АР-м хэдзынхэмкIэ и Гупчэ комиссие ты­гъуасэ я 31-рэ зэхэсыгъоу иIагъэм Iофыгъуи 7-мэ щатегущыIагъэх, унэшъо гъэнэ­фагъэхэр щашIыгъэх. Iофтхьабзэр зэри­щагъ ащ и Тхьаматэ игуадзэу Елена Майор.

[caption id="attachment_144286" align="aligncenter" width="800"] Делэкъо Анет[/caption]

Гъэтхапэм и 17-м Урысые Федерацием и Президент ихэ­дзынэу щыIэщтым, ащ изы­фэгъэхьазырын афэгъэхьыгъэ къэбарлъыгъэIэс-гурыгъэIон Iоф­шIэнэу Гупчэ комиссием зэшIуихыхэрэм ар къатегущы­Iагъ. Къэбар жъугъэм иамалхэр къызфагъэфедэхэзэ хэ­дзын­хэм афэгъэхьыгъэу цIыфхэм алъагъэIэсыщт. Ащ нэмыкIэу Интернетым бэ къырагъэхьащтыр, пэшIорыгъэшъэу агъэхьазырыгъэ тхылъ цIыкIухэр аратыщтых.

Сэкъатныгъэ зиIэхэм хэдзынхэм афэгъэхьыгъэ фитыныгъэу яIэхэр къэухъумэгъэнхэм пае Гупчэ комиссием IофшIэнэу зэшIуихыхэрэм нэужым тегущыIагъэх.

АР-м хэдзынхэмкIэ и Гупчэ комиссие исекретарэу ХьэцIэцIэ Фатимэ къызэриIуагъэмкIэ, сэкъатныгъэ зиIэхэр хэдзынхэм ахэлэжьэнхэм пае ищыкIагъэр зэкIэ агъэцакIэ. Ахэм яшIои­гъоныгъэхэр къыдалъытэзэ яIофшIэн зэхащэ. Зэрагъэна­фэрэмкIэ, сэкъатныгъэ зиIэхэу курэжъыехэм арысхэм хэдзынхэм ахэлэжьэнхэр Iэрыфэгъу къафэхъуным фэшI чIыпIэхэр афагъэпсыщтых, нэмыкI хэу­шъхьафыкIыгъэ Iэмэ-псымэхэри агъэфедэн амал яIэщт.

Сэкъатныгъэ зиIэхэм яшъо­лъыр общественнэ организацие АР-м хэдзынхэмкIэ и Гупчэ комиссие зэдэлэжьэныгъэ дыриIэным фэгъэзэгъэ IофышIэ купым хэтхэр нэужым агъэнэфагъэх. Джащ фэдэу 2024-рэ илъэсым Гупчэ комиссием IофшIэнэу ыгъэцэкIэщтым тегущыIа­гъэх. ЗэрагъэнафэрэмкIэ, анахь шъхьаIэр УФ-м и Президент ихэдзынхэм языфэгъэхьазырын ыкIи язэхэщэн, джащ фэдэу Iоныгъо мазэм зы хэдзын кампание щыIэнэу агъэнафэ, ау мыщ зэхъокIыныгъэхэр джыри фэхъунхэ ылъэкIыщт.

Iофтхьабзэм нэмыкI упчIэ­хэри къыщаIэтыгъэх. КIэухым хэдзынхэм ялъэхъан къэбар­лъыгъэIэс-гурыгъэIоным епхыгъэ IофшIэн анахь дэгъухэр къы­зыщыхахыгъэ Урысые зэнэ-къо­къум игугъу къашIыгъ. Шъо­лъыр уцугъом текIоныгъэ къыщыдэзыхыгъэ Марина Колковар агъэшIуагъ. Хьафизэхэм я Адыгэ республикэ хэушъхьэ­фыкIыгъэ тхылъеджапIэ ибиб­лиографэу ащ Iоф ешIэ. Зэнэ­къокъум ифедеральнэ уцугъо зэфэхьысыжьхэр зыфашIыхэм, Маринэ иIофшIагъэ УФ-м хэ­дзынхэмкIэ и Гупчэ комиссие уасэ къыфишIыгъ. Джащ фэдэу республикэ Гупчэ комиссиемрэ хьафизэхэм я Адыгэ рес­публикэ хэушъхьафыкIыгъэ тхылъ­еджапIэрэ рэзэныгъэ тхылъхэр къафагъэхьыгъэх.

ДЕЛЭКЪО Анет.