«ЦIыф шъыпкъ» аIоу бэрэ зэхэтэхы. ЦIыф­хэм апае Iофышхо зышIагъэр ыкIи зышIэрэр, зэфагъэр ыкIи шIур зигъогогъур ары ар зыфаIорэр.

IэнатIэу ыIыгъым емылъытыгъэу, къулыкъушIэ пэпчъ ипшъэ­рылъхэр щытхъу хэлъэу ыгъэцэкIэнхэ фае. Уголовнэ-гъэцэкIэкIо системэм иветеранэу, бзэджашIэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Республикэм щыIэм и Общественнэ совет итхьаматэу, полковникэу Владимир Аведовым ежь ипэщагъэу, милицием иполковникэу ХъутIыжъ Азмэт ыгу къегъэкIыжьы.

ЦIыф шъыпкъ

Синасып къыхьи, зыфэдэ щымыIэ цIыф шIагъоу, цIыф къызэрыкIоу, милицием иполковникэу ХъутIыжъ Азмэт Iоф дэсшIэнэу хъугъэ. Зэфагъэ хэ­лъэу къулыкъушIэ пэпчъ лъы­тэныгъэ зэрэфишIыщтыгъэм, ошIэ-дэмышIэ Iофхэр къэхъумэ, рэхьатныгъэ къызэрэзхигъа­фэ­щтыгъэм яхьатыркIэ агъэ­лъэ­пIэрэ ыкIи щысэтехыпIэу щыт пащэхэм ащыщыгъ.

Азмэт Къэншъао ыкъор 1930-рэ илъэсым мэкъуогъум и 5-м Теуцожь районым итыгъэ къуа­джэу Ленинэхьаблэ къыщыхъугъ. ЩынэгъончъэнымкIэ къулыкъум, хэгъэгу кIоцI къулыкъум ащылэжьагъ. СССР-м щынэгъончъэнымкIэ федеральнэ Министерствэм епхыгъэу Харьков дэт оперативнэ еджапIэр, СССР-м хэ­гъэгу кIоцI IофхэмкIэ и Апшъэрэ еджапIэ къыухыгъэх. Хэгъэгу кIоцI къулыкъум уголовнэ лъы­хъуным иоперуполномоченнэу ригъажьи, Краснодар краим хэхьэрэ Адыгэ автоном хэкум оперативнэ IофшIэнымкIэ хэ­гъэгу кIоцI къулыкъум ипащэ игуадзэу Iоф ышIагъ, мы Iэ­натIэм Iутызэ 1986-рэ илъэсым пенсием кIуагъэ. Непэ ар хэгъэгу кIоцI къулыкъум ыкIи къулыкъум идзэхэм яветеранхэм я Адыгэ республикэ общественнэ организацие и Совет ипащ.

Зигъэпсэфынэу зэтIысыжьми Азмэт Къэншъао ыкъом ренэу зыIузгъакIэщтыгъ, зыфэдэ сыримыхьылIэгъэ цIыф къызэрыкIом ыкIи пэщэ дэгъум удэгущыIэ хъумэ, гухахъо хэогъуатэ. Тэ, ащ ыпIугъэхэм, щысэтехыпIэу тиIагъэр непэ къызнэсыгъэм тщыгъупшэрэп.

АР-м хэгъэгу кIоцI IофхэмкIэ и Министерствэ изаслуженнэ IофышIэу, полковникэу Ма­мыекъо Кимэ гуфэбэныгъэшхо хэлъэу къулыкъу зыщихьыгъэ лъэхъаныр ыгу къегъэкIыжьы. — А лъэхъаным полковникэу ХъутIыжъ Азмэт Къэншъао ыкъор сипащэу Iоф сшIагъэ. Ащ гъэшIуабзэкIэ «наш дед» етэIо, милицием иIофышIэхэр зэкIэ джары Азмэт Къэншъао ыкъом зэреджэщтыгъэхэр. Къулыкъу­шIэхэм полковникэу ХъутIы­жъым доклад фашIынэу ыдэжь кIохэ зыхъукIэ, «мэхьанэ зиIэ Iоф зэхэсфынэу дед дэжь сэ- кIо» аIощтыгъ, — ыгу къэ­кIы­жьы Мамыекъо Кимэ.

