Урысыем ичемпионат и Суперлигэ хэлэжьэрэ «АГУ-Адыифым» зичэзыу ешIэгъоу иIагъэр Мыекъуапэ щыкIуагъ.

[caption id="attachment_144185" align="aligncenter" width="800"] А. Кирнос[/caption]

Республикэм ихьэкIагъ Тольятти икомандэу «Ладэр». Адыгеим игандболисткэхэм ешIэкIэ дахэ къагъэлъэгъуагъ нахь мышIэми, хьакIэхэр нахь лъэшыгъэх. «АГУ-Адыиф» — «Лада» (Тольятти) —26:31 (12:16).

Апэрэ таймым тикомандэ дэгъоу ешIагъ, ау ащ икIэухым хьакIэхэм яешIакIэ нахь агъэлъэшыгъ, пчъагъэр 12:16-у аухыгъ. ЯтIонэрэ таймым иапэрэ такъикъи 8-м типшъашъэхэм Iэгуаор къэлапчъэм дадзэн алъэкIыгъэп. Пчъагъэр 12:21-у Екатерина Терлецкаям Iэгуаор къэлапчъэм дидзагъ ыкIи тикомандэ иешIакIэ нахьышIум ылъэныкъокIэ зызэблихъугъ. Тигандболисткэхэр нахь дэ­гъоу джэгунхэу аублагъ, къэлэпчъэIутэу Людмила Баскаковар цыхьэшIэгъоу ешIагъ.

[caption id="attachment_144186" align="aligncenter" width="800"] А. Кирнос[/caption]

— ЗэIукIэгъур зэрэкIуагъэм сигъэрэзагъ. Хэукъоныгъэхэр щыIагъэх, ау ащ дакIоу типшъашъэхэр дэгъоу ешIагъэх, бэнагъэх, — къыIуагъ тикомандэ итренер шъхьаIэу Наталья Дерепаскэм. Джырэ уахътэм «АГУ-Адыифыр» я 10-рэ чIыпIэм щыт. Пэрытныгъэр зыIыгъыр «Рос­тов-Дон». Зэнэкъокъум къыдыхэлъытэгъэ пэшIорыгъэшъ едзыгъор ыухынкIэ тикомандэ зы ешIэгъу къыфэнагъ. Щылэ мазэм и 21-м «Звездам» дешIэщт, зэIукIэгъур Звенигород щыкIощт.

Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ростов-Дон» — 40. 2. «ЦСКА» — 35. 3. «Лада» — 31. 4. «Астраханочка» — 31. 5. «Черноморочка» — 30. 6. «Кубань» — 25. 7. «Динамо-Синара» — 17. 8. «Звезда» — 14. 9. «Ставрополье» — 10. 10. «АГУ-Адыиф» — 8. 11. «Луч» — 6. 12. «Университет» — 1.