Гъыщ Нахьмэт кIэлэеджакIохэм сурэтхэр, дышъэидэхэр, щыгъыжъыехэр, хъэдэн шъабэм ыкIи кIапсэм ахэшIыкIыгъэ пкъыгъохэр, пхъонтэжъые цIыкIухэр арегъэшIы. Ар Хьакурынэхьэблэ гурыт еджапIэм Iут, адыгабзэмкIэ кIэлэегъадж, еджапIэм хэт музеим ипащ. Илъэс 33-рэ хъугъэу мы сэнэхьатым рэлажьэ.

КIэлэегъаджэм кIэлэцIыкIу­хэр ригъаджэхэрэ къодыеп, ахэр щыIэныгъэм щегъэгъуазэх, ишIэныгъэхэм ренэу ахегъахъо.

Гъыщ Нахьмэт Адыгэ къэралыгъо университетым илъэпкъ факультет къызеухым Хьакурынэхьаблэ дэт гурыт еджапIэм Iухьагъ. Ныдэлъфыбзэр зэгъэшIэгъэныр, къэухъумэгъэныр, ар кIэлэеджакIохэм шIу аригъэлъэ­гъуныр пшъэрылъ шъхьаIэу зыфигъэуцужьыгъ.

— Сабыим ицIыкIугъом къыщегъэжьагъэу иныдэлъфыбзэ Iулъын фае, — еIо кIэлэегъа­джэм, — илъэпкъ уасэ фишIын зэрэфаер къыгурыIоныр мыщ дэжьым анахь шъхьаI. ТиеджапIэ адыгабзэм изэгъэшIэн мэхьанэшхо щыраты, ащ епхыгъэу Iофтхьэбзэ зэфэшъхьафхэр кIэлэеджакIохэм афызэхэтэщэх. Адыгэ лъэпкъым къыкIугъэ гъо­гур, икультурэ зыфэдэр, идышъэ кIэн ятэгъашIэ. ЕджапIэм имузей чIэлъ пкъыгъохэм ятарихъ нэIуа­сэ фэтэшIых. Лъэпкъ шъуашэхэу цыемрэ саемрэ, ижъырэ тхъу­уалъэр, къоеихылъэр, пIуаблэ­хэр, шыкIэпщынэр, адыгэ пщынэр, пхъэкIычыр, кушъэр, дышъэ IуданэкIэ тхыпхъэ зэфэшъхьафхэр зыхэдыкIыгъэ Iалъмэкъхэр ыкIи нэмыкIыбэ тимузей чIэлъых. Ахэм лъэпкъым къырыкIуагъэр къыраIотыкIы. Лъэпкъым итарихъ, икультурэ, иэтнографие шIэныгъэу къахэпхын плъэкIыщтыр гъу­нэнчъ. Ар къыдалъытэзэ еджапIэм Iутхэм яIофшIэн агъэпсы.

Гъыщ Нахьмэт проект гъэшIэгъонэу «IэпэIасэм идесэхэр» зыфиIорэр зэхищагъ.

— Бзэм изэгъэшIэн дакIоу кIэлэеджакIомэ сурэтхэр, дышъэ­идэхэр, щыгъыжъыехэр, хъэдэн шъабэм ыкIи кIапсэм ахэшIыкIыгъэ пкъыгъохэр, пхъонтэжъые цIыкIухэр ясэгъэшIых. КIэлэцIыкIухэр лъэпкъ культурэм фэщэгъэнхэмкIэ, пIуныгъэ-гъэсэныгъэ тэрэз яIэнымкIэ мыхэр зэкIэ тиIэпэIэгъух. Уахътэрэ шIоигъоныгъэрэ уиIэмэ, зэмыгъэшIэн щыIэп, — хегъэунэфыкIы Нахьмэт.

ЛIэшIэгъухэр зэзыпхырэ дышъэ кIэным икъэухъумэн дэлэжьэрэ кIэлэегъаджэм Iофэу ыгъэцакIэрэм мэхьанэшхо иI ыкIи ащ шIуагъэ къытынэу тыщэгугъы.

Лъэпшъыкъо Фатим. Сурэтыр Н. Гъыщым ихъарзынэщ.