Тхьаумафэу кIуагъэм осэу къесыгъэм ыуж республикэм игъогухэм язытет тызыкIэупчIэм, ащ фэдэ джэуап «Адыгеяавтодорым» къытитыгъ.

[caption id="attachment_144515" align="aligncenter" width="800"] Е. Сергеев[/caption]

Гъогухэм ягъэцэкIэжьынкIэ ыкIи яIыгъынкIэ отделым ипащэу Дмитрий Бороненкэм къызэриIуагъэмкIэ, зэрагъэ­къэбзагъэхэм нэмыкIэуи мыцIэлъэгъонхэм пае пшахъо атыратэкъуагъ.

— Тхьаумэфэ пчэдыжьым осыр нахь лъэш къызэхъур ары техникэр гъогухэм затехьагъэр, бэу ащызэтыримыхьаным фэшI къытесэрэр тыратхъущтыгъ. КъыкIэлъыкIогъэ чэщым осыр зэуцужьым, тыримыгъэщтыхьэзэ агъэкъэбзагъэх. ПстэумкIи техникэ зэфэшъхьафэу 60-м ехъу республикэм игъогухэм атехьэ­гъагъ, пчэдыжьым нэс анахь шъхьаIэхэу, нахьыбэу транспортыр зыщызекIохэрэр щынэгъончъэ ашIынхэу игъо ифагъэх, зынэмысыгъагъэхэр тыгъуасэ агъэкъэбзэжьыгъэх, — къыIуагъ ащ.

Мыекъопэ администрацием къызэритыгъэмкIи, къалэм игъогухэм язытет лъэплъэх. Автотранспортыр бэу зэрыкIохэрэр, социальнэ псэуалъэхэм якIухэ­рэр, лъэсрыкIо гъогухэр апэу агъэкъэбзагъэх ыкIи анахьэу ахэм анаIэ атет.

Осышхо къызесыкIэ къалэм игъэкъэ­бзэн гъогухэм афэгъэзэгъэ къулыкъу­хэм ямызакъоу, зэкIэ хъызмэтшIапIэхэр къыхэлэжьэнхэ фае. ЧIыпIэу зэлъаубытыхэрэм язытеткIэ ахэм пшъэ­дэкIыжь ахьы. Ар къэлэ администрацием зэкIэми агу къегъэкIыжьы.

Интернет нэкIубгъохэр, социальнэ хъытыур агъэфедэзэ къэлэдэсхэм къатхыхэрэми алъэплъэх, агъэнафэх ыкIи подрядчикхэм аIэкIагъахьэ.

Осыр уцугъэп, синоптикхэм къызэратырэмкIэ, джыри къесынэу тапэ илъ. Арышъ, республикэм игъогу хъызмэтшIапIэхэм джыри Iофыбэ апэ илъ.

ХЪУТ Нэфсэт.