт унэхэм ащыпсэухэрэм зэдагъэфедэхэрэм ягъэкIэжьын фэгъэхьыгъэ программэм къыдыхэлъытагъэу къафагъэцэкIэщтхэм апае ахъщэу атырэм ипроцент 50-м къырагъэгъэзэжьынэу унашъом къыщеIо. Дзэ операцием зыщыхэлэжьэхэрэ уахътэр ары ащ къыхиубытэрэр.
КъагъэпцIагъэхэм апай
ЦIыфым гъэпцIагъэкIэ бзэджашIэхэм ахъщэу Iахыгъэм банкым къыригъэгъэзэжьыным фэгъэхьыгъэ хэбзэгъэуцугъэу УФ-м и Къэралыгъо Думэ ыштагъэми мы илъэсым кIуачIэ иIэ хъущт. Зигугъу къышIырэр Iэрылъхьэу ытыгъэр арэп, банкым счетэу щыриIэм ригъэкIи бзэджашIэхэм ясчет ригъэхьагъэр ары.
Хэбзэгъэуцугъэм къызэрэщиIорэмкIэ, цIыфым ишIоигъоныгъэ хэмылъэу банкым е нэмыкI организациеу ащ фэдэ Iофхэм афэгъэзагъэм счетэу щыриIэм ахъщэр икIыгъэмэ, лъэIу тхылъыр къызитхыгъэм ыуж мэфэ 30 нахьыбэ темышIэзэ имылъку къырагъэгъэзэжьын фае. Ахъщэр IэкIыбым кIуагъэмэ, мэфэ 60 пIалъэу иIэщт.
Мыхэм анэмыкI хэбзэгъэуцугъабэм зэхъокIыныгъэхэр афэхъугъэх. ЗэкIэми ягугъу къэшIыгъуай. Непэ цIыфхэр анахьэу зыгъэгумэкIыхэрэр ахъщэ тынэу къэралыгъом къытIупщыхэрэмрэ фэIо-фашIэу, анахьэу псэупIэ-коммунальнэхэр, къафагъэцакIэхэрэм апае атырэмрэ. Ащ фэшI ахэм афэгъэхьыгъэ зэхъокIыныгъэхэр нахь къыхэдгъэщыгъэх.
ХЪУТ Нэфсэт.
Сурэтхэр: Iэшъынэ Аслъан. Шэртэнэ Мурат.