Псауныгъэр гъэпытэгъэным фытегъэпсыхьэгъэ IофшIэныр анахь дэгъоу зыщызэхащэрэ муниципальнэ образованиехэр гъэунэфыгъэнхэмкIэ яплIэнэрэ республикэ зэнэ­къокъу Мыекъуапэ щыкIуагъ. Адыгеим икъалэхэр ыкIи ирайонхэр зэкIэ ащ хэлэжьагъэх. 2023-рэ илъэсым мы лъэныкъомкIэ Iофэу ашIагъэм, япшъэрылъхэр зэрэзэшIуахыгъэм афэгъэхьыгъэ докладхэр къашIыгъэх, лъэтегъэуцохэр зэхащагъэх. ИIофшIэн анахь дэгъоу ыгъэцэкIагъэу къы­хагъэщыгъ Мыекъуапэ физическэ культу­рэмкIэ ыкIи спортымкIэ и Комитет. Ащ итхьа­матэу Дмитрий Щербаневым къызэри­Iуагъэм­кIэ, мыщ фэдэ зэфэхьысыжь дэгъу ­яIэнымкIэ зишIуагъэ къэкIуагъэр тренерхэм, физическэ культурэмкIэ кIэлэегъаджэхэм, нэмыкIхэм яIо зэхэлъэу зэрэзэдэлэжьагъэхэр ары. ЯтIонэрэ чIыпIэр Красногвардейскэ районым ыхьыгъ, Адыгэкъалэ ящэнэрэ хъугъэ. ХагъэунэфыкIырэ чIыпIэхэр къыдэзыхыгъэхэм кубокхэр, дипломхэр ыкIи медальхэр афагъэшъошагъэх.