Мыекъуапэ дэт дэпIэ полигонэу «Аврора» зыфиIорэм хэу­шъхьафыкIыгъэ дзэ операциер зырагъэжьагъэм къыщыублагъэу Iоф ешIэ.

Ащ хэлэжьэрэ дзэкIолIхэм ящыкIэгъэ шъошэ ыкIи пкъыгъо зэфэшъхьафхэр дапIэм щадых.

ПстэумкIи пкъыгъо зэфэшъхьаф 50-м ехъу ащ щагъэхьазыры. Республикэ грантэу сомэ миллионрэ мин 200-у къырахыгъэм ишIуагъэкIэ яIофшIэн хагъэхъон алъэкIыгъ. Мы уахътэм дэпIэ полигоным проектэу «Аврора» зыфиIорэм ипащэу Александр Плужниковым Iоф дешIэ. ДэпIэ полигоным ­«Адыгэ макъэр» щыIагъ, иIофшIэн зэригъэлъэгъугъ.

Мы чIыпIэм апэрэп тызэрэщыIагъэр, икIыгъэ илъэсми ащ иIофшIэн зыщыдгъэгъозагъэу щыт. Шъугу къэдгъэкIыжьын, дэпIэ полигоныр зэхэзыщагъэр Мыекъуапэ щыпсэурэ гумызэгъэ бзылъфыгъэу, сабыищмэ янэу, гукIэгъумрэ IэпыIэгъумрэ пстэуми апэ изыгъэшърэ Марина Точисскаяр ары. Мыщ ишъхьэгъусэ мобилизацием хафи хэу­шъхьафыкIыгъэ дзэ операцием зэкIом, рэхьатэу щымысэу IэпыIэгъу зэрафэхъущтым егупшысагъ.

— Сэщ фэдэ бзылъфыгъэ гуфакIохэм тызэхахьи, лъэпэдхэр тхъыхэу, паIохэр, ныбалъэ­хэр тыдыхэу тыфежьагъ. Мые­къуапэ и Гупчэ къэлэ тхылъеджа­пIэ къотэгъу къытфэхъуи, ащ тыщызэрэугъоищтыгъ. Ау тидзэ­кIолIхэр къызыкIэлъэIухэрэми ахахъуи, тиIоф нахь зиушъомбгъунэу хъугъэ ыкIи унэ шъхьаф тыкощыжьыгъ. ПаIохэр, пшъэмрэ бгъэмрэ зыгъэфабэхэрэр, ныбалъэхэр, свитерхэр, балаклав­хэр, снудхэр, щэ-гынхэр, Iашэхэр зэралъхьащтхэ Iалъмэкъхэр апэ афэтыдыщтыгъэх. Джы грантым къыкIэкIогъэ мылъкум ишIуагъэ­кIэ тызэрыдэрэ машинки 3 ыкIи шэкI Iужъухэр зэдгъэгъотыгъэх. Арышъ, кIымэфэ лъэхъаным ящыкIэгъэ шъуашэхэри, нэмыкI пкъыгъохэри афэтыдынхэ амал тиIэ хъугъэ, — къыIуагъ Марина Точисскаям.

ДэпIэ полигоным зызеушъом­бгъум, адырэ пкъыгъохэм ахагъэхъуагъ бронежилетхэр ыкIи тепловизорым щызыухъумэхэрэ чыхIэнхэр. Зэрыдэхэрэ машинкакIэу ащэфыгъэхэм яшIуагъэкIэ адырэ пкъыгъохэм язытет бэкIэ нахь дэгъу хъугъэ. ЫпэкIэ адыщтыгъэхэр зэIуагъакIэхэмэ, хэу­шъхьафыкIыгъэ дзэ операци­ем зэрэрагъащэщтыгъэм фэмыдэу, дзэкIолIхэм нахь ящыкIагъэу къызкIэлъэIухэрэр афагъэ­хьазырых. Адыгеим икIыгъэ дзэкъулыкъушIэхэм ямызакъоу, Урысыем ишъолъырхэм зэкIэми ащыщхэр къяуалIэх ыкIи ахэр къафэразэхэу мыщ чIэкIыжьых.

— Пшъэрылъ шъхьаIэу зы­фэтшIыжьыгъагъэр хэушъхьа­фыкIыгъэ дзэ операцием щыIэ дзэкъулыкъушIэхэм, апэрапшIэу, зэрафэгумэкIыхэрэр, зэращымыгъупшэхэрэр агурыдгъэIоныр ыкIи ящыкIэгъэ шъуашэхэр ежьхэмкIэ нахь гупсэфэу, шэп­хъэшIухэм атетэу афэтыдынхэр, тифэбагъэ алъыдгъэIэсыныр арыгъэ. Ар джы къыддэхъугъэу сэлъытэ, джыри тапэкIэ амалэу щыIэхэр дгъэфедэхэзэ а IофшIэныр лъыдгъэкIотэн гухэлъ тиI, — хигъэунэфыкIыгъ Марина Точисскаям.

Проектэу «Аврора» зыфиIо­рэм ипащэу Александр Плужниковым къызэриIуагъэмкIэ, лъэныкъуищмэ афэгъэзагъэхэу мэлажьэх.

— Тактическэ шъуашэхэм яушэтын, тактическэ медицинэм фегъэджэгъэнхэр, щэрыохэрэм ащызыухъумэхэрэ гъэбылъыгъэ ныбалъэхэм ягъэхьазырын ыуж тит. Ахэр дзэ часть зэфэшъхьаф­хэм ащытэушэтых, дзэкIолIхэм нахь тэрэзэу, гупсэфэу алъы­тэ­хэрэр къыхэтэхых. Проектэу пхырытщыхэрэм джыри зы шIэ­хэу къахэхъощт, ау ащ ышъхьэ джыдэдэм къитхыгощтэп, — къыIуагъ Александр Плужниковым.

ТекIоныгъэр шIэхэу къызэ­рэ­дахыщтым, псаоу узынчъэхэу яунэхэм къызэрагъэзэжьыщтым яцыхьэ телъэу Урысыем щыпсэу­хэрэр зэкъохьагъэхэу мамыр щыIакIэ тиIэным фэбэнэрэ дзэ­кIолIхэм зэрафэлъэкIэу IэпыIэгъу афэхъух. Ахэм ащыщ дэпIэ полигонэу «Аврора» зыфиIорэр. ИIофшIэн зиублагъэм къыще­гъэжьагъэу ащ пкъыгъо зэфэшъхьафэу мини 5-м ехъу дзэ­къулыкъушIэхэм афарагъэщагъ.

Iэшъынэ Сусан.