Адыгэ Республикэм и ЛIыкIо гъэIорышIапIэу Урысые Федерацием и Президент дэжь щыIэм илъэс пчъагъэ хъугъэу ипшъэрылъхэр зэрифэшъуашэу егъэцакIэх. Адыгеим икIыхэу Iоф зэфэшъхьафхэм япхыгъэу Урысыем икъэлэ шъхьаIэ кIохэрэм ащыщыбэ ащ къеуалIэ. ГъэIорышIапIэм ипащэ ипшъэрылъхэр зыгъэцэкIэрэ Фатима Романовам бэмышIэу гущыIэгъу тыфэхъугъ. 2023-рэ илъэсым Iоф зэрашIагъэр ыкIи илъэсыкIэм пшъэрылъэу зыфагъэуцужьыхэрэр ащ къытфиIотагъэх.

— Илъэсым къыкIоцI лъэныкъо зэфэшъхьафхэмкIэ пшъэрылъэу къытфагъэуцугъэр зэкIэ дгъэцэкIагъэ. Ыпэрэ илъэсхэм афэдэу анахь тынаIэ зытеты­гъэр республикэм ифедэ­хэр гъэцэкIэкIо ыкIи хэбзэгъэуцу федеральнэ къулыкъухэм къащыдгъэлъэгъоныр, шъолъырхэм зэпхыныгъэу адытиIэм зегъэушъомбгъугъэныр, инвестицие тедзэхэр Адыгеим къыхалъхьанхэр, социальнэ-культурнэ амалэу республикэм IэкIэлъхэр лъыгъэкIотэгъэнхэмкIэ общественнэ мэхьанэ зиIэ IофшIэнхэр зэхэтщэнхэр ары, — еIо Фатима Романовам.

Адыгеим щыщхэу Москва щеджэрэ студентхэм амалэу щыIэмкIэ IэпыIэгъу афэхъух, ясэнэхьаткIэ практикэ зыщахьыщтыр къафэгъотыгъэнымкIэ, мастер-классхэр зэхэщэгъэнымкIэ яшIуагъэ бэрэ арагъэкIы. Хабзэ зэрэхъугъэу, ныбжьыкIэхэм яэстетическэ ыкIи патриотическэ пIуныгъэ епхыгъэ Iоф­шIэнхэр ренэу ретэгъэкIокIых.

— НыбжьыкIэ чанхэр тиIэх, гухэлъ гъэшIэгъонхэр зыдаIыгъ, ахэр щыIэныгъэм щыпхыращынымкIэ амалэу щыIэмкIэ IэпыIэгъу тафэхъу. Адыгеим истудентхэм я Ассоциациеу ти ЛIыкIо гъэIорышIапIэ щызэхэщагъэм Урысыем икъэлэ шъхьаIэ щеджэрэ ныбжьыкIэхэр зэфещэх, ныбджэгъуныгъэ азыфагу илъ. Зэхэхьэ гъэшIэгъонхэр ахэм ашIых, адыгэ культурэм, адыгэ шэн-хабзэхэм афэгъэхьыгъэуи IофшIэны­шхо зэшIуахы. Адыгеим имызакъоу, ткъош Къэ­бэртэе-Бэлъкъар ыкIи Къэрэщэе-Щэрджэс рес­публикэхэм ащыщ ныбжьыкIэхэри, ежь Москва дэсхэри зэхахьэхэм къякIуалIэх, — еIо тигущыIэгъу.

ГъэIорышIапIэм проект зэмылIэужыгъохэр зэшIуехых, социальнэ ыкIи культурнэ мэхьанэ ахэм яI. Илъэс заулэ хъугъэу адыгабзэм ыкIи къэ­бэртэябзэм язэгъэшIэнкIэ курс­хэр мыщ щызэхащэх. Адыгабзэр икъу фэдизэу зымышIэхэрэр ахэм къякIуалIэх, тхьамафэм щэгъогогъо егъэджэнхэр афызэхащэх. КъэIогъэн фае аужырэ илъэсхэм Адыгеим щыщэу Мос­ква щеджэнэу кIохэрэм зэхапшIэу зэрахэхъуагъэр, апшъэ­рэ еджэпIэ анахь дэгъухэм ахэр ачIахьэх, сэнэхьат зэфэшъхьафхэр зэрагъэгъотых.

