Проектыр зэфашIыжьыгъ
Мыекъопэ къэралыгъо технологическэ университетым проектэу «ГъэсакIом исыхьат» зыфиIорэм изэфэшIыжьын фэгъэхьыгъэ Iофтхьабзэ щыкIуагъ, ныбжьыкIэ проектхэм я Урысые зэнэкъокъоу «Росмолодежь гранты: Микрогранты» зыфиIорэр ащ IэпыIэгъу къыфэхъугъагъ.
НыбжьыкIэ IофыгъохэмкIэ Адыгэ Республикэм и Комитет итхьаматэу Сергей Галушкинымрэ Мыекъопэ къэралыгъо технологическэ университетым ныбжьыкIэ политикэмкIэ ипроректорэу БрантI Муратрэ шIуфэс гущыIэхэмкIэ Iофтхьабзэм хэлажьэхэрэм закъыфагъэзагъ.
Проектым къыдыхэлъытагъэу студентхэм апае гъэсакIохэм ясистемэ дэгъоу зэтырагъэпсыхьагъ, апэрэ курсым къычIэхьэгъэ нэбгырэ 1100-рэ еджэным хагъэгъозагъэх. Ахэр бакалавриатымрэ специалитетымрэ япрограммэхэмкIэ факультети 10-мэ ащеджэх. ГъэсакIохэм яIофшIэн мыщ фэдэ лъэныкъохэмкIэ агъэцэкIагъ: апэрэ курсым къычIэхьагъэхэр апшъэрэ еджапIэм ищыIакIэ щыщ шIыгъэнхэр, гъэсакIохэм ясистемэ ыкIи зэкIэлъыкIокIэ хабзэр студенческэ зыгъэIорышIэжьыным хэлъхьэгъэныр, IэкIыбым къикIыгъэ студентхэр джащ фэдэу апшъэрэ еджапIэм ищыIакIэ хэгъэгъозэгъэнхэр, еджапIэм щеджэрэ студентхэм ашъхьэкIэ хэхъоныгъэ ашIышъуным къыфэщэгъэнхэр.
ГъэсакIохэм якорпус Мыекъопэ къэралыгъо технологическэ университетым зыщатIупщыгъэр 2022-рэ илъэсыр ары. Я 2 — 6-рэ курсхэм ащеджэрэ студент нэбгырэ 16-мэ гъэсэкIо сэнэхьатыр агъэцэкIагъ, апэрэ курсым иакадемическэ купхэм афэсакъыгъэх. Илъэс IофшIэным зэфэхьысыжьышIухэр къыкIэлъыкIуагъэх: факультети 10-мэ гъэсэкIо 73-рэ къахэкIыгъ, апэрэ курсым щеджэрэ студент 350-рэ апшъэрэ еджапIэм иIофыгъохэм чанэу ахагъэлэжьагъэх, 2023 — 2024-рэ илъэс еджэгъум иапэрэ семестрэ апэрэ курсым щеджэхэрэм зэIукIи 116-рэ адыряIагъ, деканатмэ апшъэ дэлъыгъэ Iофыр нахь макIэ ашIышъугъ, академическэ куп 41-рэ зэлъаубытыгъ, апэрэ курсым щеджэхэрэм ямафэхэр щытхъу пылъэу рагъэкIокIыгъэх, къалэм щымыщ студентхэм экскурсиехэмрэ зэхэт зэIукIэхэмрэ афызэхащагъэх.
Ахэм афэшъхьафэу, форумхэм ыкIи Iофтхьабзэхэм гъэсакIохэм якорпус хэлэжьагъ, шъолъыр форумэу «О уикIогъу» зыфиIорэр ахэм ащыщ, студент 900 ащ къыхырагъэубытагъ. Джащ фэдэу гъэсакIохэм апэрэ сессием студентхэр фагъэхьазырыгъэх.
Апэрэ илъэсым гъэсакIохэм якорпус МКъТУ-м Iоф зэрэщишIагъэм къыгъэлъэгъуагъ системэм мэхьанэ зэриIэр, политическэ зыпкъитыныгъэ зыщыщымыIэ уахътэм ныбжьыкIэхэмкIэ IэпыIэгъушIоу ар зэрэхъурэр, ящыкIэгъэ шъыпкъэу зэрэщытыр.