Спортсмен 40 фэдизмэ заушэтыгъ
Теннис цIыкIумкIэ зэнэкъокъухэр Мыекъуапэ щыкIуагъэх.
Адыгеим ихэшыпыкIыгъэ командэ хэхьащтхэр ыкIи Къыблэ федеральнэ шъолъырым ичемпионат хэлэжьэщтхэр къэнэфагъэх. Къалэу Славянск-на-Кубани щыкIощт зэнэкъокъум хэлажьэхэмэ ашIоигъоу хъулъфыгъэ ыкIи бзылъфыгъэ 40 фэдизмэ заушэтыгъ.
Бзылъфыгъэхэм язэнэкъокъу текIоныгъэр къыщыдэзыхыщтхэр къэшIэгъоягъэп. 2023-рэ илъэсым къыкIоцI пэрытныгъэ зыIыгъыгъэ спортсменкэхэр нахь къахэщыгъэх. Ахэр Теуцожь районым икъуаджэу Нэшъукъуае щыщ Чэтаохэу Альбинэрэ Аринэрэ, Блэгъожъхэу Динарэрэ Данэрэ, джащ фэдэу яплIэнэрэ чIыпIэр къыдэзыхыгъэ къуаджэу Хьатикъуае щыпсэурэ Надежда Трофимовар.
Хъулъфыгъэхэм язэнэкъокъу гъэшIэгъонэу рекIокIыгъ. ТекIоныгъэр къыдэзыхыгъэр спортымкIэ мастерэу Павел Ковенкэр ары. ЯтIонэрэ хъугъэ Александр Воронцовыр, ящэнэрэ чIыпIэр фагъэшъошагъ Александр Лихобаба. Апэрэ чIыпIитфыр къыдэзыхыгъэхэм ахэфагъэх Дмитрий Работяга ыкIи ЯхъулIэ Нарт. Мыхэм зэкIэми Адыгеир Къыблэ федеральнэ шъолъырым изэнэкъокъу къыщагъэлъэгъощт.