Непэ гумэкIыгъо къызхэкIыхэрэм ащыщ, анахьэу зыныбжь хэкIотагъэхэмкIэ, зэ­ресагъэхэу зыщыфаехэм медицинэ учреждениехэм ярегистратурэхэм аIу­хьанхэшъ, ящыкIагъэу алъытэрэ врачым дэжь зыхатхэн зэрамылъэкIыжьырэр. [caption id="attachment_144274" align="aligncenter" width="800"] Iэшъынэ Сусан[/caption] Мы шIыкIэм чэзыушхохэр къы­хэкIыщтыгъ ыкIи Iэрыфэгъоу плъы­тэнэу щытыгъэп. Джащ фэдэу Адыге­им псауныгъэр къэухъумэгъэнымкIэ и Министерствэ исоциальнэ хъы­тыухэм цIыфхэм ядаохэр къарэхьэх, шъолъыр зыкI номерэу 122-мкIэ къаIо «узкопрофильнэкIэ» заджэхэрэ врачхэм адэжь зыхатхэн зэрамы­лъэкIырэм фэгъэхьыгъэу. Мы Iофыгъом епхыгъэу джэуап къытыжьыгъ Адыгэ Республикэм псауныгъэр къэухъумэгъэнымкIэ ими­нистрэ игуадзэу Хьагъэудж Марыет. Ащ къызэриIуагъэмкIэ, къэралыгъо фэIо-фашIэхэм яамалкIэ е зыкI колл-гупчэм иномерэу 122-мкIэ лъэныкъо 15-кIэ врачхэм адэжь зыхэшъутхэн шъулъэкIыщт. Ахэр: терапевтыр, зэхэт практикэмкIэ врачым (унэгъо врач), хирургыр, офтальмологыр, оториноларингологыр, акушер-гинекологыр, психиатр-наркологыр, фтизиатрэр, стоматологыр, педиатрэр, кIэлэцIыкIу хирургыр ыкIи психиатрэр, уролог-­андрологыр, дерматовенерологыр. — Адрэ врачхэм адэжь зыхябгъэ­тхэным фэшI терапевтым уекIолIэнэу щыт. Ар узыгъэгумэкIырэм къедэIущт, уипсауныгъэ изытет зэригъэшIэщт ыкIи анализхэр уигъэтынхэшъ, нахь уищыкIэгъэ врачым дэжь уигъэкIощт. ЗыкI номерымкIэ врачым дэжь зыхягъэтхэгъэныр Урысыем исубъект пстэуми ащагъэфедэ. ЦIыфым уахътэ ыгъэкIодэу чэзыухэм ахэмытынымкIэ мыр амалышIоу щыт, — ­къыIуагъ Хьагъэудж Марыет. Iэшъынэ Сусан.