Агъэмысагъ
Интернетым инэкIубгъохэмкIэ террористическэ нэшанэ зиIэ Iофыгъохэм зэрахэлэжьагъэм фэшI Адыгеим щыщ хъулъфыгъэм къыфызэIуахыгъэ уголовнэ Iофым хэплъагъэх. Унашъоу ашIыгъэм кIуачIэ иIэ хъугъэ.
ЩынэгъончъэнымкIэ федеральнэ къулыкъум иIофышIэхэм оперативнэ-лъыхъун Iофтхьабзэу зэхащагъэхэм къакIэлъыкIоу зэрагъэунэфыгъэмкIэ, Кощхьэблэ районым щыпсэурэ илъэс 40 зыныбжь Р. А. Зыхьэм социальнэ хъытыумкIэ дунэе террористическэ организациеу «Ислъам къэралыгъор» зыфиIорэм (Урысыем щигъэзыягъ) иIофшIэн дыригъэштагъ ыкIи хэбзэухъумэкIо къулыкъухэм яIофышIэхэу ислъам диныр зымылэжьыхэрэм террористическэ ыкIи экстремистскэ нэшанэ зиIэ бзэджэшIагъэ адызэрахьанэу быслъымэнхэм къяджагъ.
ЩынэгъончъэнымкIэ федеральнэ къулыкъум къыугъоигъэ материалхэмкIэ Р. А. Зыхьэм ылъэныкъокIэ уголовнэ Iофэу къызэIуахыгъэр зэхафыгъ.
Къыблэ шъолъыр дзэ хьыкумым иунашъокIэ Р. А. Зыхьэр агъэмысагъ ыкIи тазырэу сомэ мин 800 тыралъхьагъ. Джащ фэдэу илъэси 2-рэ мэзи 6-рэ пIалъэкIэ Интернетым нэкIубгъохэр къыщызэIуихын фимытэу унашъо фашIыгъ.
Унашъом кIуачIэ иIэ хъугъэ.
ЩынэгъончъэнымкIэ федеральнэ къулыкъум ипресс-къулыкъу