БзэджашIэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Республикэм щыIэм епхыгъэу зыща­гъэпщынэхэрэ колониеу N 1-м ипащэ игуадзэу Iоф зышIэщтыгъэ М. З. Къушъхьэм къуалъхьэ къазэраIихыгъэм ыкIи гъэпцIагъэ зыхэлъ бзэджэшIагъэ зэрэзэрихьагъэм афэшI къыфызэIуахыгъэ уголовнэ Iофым хэплъагъэх.

Урысыем и Следственнэ комитет иследственнэ ГъэIорышIапIэу АР-м щыIэм, щы­нэгъончъэнымкIэ федеральнэ къулыкъум и ГъэIорышIапIэу АР-м щыIэм ыкIи бзэджашIэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Республикэм щыIэм къаугъоигъэ материалхэмкIэ уголовнэ Iофыр къызэIуахыгъ.

ЗэрагъэунэфыгъэмкIэ, 2023-рэ илъэсым жъоныгъуакIэм агъэмысагъэхэм ащыщэу хьа­псым чIэс горэм Къушъхьэ Му­радин зыкъыфигъэзагъ услов­нэ телъэу нахь псынкIэу хьа­псым къычIагъэкIыжьыным фэшI изекIуакIэ дэгъоу зэрыт тхьапэ­хэр фигъэпсынхэу. Ахъщэ къыритымэ илъэIу фигъэцэкIэ­нэу къулыкъушIэр къезэгъыгъ, ау ыпшъэ рилъхьэгъэ пшъэры­лъыр зэшIуихыным дэгуIагъэп. Ащ ыуж агъэмысагъэм М. З. Къушъ­хьэм икартэ ахъщэу зэрэзэгуры­Iуагъэхэр фыригъэхьагъ, ежь зэрэфаем фэдэу ар ыгъэфедагъ.

Ащ нэмыкIэу, 2023-рэ илъэсым мэкъуогъум М. З. Къушъхьэм пащэм ипшъэрылъхэр ыгъэ­цакIэхэзэ агъэмысагъэ го­рэм къуалъхьэ къыIихи, охътабэкIэ хьапсым зыгорэм щы­IуигъэкIагъ.

Теуцожь район хьыкумым унашъоу ышIыгъэмкIэ М. З. Къушъхьэм илъэси 3 ушэтын пIалъэ иIэу илъэси 2-рэ зы ма­зэрэ условнэу тырилъхьагъ, джащ фэдэу хэбзэ ыкIи муниципальнэ къулыкъухэм илъэситIукIэ IэнатIэ ащиIыгъын фитыщтэп.

Унашъом кIуачIэ иIэ хъугъэ.

БзэджашIэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Республикэм щыIэм ипресс-къулыкъу.