Сэкъатныгъэ зиIэхэр щыIэныгъэм хэгъэгъозэжьыгъэнхэм фытегъэпсыхьэгъэ техникэр 2024-рэ илъэсым зэгъэгъотыгъэным фэшI электроннэ аукционэу зэхащагъэм монополием пэшIуекIогъэнымкIэ Адыгеим икъулыкъу хэукъоныгъэ хилъэгъуагъэп.

Монополием пэшIуекIогъэнымкIэ Федеральнэ къулыкъум Адыгэ Респуб­ликэмкIэ и ГъэIорышIапIэ зимычэзыу уплъэкIун фызэхищагъ Урысые Федерацием и Социальнэ фонд Адыгэ Рес­публикэмкIэ и Къутамэ. Сэкъатныгъэ зиIэхэр щыIэныгъэм хэгъэгъозэжьыгъэн­хэм фытегъэ­псыхьэгъэ техникэр зэгъэ­гъотыгъэным фэшI электроннэ аукцион зызэхащэм зэзэгъыныгъэ системэм ихэбзэгъэуцугъэ ахэм аукъуагъэмэ ыуп­лъэкIугъ.

Москва щылэжьэрэ компанием монополием пэшIуекIогъэнымкIэ къулы­къум тхьаусыхэ тхылъэу къыфигъэхьыгъэр ары аукционыр зэрэрагъэкIокIыгъэр ауплъэкIуным ушъхьагъоу фэхъугъэр, зэзэгъыныгъэ системэм пылъ хэбзэгъэ­уцугъэр заказчикым ыукъуагъэу ары ащ къытхыгъэр. Ежь компаниер аукционым хэлэжьагъэп.

«Аукционыр шапхъэу щыIэхэм адиштэу рагъэкIокIыгъ, Краснодар щыщ компанием текIоныгъэр къыдихыгъ, ащ уасэ анахь лъагэр процент I9,5-м нэсэу къыригъэхыгъ, монополием пэшIуекIогъэнымкIэ къулыкъум хэукъоныгъэ мы Iофым хилъэгъуагъэп», — къыщаIуагъ къулыкъушIапIэм.

Джырэ уахътэм зэзэгъыныгъэм кIэтхэнхэм лъэныкъохэр фэхьазырых. Ар загъэцэкIэрэ ужым, 2024-рэ илъэсым имэзэе мазэ шIомыкIэу, сэкъатныгъэ зиIэхэр щыIэныгъэм хэгъэгъозэжьыгъэн­хэм фытегъэпсыхьэгъэ техникэр Адыгеим къащэщт.