ТхылъеджэпIэ къутамэу N 2-м видео­урокэу «Блокаднэ хьалыгъум ишIэжь» ыкIи Iофтхьабзэу «Шiэжьым ишэф остыгъ» зыфиIорэр щызэхащагъ.

Хэгъэгу зэошхоу 1941 — 1945-рэ илъэсхэм тихэгъэгу щыхъушIагъэм къалэу Ленинград хьазабэу щищэ­чыгъэр къыриIотыкIэу ар гъэпсыгъагъ. Iофтхьабзэм поселкэу Западнэм иветеран организацие хэтхэр ыкIи ащ итхьаматэу Чэужъ Мариет, псэупIэм и ТОС-у N 14-м иадминистрацие илIыкIохэр хэлэжьагъэх.

«Ленинград пэкIэкIыгъэ пстэур очеркхэу, повестьхэу, романхэу, гукъэкIыжьхэу атхыгъэхэм къыраIотыкIы. Сыда джыри къамы­Iуагъэу е хэти ымышIэу мы хъугъэ-­шIагъэмкIэ къэна­гъэр?» пIон плъэкIыщт.

Ау хэгъэгу шIулъэгъур непэ цIыфхэм агу щыгъэпытэгъэнымкIэ мафэ къэс а блэкIыгъэ зэошхом ихьазаб игугъу пшIыныр ищыкIагъ, къинэу а уахътэм цIыфхэм ащэчыгъэр хэти ышIэныр, лъыгъэIэсыгъэныр пшъэрылъ шъхьаI. Блокадэр къызэрежьагъэри, цIыф жъугъэхэр зэтеубы­тэгъэ-дэшIыхьагъэ зэрэ­хъу­гъа­гъэхэри — гъомылапхъэр аухи, хьэр псашъо зэра­щагъэр, хьалыгъу бзыгъэ шIу­цIэ такъырым нахь гу­шIуагъо ямыIэу зэрэщытыгъэм рагъэплъыгъэх. Ау зэо жъа­лымым къэлэдэсхэр къызэримыуфагъэхэр, ини цIыкIуи ТекIоныгъэр къызэрагъэкIотэщтым зэ­рэпылъы­гъэхэр, фашистхэм яжъалы­мыгъэ-хьазаб щэ­чыгъоягъэ­ми, ленинградцэхэм щэIэгъэшхо зэряIагъэр фильмым къеушы­хьаты.

ШIэжь зэхахьэм хэлэжьагъэхэр тхылъ къэгъэлъэ­гъонэу зэо литературэр бэу зыхэлъым ягуапэу еплъыгъэх.

Iофтхьабзэм икIэух «ШIэ­жьым ишэф остыгъ» зыфиIорэр рагъэкIокIыгъ, ленинградцэу фэхыгъэхэм зы такъикърэ афэшъыгъуагъэх.