Къэралыгъо щытхъуцIэ къыфагъэшъошагъ
ОрэдыIо-къэшъокIо ансамблэу «Казачата» зыфиIорэр зызэхащагъэр илъэс 35-рэ зэрэхъугъэр бэмышIэу хигъэунэфыкIыгъ.
[caption id="attachment_144318" align="aligncenter" width="800"] А. Балабась[/caption]
Ащ ехъулIэу «УФ-м народнэ творчествэмкIэ изаслуженнэ коллектив» зыфиIорэ щытхъуцIэр купым къыфагъэшъошагъ ыкIи ар шIухьафтын шъыпкъэ афэхъугъ.
АР-м культурэмкIэ иминистрэу Аулъэ Юрэ зэрэхигъэунэфыкIыгъэмкIэ, УФ-м культурэмкIэ и Министерствэ щытхъуцIэр купхэм афэгъэшъошэгъэнымкIэ зэнэкъокъу гъэ къэс зэхещэ. Урысыем ишъолъыр зэфэшъхьафхэр ащ хэлажьэхэмэ ашIоигъоу лъэIу тхылъхэр министерствэм агъахьых. Зэнэкъокъум хэлэжьагъэхэм япчъагъэ зэрэбагъэм емылъытыгъэу, Адыгеим икуп цIэрыIо текIоныгъэр къыдихыгъ ыкIи щытхъуцIэр къыфагъэшъошагъ.
— ЩытхъуцIэр къэзыушыхьатырэ тхылъыр зэрястыжьыгъэм сырэгушхо. Лъэпкъ шэн-хабзэхэм якъэухъумэн ыкIи яхэгъэхъон купым иIахьышIу зэрэхишIыхьагъэм ар ишыхьат анахь лъапI. Ансамблэм зэрэдэлажьэрэм пае Мыекъопэ къэлэ администрацием тыфэраз, — хигъэунэфыкIыгъ АР-м культурэмкIэ иминистрэу Аулъэ Юрэ.