Адыгеим ыкIи Пшызэ шъолъыр ащыпсэурэ быслъымэнхэм я ДиндэлэжьапIэ илIыкIоу, муфтиим игуадзэу, Iимамэу Тхьаркъохъо Аскэр илъэс хъугъэу Краснодар щэлажьэ. Ащ щызэхэщэгъэ дин ыкIи общественнэ-культурнэ организациехэм, краим икъэралыгъо къулыкъухэм зэпхыныгъэхэр адишIыгъэу зэдэлажьэх. Илъэс IофшIэгъум изэфэхьысыжьхэм нафэ къызэрашIыгъэмкIэ, ДиндэлэжьапIэм илIыкIо гу къылъатагъ, иIофшIэн уасэ къыфашIыгъ, мэхьанэ ратэу краим иобщественнэ щыIэкIэ-псэукIэ зынаIэ тет организациехэм яIофшIэн хэлэжьэнэу рагъэблэгъагъ.

БлэкIыгъэ илъэсым икIэух культурнэ, общественнэ ыкIи динлэжь организациехэу Краснодар щылажьэхэрэм ялIыкIохэм къалэм имэрэу Евгений Наумовым зэIукIэгъу адыриIагъ. Лъэпкъ зэфыщытыкIэхэм ягъэпытэн зиIахьышIу хэзылъхьэ­хэрэр, лъэпкъ зэфэшъхьафхэм якультурэ хэхъоныгъэ ышIынымкIэ зишIуагъэ къэзыгъакIохэрэр зэIукIэгъум щагъэшIуагъэх. 2023-рэ илъэсым изэфэхьысыжьхэр ашIыгъэх, 2024-м зэ­рэ­зэдэлэжьэщтхэ лъэныкъо­хэм атегущыIагъэх. Адыгеим ыкIи Пшызэ шъолъыр ащыпсэурэ быслъы­мэнхэм я ДиндэлэжьапIэ ыцIэкIэ зэIукIэгъум хэлэжьагъ Тхьаркъо­хъо Аскэр. Ащ къыкIэ­лъыкIуагъ краим щыпхыращырэ политикэм гъунэ лъызыфырэ Департаментым зэхищэгъэ зэфэхьысыжь зэхахьэр. Лъэпкъ зэдэлэжьэныгъэм хэхъоныгъэ ышIынымкIэ, цIыф лъэпкъ зэфэшъхьафхэм яныбжьыкIэхэм культурнэ шэн-хабзэхэр къахэ­нэнымкIэ ыкIи Краснодар краим лъэпкъ зэфыщытыкIэу илъым ихэгъэхъон, игъэпытэн иIахьышIу зэрэхишIы­хьэрэм апае Iимамэу Тхьаркъо­хъо Аскэр Департаментым ыцIэкIэ Рэзэныгъэ тхылъ къыратыжьыгъ.

«Илъэс хъугъэ муфтиим сыригуадзэу Краснодар сызщылажьэрэр. Сипшъэрылъхэм ащыщых краим ыкIи ежь Краснодар яадминистрациехэм тызэрадэлэжьэщтым ишапхъэхэр дгъэнэфэнхэр, общественнэ, дин организациехэм, апшъэрэ ыкIи гурыт сэнэхьат зыщарагъэгъотырэ еджапIэхэм зэпхыныгъэхэр адэтшIынхэр, — къыхигъэщыгъ Тхьаркъохъо Аскэр. — Ащ нэмыкIэу Шъачэ, Ейскэ, нэмыкI чIыпIэхэм мэщытхэм, къэхалъэ­хэм, тхьэлъэIупIэхэм яшIынкIэ Iофыгъоу къэуцухэрэмкIэ пшъэ­дэкIыжь зыхьыщтхэр тэгъэна­фэх, Iоф адэтэшIэ. Ежь Краснодар пштэмэ, ащ щызэхащэгъэ Iофтхьэбзэ 38-мэ сахэлэжьагъ. Ахэм ащыщэу ти ДиндэлэжьапIэ къыхэлажьэзэ зэхэтщагъэр 4: ныбжьыкIэхэм шъхьэихыгъэ зэдэгущыIэгъу защыдэтшIыгъэ этно-культурнэ форумыр, диныр зэрашIэрэм фэгъэхьыгъэ зэнэ­къокъур, Краснодар адыгэ шIушIэзехьэу (меценатэу) щы­псэущтыгъэхэм афэгъэхьыгъэ документальнэ фильмэу тетхыгъэр, быслъымэнхэм, адыгэ хабзэм афэгъэхьыгъэ зэнэкъо­къоу Шъхьащэфыжь щыредгъэ­кIокIыгъэр».

