IофшIэныр Адыгеим щылъагъэкIотэщт
Шъолъыр хэхъоныгъэмкIэ Правительственнэ комиссием ипрезидиум изэхэсыгъоу Урысыем и Правительствэ ипащэ игуадзэу Марат Хуснуллиным зэрищагъэр фэгъэхьыгъагъ псэупIэ-коммунальнэ хъызмэтым игъэфедэн. Мы лъэныкъомкIэ 2023-рэ илъэсым Iоф зэрашIагъэр ащ щызэфахьысыжьыгъ.
АдыгеимкIэ Iофхэм язытет зыфэдэм республикэм и ЛIышъхьэу КъумпIыл Мурат игугъу къышIыгъ.
«ПсэупIэ-коммунальнэ хъызмэтым зэпыу имыIэу Iоф ышIэным мэхьанэшхо етэты. Ащ пае коммунальнэ зэтегъэпсыхьанымкIэ типшъэрылъхэм ягъэцэкIэн тапэкIи лъыдгъэкIотэщт УФ-м и Правительствэ амалэу къытитырэ пстэури дгъэфедэзэ.
Ахэм ащыщ республикэм щыпсэухэрэм псы къабзэ аIэкIэгъэхьэгъэныр. Ащ пае 2019 — 2022-рэ илъэсхэм къащыублагъэу псым икъэтын тегъэпсыхьэгъэ псэолъэ 13 зэтедгъэпсыхьагъ ыкIи ахэм Iоф ашIэ. ИкIыгъэ илъэсым федеральнэ проектэу «Псы къабз» зыфиIоу лъэпкъ проектэу «ПсэупIэр ыкIи къэлэ щыIакIэр» зыцIэм къыхиубытэрэм къыдыхэлъытагъэу псыр зыщаубытырэ псэолъэ 14 джыри тшIыгъэ ыкIи зэтедгъэпсыхьажьыгъ. Мыгъэ проектым идэлэжьэн лъыдгъэкIотэщт.
IофшIэнхэр чIыпIи 6-мэ ащызэшIотхыщтых: къуаджэхэу Нэшъукъуае, Пэнэжьыкъуае, Нэтыхъуае, къэлэ псэукIэ зиIэ поселкэу Лъэустэнхьаблэ, псэупIэхэу Дондуковскэм, Отраднэм. Коммунальнэ фэIо-фашIэхэм ядэгъугъэ къалэхэм ямызакъоу, къоджэ псэупIэхэми нахьышIу ащышIыгъэным пае псэупIэ-коммунальнэ хъызмэтым игъэкIэжьын тегъэпсыхьагъэу нэмыкI проектхэми, программэхэми тахэлэжьэныр зэпыдгъэущтэп», — къыIуагъ Адыгеим и ЛIышъхьэ.