Мыекъуапэ икомандэ иIэщт зэIукIэгъухэр
Урысыем ичемпионат и Апшъэрэ лигэ щешIэрэ Мыекъопэ хъулъфыгъэ командэу «Динамо-МГТУ-м» мы зыгъэпсэфыгъо мафэхэм зичэзыу ешIэгъухэр иIэщтых.
Зэнэкъокъум къыдыхэлъытагъэу Адыгеим икомандэ Московскэ хэкур къэзыгъэлъэгъорэ «ЦСП-Химки» мы мафэхэм зэIукIэгъуитIу дыриIагъ. Андрей Гапошиным ыгъэсэрэ баскетболистхэм апэрэ ешIэгъур къа-хьыгъ. Тикомандэ хэт Данила Донсковыр анахь къахэщыгъ, очко 19 ригъэкъугъ. Джащ фэдэу Александр Милютинымрэ Даниил Чаленкэмрэ ешIэкIэ дахэ къагъэлъэгъуагъ. Пчъагъэр 78:72-у зэIукIэгъур аухыгъ.
ЯтIонэрэ ешIэгъум хьакIэхэр нахь щылъэшыгъэх. Апэрэ такъикъхэм къащегъэжьагъэу ахэр ыпэкIэ илъыгъэх, зэгурыIожьхэу ешIагъэх. Пчъагъэр 87:77-у «ЦСП-Химки» текIоныгъэр къыдихыгъ.
Щылэ мазэм и 20 — 21-м тикомандэ къалэу Грознэр къэзыгъэлъэгъорэ «Динамэм» дешIэщт. Джырэ уахътэм «Динамо-МГТУ-м» я 4-рэ чIыпIэр ыIыгъ.
Командэхэр зыдэщыт чIыпIэхэр ыкIи очкпчъагъэу рагъэкъугъэр:
1. «Металлург» (Магнитогорск) — 26. 2. «Динамо» (Грознэр) — 26. 3. «ЦСП-Химки» (Химки) — 26. 4. «Динамо-МГТУ» (Мыекъуапэ) — 24. 5. «Чебоксарские ястребы» (Чебоксары) — 21. 6. «Нефтехимик» (Тобольск) — 21. 7. «Южный слон» (Ставрополь) — 18.