ЦIыфхэм ящыIэкIэ-псэукIэ зыкъиIэтыгъ
Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм игъэцэкIэн пае гъэрекIо сомэ миллион 2200-рэ къыхагъэкIыгъагъ.
Зигугъу къэтшIыгъэ лъэпкъ проектым диштэу гъогухэр апкIагъэх, инфраструктурэр агъэкIэжьыгъ, шъолъыр гъогухэм IэрышI псэуалъэу атетхэр агъэцэкIэжьыгъэх, республикэм зекIонымкIэ ипсэуалъэхэм якIолIэрэ гъогухэм яшIын лъагъэкIотагъ, видеокамерэхэм яшIуагъэкIэ гъогурыкIоныр нахь щынэгъончъэ хъугъэ.
ГущыIэм пае, шъолъыр гъогухэмкIэ километрэ 82-р зэтырагъэпсыхьагъ, ипIалъэм къыпэу гъогу километрэ 24,9-рэ агъэкIэжьыгъ. Метри 140-рэ зикIыхьэгъэ лъэмыджхэр агъэцэкIэжьыгъэх. ГъогурыкIонымкIэ шапхъэхэр зэраукъохэрэр къэзыгъэлъэгъорэ видеокомплекс 16 агъэуцугъ. Шъолъыр гъогухэм автомобильхэр зыщащэчырэ автоматическэ пунктитIу атырагъэуцуагъ. Муниципальнэ образованиеу «Къалэу Мыекъуапэ» иавтомобиль гъогу километрэ 11-рэ муниципальнэ образованиеу «Яблоновскэ къэлэ псэупIэм» иавтомобиль гъогу километри 4-рэ федеральнэ шапхъэхэм адиштэу зэтырагъэпсыхьагъэх.
Адыгэ Республикэм и ЛIышъхьэу КъумпIыл Мурат ителеграм-канал мырэущтэу ритхагъ: «ШэпхъэшIухэм адиштэу гъогухэр щытынхэм тегъэпсыхьэгъэ проектым ипхырыщынкIэ, транспорт инфраструктурэм зегъэушъомбгъугъэнымкIэ УФ-м и Президентэу Владимир Путиным пшъэрылъэу къыгъэнэфагъэхэм ягъэцэкIэнкIэ федеральнэ гупчэр IэпыIэгъу къызэрэтфэхъурэм пае лъэшэу тыфэраз. Республикэм ипащэхэм социальнэ лъэныкъом, гъогу инфраструктурэм хэхъоныгъэ ягъэшIыгъэным, псэупIэ-коммунальнэ хъызмэтыр джырэ шапхъэхэм адиштэу зэтегъэпсыхьэгъэным япхыгъэ Iофыгъохэм сыдигъуи лъэшэу анаIэ атырагъэты. Лъэпкъ проектым къызэрэщыдэлъытагъэу, республикэм гъогухэм ягъэцэкIэжьынкIэ 2024-рэ илъэсым телъытэгъэ планыр непэкIэ ыгъэцэкIэгъах».
ГущыIэм пае, гъогухэр псынкIэу зэрагъэцэкIэжьхэрэм ишIуагъэкIэ 2023-рэ илъэсым икIэуххэмкIэ шъолъыр мэхьанэ зиIэ автомобиль гъогухэм япроцент 63,8-р шэпхъэшIухэм адиштэу зэтырагъэпсыхьагъ. ПланымкIэ автомобиль гъогухэм япроцент 60,1-рэ зэтырагъэпсыхьажьынэу щытыгъэр.
Гъогу инфраструктурэм изытет нахьышIу зэрашIырэм дакIоу гъогухэр щынэгъончъэнхэмкIэ Iофтхьэбзэ зэфэшъхьафхэри республикэм щызэрахьэх. Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм ишIуагъэкIэ мы къэралыгъо пшъэрылъыр республикэм щыгъэцэкIагъэ мэхъу.