Джащ фэдэу шъолъыр общественнэ организациехэм ЛIыкIо гъэIорышIапIэр чанэу адэлажьэ. Советскэ Союзым и ЛIыхъужъхэм афэгъэхьыгъэ социальнэ мэхьанэ зиIэ проектхэм, ТекIо­ны­гъэм и Мафэ фэгъэхьыгъэ мэфэкI зэхахьэхэм ыкIи нэ­мыкIхэм чанэу ахэлажьэх. Ащ нэмыкIэу концертхэм, фестивальхэм, литературнэ пчыхьэзэхахьэхэм, къэгъэлъэгъонхэм язэхэщэнкIэ IэпыIэгъу афэхъух.

ГъэрекIо мэхьанэшхо зиIэ Iофтхьэбзэ пчъагъэмэ ахэлэжьагъэх. Ахэм ащыщ Московскэ къэралыгъо консерваториеу П. И. Чайковскэм ыцIэкIэ щытым хэт залэу Рахманиновым ыцIэ зыхьырэм мэкъуогъум и 30-м щыкIогъэ культурнэ проектэу «Этно и классика» зыфиIорэм илъэтегъэуцо. Адыгэ Респуб­ликэм и ЛIыкIо гъэIорышIапIэрэ Хакасием иемрэ ащ кIэщакIо фэхъугъэх. Москва лъэпкъ политикэмкIэ ыкIи шъолъыр зэпхыныгъэхэмкIэ и Департамент IэпыIэгъу къафэхъугъ. Адыгэ Республикэм ыкIи Республикэу Хакасием культурнэ ыкIи туристическэ баиныгъэу яIэхэр Iоф­тхьабзэм къекIолIагъэхэм арагъэлъэгъугъ.

Дунэе къэгъэлъэгъон-форумэу «Урысыер» зыфиIорэр зыкIыныгъэм и Мафэ ехъулIэу Москва къыщызэIуахыгъагъ, мэзихрэ ащ Iоф ышIэщт. Урысые Федерацием исубъектхэр зэкIэ мыщ къы­щагъэлъагъо, корпорацие анахь инхэр, федеральнэ структурэхэр, общественнэ организациехэр хэлажьэх. Адыгеим ыгъэпсыгъэ чIыпIэр пстэуми ашIогъэшIэгъон, цIыф кIуапIэу щыт. Ащ игъэхьазырын республикэ ЗэхэщэкIо комитетым хэтэу ЛIыкIо гъэIорышIапIэр дэлэжьагъ.

Адыгэ Республикэм и ЛIыкIо гъэIорышIапIэу Урысые Федерацием и Президент дэжь щыIэм илъэсыр зэрифэшъуашэу ыгъэ­кIотэжьыгъ, рахъухьагъэр зэкIэ къадэхъугъ. Мы къихьэгъэ илъэ­сым яIофшIэн хэхъоныгъэхэр езыгъэшIыщт гухэлъыкIэхэр бэу яIэх. АР-м и ЛIышъхьэу КъумпIыл Мурат, АР-м иминистрэхэм я Кабинет къагъэуцурэ пшъэ­рылъхэр агъэцэкIэщтых. Ыпшъэ­кIэ зигугъу къэтшIыгъэ IофшIэнхэм ямызакъоу, ЛIыкIо гъэIорышIапIэм Адыгэ Республикэм икультурэ зэлъягъэшIэгъэнымкIи Iофышхо ешIэ.

— КъытэуалIэхэрэм зэкIэми амал зэрэтиIэу IэпыIэгъу тафэхъу. Рес­публикэм къикIыхэрэм ащыщыбэм мыр яятIо­нэрэ унэу щыт. 1999-рэ илъэсым Москва апэрэу сыкъызыдахьэм мыщ сыкъэкIогъагъ, ау сыкъы­чIэхьанэу синасып къыхьы­гъагъэп. Ар сыгу къинэжьыгъ, шIоигъоныгъэ зиIэу къеблагъэхэрэм зэкIэми типчъэхэр афызэIухыгъэх, кIэлэеджа­кIохэри къытфащэу, экскурсие ядгъэшIэу бэрэ къы­хэкIы. Джащ фэдэу зыныбжь имыкъугъэхэм яIэзэнхэу Москва къызыкIохэкIэ, IэпыIэгъу тафэхъу. АР-м и ЛIышъхьэу КъумпIыл Мурат мы лъэныкъом лъэшэу ынаIэ тет, — еIо Фатима Романовам.

Адыгэ Республикэм и ЛIыкIо гъэIорышIапIэу Урысые Федерацием и Президент дэжь щыIэм иIофшIэн ыпэкIэ лъигъэкIотэщт, республикэм ыцIэ дахэкIэ аригъэIощт.

ДЕЛЭКЪО Анет. Сурэтхэр Ф. Романовам ихъар­зынэщ.