ЗэрэзэдэлэжьэщтхэмкIэ лъэныкъуищ зэзэгъыныгъэм Мыекъопэ къэралыгъо технологическэ университетыр дыкIэтхагъ Санкт-Петербург къэралыгъо педиатрическэ ме­дицинэ университетым. Ащ фэгъэхьыгъэ тхылъым аIапэхэр кIа­дзагъэх къэралыгъо педиатрическэ медицинэ университетым иректорэу Дмитрий Ивановым, псауныгъэр къэухъумэгъэнымкIэ Адыгэ Рес­публикэм иминистрэу Мэрэ­тыкъо Рустем ыкIи МКъТУ-м иректорэу Къуижъ Саидэ. Зэзэгъыныгъэм къыделъытэ Адыгеим пае IофышIэхэр гъэ­хьазырыгъэнхэр, Санкт-Петербург къэралыгъо педиатриче­скэ медицинэ университетым ишIэныгъэлэжь-кIэлэегъэджэ куп МКъТУ-м и Мединститут иIоф­шIэн къыхэгъэлэжьэгъэныр. До­кументым джащ фэдэу зэрэратхагъэмкIэ, МКъТУ-м педиат­риемкIэ ифакультет истудентхэм педиатрие IэзапIэу Санкт-Петер­бург педиатрическэ университетым хахьэрэм зыщаушэтын алъэкIыщт. Ащ ишIуагъэкIэ сэнэхьатыр зэзыгъэгъотырэмэ ап­шъэрэ технологиеу ыкIи непэрэ медицинэ шэпхъэшIухэу педиатрием иIэхэр зэрагъэшIэщтых. Санкт-Петербург къэралыгъо педиатрическэ медицинэ университетыр загъэпсыгъэр илъэс 99-рэ зыщыхъугъэ ма­фэхэм атефэу зэзэгъыныгъэм кIэтхагъэх. Зэрэзэдэлажьэхэрэм ыкIи IэпыIэгъу къазэра­фэхъурэм пае Къуижъ Саидэ университетым иректор «тхьауегъэпсэу» ри­Iуагъ, апшъэрэ еджапIэм щылажьэхэрэм ямэфэкIкIэ афэгушIуагъ. ПедиатриемкIэ университетыр — дунаимкIэ апшъэрэ педиат­рие еджэпIэ анахьыжъэу щыт. Ащ чIэс студентхэмрэ кIэлэегъа­джэхэмрэ урысые ыкIи дунэе зэнэкъокъухэм ялауреатых, пре­миехэр къафагъэшъошагъэх. КIэлэцIыкIу клиническэ сы­мэджэщэу Санкт-Петербург къэралыгъо педиатрическэ ме­дицинэ университетым ха­хьэрэр федеральнэ медицинэ Iоф­шIапIэу игъэкIотыгъэ шIэныгъэ лъапсэ зиIэу гъэпсыгъэ. Сымэджэщым щылэжьэрэ врачхэм технологиякIэхэр яIофшIэн хагъахьэх. Апшъэрэ еджапIэм кафедрэ 60, отделение 50 хэт. Гъэ къэс ащ щылажьэхэрэм операцие мин 15 ашIы. МКъТУ-м ипресс-къулыкъу