Унагъом и Илъэс къадызэIуахыщт
НеущмыкIэ къыщыублагъэу щылэ мазэм и 23-м нэс Дунэе къэгъэлъэгъон-форумэу «Урысыер» зыфиIоу ВДНХ-м къыщызэIуахыгъэм Урысые унэгъо форумэу «Родные — Любимые» зыфиIорэр щыкIощт.
[caption id="attachment_144290" align="aligncenter" width="800"] А. Гусев[/caption]
«Урысыем непэ мэхьанэшхо щараты унагъохэм IэпыIэгъу ягъэгъотыгъэным, унэгъо хабзэхэм якъэухъумэн. Къихьэгъэ илъэсыр унагъом и Илъэсэу къэралыгъом ипащэу Владимир Путиным аукъодыеу ыгъэнэфагъэп. Iофтхьэбзэ инэу Урысые унэгъо форумэу «Родные — Любимые» зыфиIорэмкIэ ар къызэIуахыщт», — къыхигъэщыгъ республикэм ипащэу КъумпIыл Мурат.
Адыгеир форумым къыщигъэлъэгъощт тишъолъыр щызэлъашIэхэу Зыхьэ Заурбыйрэ Мэлайчэтрэ яунагъо. Мы унэгъо зэкIужьым икIыгъэ илъэсым шъолъыр зэнэкъокъоу «Илъэсым иунагъу» зыфиIорэм илъэныкъохэм ащыщкIэ текIоныгъэ къыщыдихыгъ. Зэшъхьэгъусэхэр зэгурыIоныгъэ азыфагу илъэу зызэдэпсэухэрэр илъэс 50 хъугъэ, къызызэрэщагъэхэр джыри Ленинград театральнэ институтым щеджэхэ зэхъур ары. Ахэм сабыищ зэдагъотыгъ ыкIи алъэ тырагъэуцуагъэх: Зар, Марян ыкIи Зуралбый. Мыхэм яунагъохэм сабыих къащэтэджы, ахэми анаIэ лъэшэу атет, адыгэ хабзэхэм атетэу апIух Заурбыйрэ Мэлайчэтрэ.
Адыгеим итеатральнэ искусствэ Зыхьэхэм яIахь ин хэлъ, джырэ уахътэми ащ фэлажьэх. Театрэми, киноми яплъыхэрэм илъэсыбэм агу къинэгъэ роль пшIы пчъагъэхэр зэшъхьэгъусэхэм къашIыгъэх. Ясэнэхьат гъэхъагъэу щашIыгъэхэр щытхъуцIэ ыкIи тын зэфэшъхьафхэмкIэ къыхагъэщыгъэх — Зыхьэ Заур Урысыемрэ Адыгеимрэ янароднэ артист, Абхъазым, Къэбэртэе-Бэлъкъарым, Пшызэ шъолъыр язаслуженнэ артист. Мэлайчэт Урысыем изаслуженнэ, Адыгеим инароднэ артистк.
«Зыхьэхэм яунагъо сэнэхьат лIэуж унагъоу уеджэн плъэкIыщт. ЯкIалэхэмрэ якъорэлъф ыкIи пхъорэлъфхэмрэ гъэхъагъэ хэлъэу ясэнэхьатхэм закъыщагъэлъагъо, якIалэу Зуралбый ны-тыхэм ялъагъо рыкIуагъ — театрэм Iоф щешIэ, актер сэнэхьатым ишъэфхэр сабыйхэм алъегъэIэсы.
Сицыхьэ телъ Зыхьэхэм яунэгъо ин зэкIужь яхабзэхэмкIэ, Адыгеим икультурэрэ ичIыпIэ гъэшIэгъонхэм ятарихъкIэ форумэу «Родные — Любимые» зыфиIорэм хэлажьэхэрэм агу къызэринэжьыщтым имызакъоу, цIыф гъэшIэгъонхэм, зэIухыгъэхэм, нэгушIухэм зэраIукIагъэхэм игузэхашIэхэри зэрэзыдахьыжьыщтхэм.
Зэрифэшъуашэу зыкъагъэлъэгъонэу ыкIи унагъом и Илъэс фэгъэхьыгъэ Iофыгъошхом зэрэхэлажьэхэрэм агу къыIэтынэу тафэлъэIон!» — къащитхыгъ Адыгеим и ЛIышъхьэ исоциальнэ нэкIубгъохэм.