Ахъщэ тын зэфэшъхьафэу цIыфхэм къафакIохэрэм илъэс къэс къэралыгъом къахегъахъо.

[caption id="attachment_144363" align="aligncenter" width="800"] Шэртэнэ Мурат.[/caption]

ГущыIэм пае, ныбжьыр нэсыгъэу пенсие кIуагъэ­хэм страхованиемкIэ къа­ратырэ пенсиехэр про­центи 7,5-кIэ индексацие ашIыгъэхэу 2024-рэ илъэ­сым ищылэ мазэ и 1-м къыщыублагъэу къатых. Ащ къыхеубытэх ыныбжь нэсыгъэу е сэкъатныгъэ иIэу пенсие зыфагъэнэфагъэу IофшIапIэм Iумытыжьхэр, зыIыгъын имыIэу къэнагъэхэр, дзэм къулыкъу щызыхьыгъэхэр. ГурытымкIэ лъытагъэу, сомэ 1640-рэ ахэм япенсиехэм къахэхъуагъ.

IофшIапIэм Iут пенсионерхэм афагъэнэфагъэхэр щылэ мазэм и 1-м къызхэхъуагъэхэм къа­хиубытэхэрэп, ау пенсиехэмкIэ коэффициентэу яIэхэм ахэхъощт. Пенсио­нерым илэжьапкIэ зы­фэдизыр къыдалъытэзэ ахэр къаIэтых.

Ащ нэмыкIэу ахъщэ тын зэфэшъхьаф 40-м ехъу индексацие ашIыгъэу мэзэе мазэу къакIорэм къа­тынэу рагъэжьэщт. УФ-м IофшIэнымкIэ ыкIи цIыфхэр социальнэу къэухъу­мэгъэнхэмкIэ и Министерствэ къызэритыгъэмкIэ, ны мылъкур, сабыир къы­зыхъукIэ зэтыгъоу къатырэ пособиер, ащ зэрэлъы­плъэрэм пае ным мазэ къэс къыфакIорэр, ветеранхэм мазэ къэс къаратырэр, нэмыкI социальнэ IэпыIэгъухэр ащ къыхеубытэх. Проценти 7,4-рэ ахэр индексацие зэра­шIыщтхэр.

Ны мылъкум фэгъэхьыгъэу къэпIон хъумэ, илъэ­сэу къихьагъэм апэрэ са­быир къызфэхъугъэхэм къаратырэр сомэ мин 630-м ехъущт, ятIонэрэм ыкIи ащ къыкIэлъыкIо­хэрэм апае сомэ 833-рэ къатыщт.

Илъэс къэс мэлылъ­фэгъу мазэм социальнэ пенсиехэми къахэхъо. Мы­гъэ проценти 7,5-кIэ индексацие ашIыщтых. Ар федеральнэ бюджетым къыхэхыгъэу къэралыгъом къеты. Iоф ышIэн амал зимыIэхэр ары ащ фэдэ пенсие зыфагъэнафэхэрэр. ГущыIэм пае, сэкъат­ныгъэ иIэу IофшIапIэ Iумытхэр, сабый ибэу зыныбжь илъэс 18-м нэмысыгъэхэр е очнэ шIыкIэм тетэу еджэу илъэс 23-рэ мыхъугъэхэр, нэмыкIхэр.

Федеральнэ фэгъэкIо­тэн зиIэхэм мазэ къэс къафэкIорэ ахъщэ тынми къыхэхъощт. Ащ сэкъатныгъэ зиIэхэр зэкIэ, кIэлэцIыкIухэри, нахьыжъхэри, Чернобыль къыщы­хъу­гъэ тхьамыкIагъом иягъэ зэригъэкIыгъэхэр, ветеранхэр, нэмыкIхэр къы­хеубытэх.

Мазэ къэс къатырэ ахъ­щэ IэпыIэгъум хэхьэ социальнэ фэIо-фашIэхэм «япакет». Зыфагъэнэфагъэм фэIо-фашIэхэр ыгъэ­федэнхэ ылъэкIыщт, ащ ычIыпIэкIэ ахъщэ къыратынэу ыгъэпсын амали иI. 2024-рэ илъэсым ащ проценти 7,5-рэ къыхэхъощт.

Джащ фэдэу дзэм къулыкъу щызыхьыгъэхэм япенсиехэр проценти 4,5-кIэ мы илъэсым индексацие ашIыщтых.

ХЪУТ Нэфсэт.