— ШъхьэкIэфэшхо зэрэфа­шIырэм ар ишыхьатыгъ. Ипа-щэу, полковникэу ХъутIыжъым фэдэ хъу шIоигъоу Мамыекъо Кимэ щысэ ащ тырихыщтыгъ. Пащэу «дедым» ыIорэм тетэу ыкIи шэн гъэтIылъыгъэ иIэу зэрэщытыгъэр милиционерэу Мамыекъом къыщигъэлъэгъуагъ грузин-абхъаз зэпэуцужьэу щы­­Iагъэм. Боевикхэр щынэ зымышIэрэ дзэ­кIолIэу  Хъу­тIыжъ Азмэт ыпIугъэм пэуцужьынхэ алъэкIыгъэп ыкIи Ким Сэлымчэрые ­ыкъом ишIуа­гъэкIэ лIыблэнагъэ зыхэлъ тикIалэхэу гъэ­ры ашIыгъагъэ­хэм Адыгеим зэрифэ­шъуашэу ща-пэ­гъо­кIы­жьы­гъэх. Полковникэу Ма­мые­къо Кимэ зэрилъытэрэмкIэ, иIофшIэнкIэ къыдэхъугъэр зэкIэ ХъутIыжъ Азмэт ишIушIагъ.

Ежь Азмэт Къэншъао ыкъор ыгъэсагъэхэу, хэгъэгу кIоцI къулыкъум Iоф щызышIэхэу, гъэхъагъэхэр зышIыгъэхэм лъэ­шэу арыгушхощтыгъ. Милицием ирядовоеу ригъажьи, полковникэу,

Теуцожь районым имилицие ипащэу Iоф ышIагъ. Адыгеим имызакъоу, Красно- дар краим IэнэтIэшхохэр ащи­Iыгъыгъ.

Милицием игенерал-лейтенантхэу Евгений Полуниным, Михаил Крапивнэм, АдыгеимкIэ хэгъэгу кIоцI къулыкъум и ГъэIорышIапIэ ипащэщтыгъэу Александр Поддубнэм, нэмыкIыбэхэми ХъутIыжъ Азмэт лъытэныгъэшхо къыфашIыщтыгъ.

НэмыкI шъолъырхэми ащ игугъу дахэкIэ ащашIы.

— Илъэс бэкIаерэ Краснодар краим имилицие Iоф щысшIагъ ыкIи Адыгеим имилицие иоперативнэ аппарат ипащэу Iоф зышIэгъэ ХъутIыжъ Азмэт Къэншъао ыкъом икъэбар дэгъоу сыщыгъуазэу щытыгъ. Арыти, бэрэ семыгупшысэу Краснодар сыкъикIи IофшIапIэкIэ Адыгеим сыкъэкIуагъ. Мыщ фэдэ офицер сипащэу Iоф сшIэныр сэркIэ насыпыгъэу щытыгъ, — къыIуагъ милицием иполковникэу Анатолий Боковоим.

Мы лъэхъаным Азмэт Къэншъао ыкъор пенсием щыI нахь мышIэми, Адыгеим иполицие иветеранхэм яорганизацие пэщэныгъэ дызэрехьэ. Сыдигъуи зэрэщытыгъэм фэдэу непи къулыкъушIэхэм ыкIи вете­ранхэм Азмэт зыкъыфагъазэ, упчIэжьэгъу ашIы. Ежьыри игуа­пэу IэпыIэгъу зэрафэхъущтым пылъ, джэуапынчъэу зыпари къыгъанэрэп.

Полковникэу ХъутIыжъ Азмэт Къэншъао ыкъом шIур ыкIи шъыпкъагъэр игъогогъухэу Хэгъэгум къулыкъур фехьы, шъхьэ­кIэфэныгъэр къылэжьыгъ. ИкIэ­рыкIэу къулыкъум Iоф щысшIэнэу хъугъагъэемэ, милицием иполковникэу ХъутIыжъ Азмэт сипэщэнэу сыфэягъ.

Урысыем иуголовнэ лъы­хъун системэ иIофышIэ гъэшIуагъэу, СССР-м и МВД изаслуженнэ IофышIэу, хэгъэгу кIоцI къулыкъум иполковникэу отставкэм щыIэ Владимир Аведовыр.

Сурэтыр: «Адыгэ макъэм» ихъар­зынэщ.