ЗекIохэм япчъагъэ хэхъуагъ
ЗекIо нэбгырэ пчъагъэу екIолIагъэм ибагъэкIэ заповедникхэм азыфагукIэ къэралыгъом щыпэрыт Кавказ биосфернэр. УФ-м чIыопсым иамалхэмкIэ ыкIи экологиемкIэ и Министерствэ 2023-рэ илъэсым фишIыгъэ зэфэхьысыжьхэм ар къагъэлъэгъуагъ.
[caption id="attachment_144279" align="aligncenter" width="800"] Юлия Поликайтите[/caption]
ПстэумкIи гъэрекIо къэралыгъом изаповедникхэр зекIо миллион 14,5-мэ зэрагъэлъэгъугъ. Мы пчъагъэм щыщэу мин 622-р Пшызэ шъолъырым, Адыгеим ыкIи Къэрэщэе-Щэрджэс Республикэм ащыгъэпсыгъэ Кавказ биосфернэ заповедникым ихьэкIагъэх. Ар 2022-м икъэгъэлъэгъонхэм нэбгырэ мин 70-кIэ анахьыб.
Мыщ фэдэ хэхъоныгъэшIухэм зекIоным къэралыгъом зызэрэщиушъомбгъурэр ылъапсэу къыхагъэщы. Ащ епхыгъэу заповедникым къекIуалIэрэри нахьыбэ мэхъу. Ау зекIохэм япчъагъэ зэрэхахъорэм пшъэрылъыкIэхэр къегъэуцух. Заповедникхэм ащылэжьэрэ лъагъохэр, музейхэр непэрэ шапхъэхэм адиштэу зэтегъэпсыхьэгъэнхэ ыкIи хьакIэхэм нахь чанэу уадэлэжьэн фае. Анахь шъхьаIэр IофшIэныр зэкIэ чIыопсым зэрар емыкIэу зэхэщэгъэныр ары, сыда пIомэ заповедникхэмрэ Лъэпкъ паркхэмрэ экологическэ зекIоным зегъэушъомбгъугъэнымкIэ непэ чIыпIэшIух. Ащ елъытыгъэу тыкъэзыуцухьэрэ дунаим зэрар рамыхэу зекIоным зызыщырагъэушъомбгъун алъэкIыщт чIыпIэу заповедникхэмрэ Лъэпкъ паркхэмрэ яIэхэр мы илъэсым ыкIэ нэс къагъэнэфэнэу УФ-м чIыопсым иамалхэмкIэ ыкIи экологиемкIэ иминистрэу Александр Козловым пшъэрылъ къыгъэуцугъ.
Анцокъо Ирин.