Хьыкум пристав­хэм я Федеральнэ къулыкъу АдыгеимкIэ и ГъэIорышIапIэрэ гъогурыкIоныр щынэгъончъэнымкIэ Къэралыгъо автоинспекциемрэ зэхащэгъэ Iофтхьабзэм ишIуагъэкIэ тазыри 146-рэ зэ­IузыгъэкIэгъэ хъу­лъфыгъэм иавтотранспорт Теуцожь районым игъо­гухэм ащыщ къыщагъэуцугъ.

ГъэIорышIапIэм икъута­мэу Шэуджэн районым щыIэм мыщ ылъэныкъокIэ Iофи 150-рэ къызэIуихыгъ, зэкIэри зэпхыгъэр гъо­гурыкIоным ишапхъэхэр зэриукъуагъэхэр ары. Хъулъфыгъэм чIыфэу те­лъыр сомэ мини 120-м ехъу. Хэбзэгъэуцугъэм ди­штэу ар къыпщынын зэрэфаер гурагъэIуагъ, ау игъом ипшъэрылъхэр ыгъэ­цэкIагъэхэп. Ащ къы­хэкIыкIэ мылъкоу иIэр зэрагъэшIагъ, IэкIыбым къыщыдагъэкIыгъэ автомобиль зэрэтетхагъэр агъэунэфыгъ.

ХэбзэухъумакIохэм ыпшъэкIэ зигугъу къэтшIыгъэ Iофтхьабзэр рагъэ­кIокIызэ, Теуцожь районым игъогухэм ащыщ тет видеокамерэм машинэр къыридзагъ ыкIи водителыр къагъэуцугъ. Хьыкум приставхэр мы чIыпIэм псынкIэу къэсыгъэх ыкIи автомобилым арест тыралъхьагъ. Хъулъфыгъэм чIыфэр къызимыпщынкIэ мы охътэ благъэм ар ащэщт.

Хьыкум приставхэм я Федеральнэ къулыкъу АдыгеимкIэ и Гъэ­IорышIапIэ ипресс-къулыкъу