АР-м иконцертнэ зэхахьэ икамернэ музыкальнэ театрэу Хьанэхъу Адам ыцIэ зыхьырэр спектаклыкIэхэм ягъэуцун дэлажьэ. Театрэм ихудожественнэ пащэу Юныс Сулеймановым къызэриIуагъэмкIэ, Евгений Шварц итхыгъэу «Обыкновенное чудо» зыфиIорэм джырэкIэ Iоф дашIэ. Рольхэр агощыгъахэх, къэзышIыщтхэр агъэнэфагъэх, оркестрэр мэкъамэхэм адэлажьэ.

ЗэрэрахъухьэрэмкIэ жъоны­гъуа­кIэм ыкIэм театрэр зикIасэхэм къэгъэлъэгъоныкIэр апагъо­хыщт. Ащ нэмыкIэу адыгэ лъэпкъым итарихъ нэкIубгъохэм ащыщ фэгъэхьыгъэ IофшIэгъакIэу «Тыр­гъэтау» зыфиIорэр агъэуцу.

— АР-м культурэмкIэ и Министерствэ драматургхэм азыфагу зэнэкъокъу зэхищэгъагъ. Галина Лодяновам ипьесэу «Воительница Тыргъэтау» ащ хэлэжьэгъагъ ыкIи я 3-рэ чIыпIэр къыщыдихыгъагъ. Ащ иIофшIагъ дгъэфедэ­рэр. Меотхэмрэ синдхэмрэ ялъэхъан IофшIагъэм къырегъэлъэгъукIы. Ащ пылъ тарихъыр зэкIэ къэбгъэ­лъэгъошъущтэп, ау авторым IэпэубытыпIэ ышIырэр зы Iахь. Сэ къэгъэлъэгъонымкIэ сырежиссер. КъэзышIыщтхэр дгъэнэфагъэх. Артистхэм ащыгъыщтымкIэ джырэкIэ сурэтхэр ашIых, ащ Даур Людмилэ фэгъэзагъ. Сценографиер Сихъу Рэмэзан ыпшъэ илъ. Мэкъамэхэр композиторэу Андрей Семеновым етхых. Москва щыщ Владислав Старчевскэм усэхэм Iоф адешIэ. Хореографиер Хьаджэе Иланд егъэуцу. Тызэрэгу­гъэрэмкIэ гъэшIэгъо­ны хъущт. Iоныгъо мазэм къэд­гъэлъэгъонэу итэхъу­хьэ, — къытфиIотагъ УФ-м ыкIи АР-м искусствэхэмкIэ язаслуженнэ IофышIэу, АР-м иконцертнэ зэхахьэ икамернэ музыкальнэ театрэу Хьанэхъу Адам ыцIэ зыхьырэм ихудожественнэ пащэу Юныс Сулеймановым.

Ау ащ изакъоп, я 30-рэ лъэхъа­нэу театрэр зыщылажьэрэр мы гъатхэ игъэкIотыгъэу хигъэунэфыкIыщт. Мы лъэныкъомкIи гъэхьазырынхэр макIох.

КъэгъэлъэгъоныкIэхэм зэрадэлажьэрэм дакIоу театрэм инепэрэ IофшIэни лъегъэкIуатэ. Ирепертуар щыщ IофшIагъэхэу, цIыфхэм шIу алъэгъугъэхэр къегъэлъагъох. ГущыIэм пае, Шекспир иIофшIагъэ техыгъэ спектаклэу «Много шума из ничего» зыфиIорэр непэ Мые­къуапэ къыщигъэлъэгъощт. Теат­рэм ар зигъэуцугъэр илъэсипшI хъугъэ. Мэкъамэхэр Александр Гончаровымрэ Михаил Арзумановымрэ атхыгъэх, дирижерэу Аркадий Хуснияровым оркестрэм пае ахэр зэригъэфэжьыгъэх.

— Спектаклыр цIыфхэм агу рехьы. ИлъэсипшI фэдиз хъугъэу къэтэгъэлъа­гъо­ми, цIыфыбэ къеугъои. Адыгеим имызакъоу Урысыем икъэлэ зэфэшъхьаф­хэми тщагъэ, Московскэ, Самарскэ хэкухэм къащыдгъэлъэгъуагъ, — къытфиIотагъ Юныс Сулеймановым.

Хьанэхъу Адам ыцIэ зыхьырэ камернэ театрэр республикэмкIэ анахь цIыфыбэ къэзыугъоирэмэ ащыщ. Ежьхэм ятеатрэ зыхэт концерт къэтыпIэу «Налмэсым» джырэкIэ гъэцэкIэжьынхэр зэрэщыкIохэрэм къыхэкIэу, непэ камернэ музыкальнэр АР-м ифилармоние щэлажьэ. Зы пчэгум купыбэ зэрэщызэдэлажьэрэм къыхэкIэу республикэм икъэлэ шъхьаIэ къыщатырэ къэгъэлъэгъон­хэр агъэмэкIагъэх, ау районхэм дэкIыгъохэр ренэу ащыряIэх.

— Тэ тыздэлажьэрэр цIыфхэм агу рехьы. Артист закъохэп ныIа, оркестрэ псау тигъус. Къытэплъыхэрэм агу ащ лъэшэу ещэфы. ЕтIанэ, тызэблэгъэрэ псэупIэхэм тикъэгъэлъэгъонхэр зыщыкIоу яIэхэм тIысыпIэ къафанэ­рэп. Ары шIу тызэра­лъэ­гъурэр къэзыгъэлъагъорэр. ЦIыфхэр къа­кIохэмэ, ащы­гъум агу тырехьы. Ары зы­хъукIэ тырящыкIагъ, арышъ, нахь дэгъоу Iоф тшIэн, тызэдэлэжьэн фае, — къыддэ­гуа­щэ Юныс Сулеймановыр.

Театрэм ирепертуар закъоп ыгъэбаирэр цIыфэу щылажьэхэрэми ахегъахъо. Мы IофшIэгъу илъэсэу кIорэм нэбгыриплI кIэу ыштагъ. Ахэри непэрэ къэгъэлъэ­гъонхэм ахищагъэхэу Iоф ашIэ.

Анцокъо Ирин. Сурэтхэр: камернэ музыкальнэ театрэр.