Урысыем и ДОСААФ и Гупчэ совет иIэгъэ я 6-рэ пленумым икIыгъэ илъэсым икIэуххэр щызэфахьысыжьыгъэх ыкIи къихьэгъэ 2024-м ягухэлъхэр щагъэнэфагъэх.

[caption id="attachment_144488" align="aligncenter" width="800"] Барцо Т.[/caption]

Зэфэхьысыжьхэм къызэра­гъэлъэгъуагъэмкIэ, зыхэхьэхэрэ купхэм ялъытыгъэу апэрэ ­чIыпIэ къызфагъэшъошагъэхэм Адыгеим и ДОСААФ ахэфагъ ыкIи зэIэпахырэ штандартымрэ шIэжь плакеткэмрэ ащ къыратыгъэх.

Адыгеим и ДОСААФ ипащэу Барцо Тимур гъэзетэу «Адыгэ макъэм» къызэрэфиIотагъэмкIэ, общественнэ-къэралыгъо организациеу ДОСААФ-р цIыфхэр дзэ къулыкъум фэгъэхьазырыгъэнхэмкIэ, дзэ патриотическэ пIуныгъэ ягъэгъотыгъэнымкIэ граждан обществэмрэ УIэшыгъэ КIуачIэхэмрэ зэзыпхыхэрэ лъэныкъоу щыт.

— ХэушъхьафыкIыгъэ дзэ операцием илъэхъан къэралыгъо пшъэрылъэу тиIэхэм екIо­лIэкIэ гъэнэфагъэхэр къафэдгъотынхэ фае. ТиIофшIэн зыфэгъэзэгъэ лъэныкъохэм ащыщхэу гъэсэныгъэ-егъэджэным, патрио­тическэ пIуныгъэм, авиационнэ Iофым, физическэ культурэм ыкIи дзэ спорт лъэпкъ зэфэшъхьафхэм ямэхьанэ нахь зы­къи­Iэтыгъ. Ащ диштэу тэри икIы­гъэ илъэсым тиIофшIэн зэрэдгъэ­псы­щтым ыуж титыгъ ыкIи ти­пшъэрылъхэр икъоу дгъэцэ­кIагъэх, — къыIуагъ Барцо Тимур.

[caption id="attachment_144491" align="aligncenter" width="800"] А. Балабась[/caption]

Зэуж итэу мыгъэ яплIэнэрэу шъолъыр организацием апэрэ чIыпIэр къыдехы. Урысые Федерацием и ДОСААФ икъутамэхэм яIофшIэн лъэныкъуи 8-кIэ уасэ афашIы: зэхэщэн-уставной ыкIи патриотическэ IофшIэнхэр, специалистхэм ягъэхьазырын, физическэ культурэр ыкIи спортыр, авиационнэ, финанс, мылъку Iофхэр, кадрэхэм Iоф адэшIэгъэныр.

[caption id="attachment_144489" align="aligncenter" width="800"] Барцо Т.[/caption]

— Адыгеим икъутамэ зы­хэхьэрэ купым елъытыгъэу а 1-рэ чIыпIэр илъэс зэкIэлъыкIо­хэм къызэрэдихырэм къы­гъэлъагъорэр организацием зыпкъ итэу Iоф зэришIэрэр ары. Мыр сэ сишIушIагъэу щытэп, яIо зэхэлъэу зэрэлажьэхэрэм ар икIэух, — хигъэунэфыкIыгъ шъо­лъыр организацием ­ипащэ.

Барцо Тимур илъэс 14 мэхъу ДОСААФ-м Iоф зыщишIэрэр.

[caption id="attachment_144490" align="aligncenter" width="800"] Барцо Т.[/caption]

Ащ фэдизым къыкIоцI яIофшIэн зэрэзэхэтым хэшIыкI дэгъу фы­риIэ хъугъэ. Джащ фэдэу ар хэдзынхэм алъыплъэгъэнымкIэ Общественнэ штабым хэт, рес­публикэм щызэхащэрэ Iофтхьабзэхэми чанэу ахэлажьэ.

Адыгеим и ДОСААФ тапэкIэ гухэлъышIоу зыдиIыгъхэмкIэ тигущыIэгъу теупчIыгъ.

— БлэкIыгъэ илъэсхэм афэ­дэу тиIофшIэн нахь дэгъоу зэ­рэдгъэцэкIэщтым джыри тыпылъыщт. Пшъэрылъ шъхьаIэу тиIагъэхэри къэнэжьыгъэх, ахэм ащыщ ныбжьыкIэхэр дзэ къулыкъум фэгъэхьазырыгъэнхэр, яхэгъэгу шIу алъэгъоу пIугъэнхэр, дзэ-учет сэнэхьатхэм, спорт лъэпкъ зэфэшъхьафхэм афэгъэсэгъэнхэр. Мыхэм язэшIохынкIэ лъэныкъуабэмэ афэгъэзэгъэ дзэ-патриотическэ клас­тер аэродромэу «Мые­къуапэ (Октябрьский)» зыфи­Iорэм щыдгъэпсыщт. Мыщ фэгъэхьыгъэ тхылъхэр хьазырых. Ау джыдэдэм къушъхьэлъатэхэр зэрэмыбыбыхэрэм къы­хэ­кIыкIэ аэродромым Iоф ышIэрэп. Iофтхьабзэхэм япланэу ти­Iэм къыдыхэлъытагъэу мэфитф егъэджэнхэр мэкъуогъум ехъулIэу зэхэтщэщтых. Къыхэз­гъэщымэ сшIоигъу, сыд фэдэрэ Iофэу етхьыжьэрэмкIи IэпыIэгъу къытфэхъух Адыгеим и ЛIышъхьэу КъумпIыл Мурат, АР-м иминистрэхэм я Кабинет и Тхьаматэу КIэрэщэ Анзаур, Парламентым и Тхьаматэу Вла­димир Нарожнэр, сенаторэу Александр Наролиныр. Зэдэлэжьэныгъэ пытэ зыдытиIэхэм ащыщых АР-м идзэ комиссарэу Александр Авериныр, ветеранхэм я Совет итхьаматэу Къоджэ Аслъан, Адыгеим лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, — къыIуагъ Барцо Тимур.

Iэшъынэ Сусан.