Темыр Кавказым щыпсэурэ быслъымэнхэм я Координационнэ Гупчэ Кисловодскэ, Элиста дин IофыгъохэмкIэ ащызэхищэгъэ Iофтхьабзэхэми муфтиим игуадзэ ахэлэжьагъ. Краснодар иадминистрацие, лъэпкъ культурэхэм я Гупчэ, общественнэ организациехэм, урыс православнэ чылысым рагъэкIокIыгъэ Iофтхьэбзэ 30 фэдизмэ ар ащыIагъ. «ТапэкIэ студентхэм тынаIэ атедгъэтынэу тыфай, — къыIотагъ Аскэр. — Пшызэ мэкъумэщ университетым бэмышIэу зэIу­кIэгъу щытиIагъ. Iофтхьабзэу зэхэтщагъэхэм ныбжьыкIэ 600 фэдиз ахэлэжьагъ. Къончагъэ диным къыхэзылъхьэхэрэм тикIэлакIэхэр зыIэкIамыубытэнхэмкIэ тизэIукIэгъухэм мэхьанэшхо яI. Студентхэу диныр зылэжьыхэрэм упчIабэ къаты, гущыIэм пае, шъхьатехъор зэрэптехъогъэн фаем, нэмаз зэрэпшIыщтым афэгъэхьыгъэ­хэм, нэмыкIхэм джэуапхэр ятэ­тыжьых. Терроризмэм пэшIуекIогъэнымкIэ комиссиеу Краснодар краим иадминистрацие щызэхэщагъэм сыхэт, лъэпкъ Iофыгъохэм афэгъэзэгъэ купми сыхэхьэ. Ащ нэмыкIэу Общественнэ палатэм бэмышIэу сырагъэблэгъагъ. ДинымкIэ ыкIи лъэпкъ зэфыщытыкIэхэмкIэ краим щызэхэщэгъэ комиссием мыгъэ сыхагъэхьанэу щыт».

Адыгэ Республикэм ыкIи Пшызэ шъолъыр ащыпсэурэ быслъымэнхэм я ДиндэлэжьапIэ илIыкIо гъэIорышIапIэу Краснодар къыщызэIуахыгъэм джырэкIэ тхьэлъэIупIэ хэтэп. Ар зычIэ­тыщт унэм игъэнэфэн, изэтегъэ­псыхьан апэрэ пшъэрылъэу щытыгъ. Джы ащ тхьэлъэIупIэ къыщызэIуахыным дэлэжьэщтых, бэрэскэшхо хъутбэхэри ащ щызэхащэхэзэ ашIыщт. Диным шапхъэу пылъхэм ялъытыгъэу фэIо-фэшIэ зэфэшъхьафхэр зэрэзепхьащтхэм фэгъэхьыгъэ упчIэхэр игъорыгъоу къэуцух. ШIушIэ IофшIэным хэщагъэхэри щыIэх. ЩыкIагъэ зиIэхэм IэпыIэгъу афэхъугъэнымкIэ Iофтхьэбзэ гъэнэфагъэхэм язэхэщэн зэрэпылъхэр Тхьаркъохъо Аскэр къыхигъэщыгъ. Мыгъэ а лъэныкъом нахь игъэкIотыгъэу дэлэжьэщтых.

Тэу Замир.