Журналистикэм ылъэныкъокIэ Адыгеим и ЛIышъхьэ ишIухьафтынхэр республикэм и Правительствэ зычIэт унэм щаратыжьыгъэх. АР-м и ЛIышъхьэу КъумпIыл Мурат Iофтхьабзэр зэрищагъ.

[caption id="attachment_144137" align="aligncenter" width="800"] А. Гусев[/caption]

ЗэIукIэм хэлэжьагъэх АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, УФ-м IофшIэнымкIэ и ЛIыхъужъэу, АР-м илитературнэ-художественнэ, икIэлэцIыкIу журналхэм яредакцие иредактор шъхьаIэу, тхакIоу МэщбэшIэ Исхьакъ, къэбар жъугъэм ифедеральнэ, иреспубликэ, имуниципальнэ амалхэм, АР-м ижурналистхэм я Союз япащэхэр, къэбарлъыгъэIэс амалхэм яIофышIэхэр, «Почта России» АР-мкIэ икъутамэрэ Iахьзэхэлъ обществэ зэIухыгъэу «Полиграф-Юг» зы­фиIорэмрэ ялIыкIохэр.

Адыгэ Республикэм и ЛIы­шъхьэ журналистхэмрэ къэбар жъугъэм иамалхэм яIофы­шIэ­хэмрэ урысые печатым и Ма­фэкIэ афэгушIуагъ. Хъупхъэу зэрэлажьэхэрэм, хъугъэ-шIа­гъэхэр псынкIэу ыкIи икъоу къызэрагъэлъагъорэм афэшI зэрафэразэр къыIуи, журналистхэм хэбзэ къулыкъухэм зэдэлэжьэныгъэ дэгъу зэрадыряIэр КъумпIыл Мурат къыхигъэщыгъ.

«Журналистхэм хъупхъэу, лъэныкъо пстэури къызэлъырагъэубытэу Iоф зэрашIэрэм непэ мэхьанэшхо иI. Тихэгъэгу джыдэдэм санкцие зэфэшъхьаф­хэмкIэ къытеIункIэнхэу пылъых, тиобществэ иIофхэр зэIызыгъа­хьэ зышIоигъохэр къыкъокIых. Къэбар мышъыпкъэхэр, лъапсэ зимыIэхэр бэу агъэIух. ЗэкIэми тызэгъусэу ащ тыпэуцужьын фае», — къыIуагъ КъумпIыл Мурат.

Республикэм ипащэ къызэрэхигъэщыгъэмкIэ, къэбарлъыгъэ­Iэс амалхэм цIыфхэм дунэе­еплъыкIэ тэрэз яIэнымкIэ, социальнэ зыпкъитыныгъэр гъэпытэгъэнымкIэ мэхьанэшхо яI. Урысыем и Президент къыгъэу­цугъэ пшъэрылъхэм къатегущыIэзэ, республикэм илъэныкъо шъхьаIэхэм къащыхъурэ хъугъэ­шIагъэхэр нахь игъэкIотыгъэу, осэ тэрэз афашIызэ къагъэлъэ­гъон зэрэфаем КъумпIыл Мурат анаIэ тыраригъэдзагъ.

«Яцыхьэ зытелъыжьэу неущырэ мафэм пэплъэнхэм пае республикэм исхэм непэ къэ­хъурэр зэкIэ ашIэн фае. КъэбарлъыгъэIэс амалхэм просветительскэ пшъэрылъэу агъэцакIэрэм, цIыф лъэпкъыбэмэ къахэкIыгъэхэр, дин зэфэмыдэхэр зылэжьыхэрэр зэкъоз­гъэуцорэ шIуагъэхэр агъэпы­тэнхэм мэхьанэшхо яI», — къы­Iуагъ КъумпIыл Мурат.

[caption id="attachment_144138" align="aligncenter" width="800"] А. Гусев[/caption]

Адыгеим и ЛIышъхьэ журналистхэм къяджагъ типсэупIэхэм адэсхэм ящыIакIэ чанэу хэла­жьэхэрэм, фэныкъоныгъэ зи­Iэхэм IэпыIэгъу афэхъухэрэм нахьыбэрэ ягугъу къашIынэу. Республикэм ипащэ зэрилъы­тэрэмкIэ, хэушъхьафыкIыгъэ дзэ операцием хэлэжьэрэ дзэ­кIолIхэм афэгъэхьыгъэ тхыгъэ­хэм нахь лъэшэу анаIэ атырагъэтын фае.

«Фронтым щыIэ тидзэкIолIхэм лIыхъужъныгъэшхо зэрэзэрахьэрэр, нэмыкIхэм апае апсэ агъэтIылъыным зэрэфэхьазыр­хэр къэтIон тлъэкIыщт. Владимир Путиным гъэрекIо зэдэгущыIэгъу занкIэу адыриIагъэм къыщиIогъагъ «хэушъхьафыкIыгъэ дзэ операцием хэлажьэхэрэр ящысэтехыпIэхэу кIэлэцIыкIухэр къызэрэтэджынхэ фаер». Тидзэ­кIолIхэм къяхъулIэгъагъэ­хэм, дзэкIолIхэу фэхыгъэхэм лIыхъужъныгъэу зэрахьагъэм, ахэм яунагъохэм арысхэм афэгъэхьыгъэ къэбархэр нахьыбэу цIыфхэм алъыдгъэIэсынхэ фае», — къыIуагъ КъумпIыл Мурат.

Адыгеим и ЛIышъхьэ Уры­сыем и Президент ихэдзынхэми къащыуцугъ. Хэгъэгум иполитическэ хъугъэ-шIэгъэшхоу ар зэрэщытыр, къэбарлъыгъэIэс амалхэм мыщкIэ пшъэрылъышхо зэрагъэцакIэрэр къыхи­гъэщыгъ.

Джащ фэдэу Адыгеим и ЛIышъхьэ журналистхэм яIоф­шIэнкIэ амалэу яIэхэр нахьышIу шIыгъэнымкIэ, ялэжьапкIэ къэ­IэтыгъэнымкIэ хэбзэ къулыкъу­хэм амалэу зэрахьэхэрэр, гъэ­зетхэу «Советскэ Адыгеимрэ» «Адыгэ макъэмрэ» IэпыIэгъоу арагъэгъотырэм, ахэр зычIэт унэр зэтырагъэпсы­хьа­жьынэу зызэрагъэхьазырырэр къафиIотагъ.

[caption id="attachment_144139" align="aligncenter" width="800"] А. Гусев[/caption]

Къэралыгъо телерадиокомпаниеу «Адыгеим» адыгабзэкIэ ыкIи урысыбзэкIэ зэхищэрэ къэтынхэр зы сыхьаткIэ нахьыбэу зэрэкIощтхэр, сэнаущыгъэ зыхэлъ журналистхэм IэпыIэгъу ягъэгъотыгъэнымкIэ амал зэфэшъхьафхэр зэрэзэрахьэрэр КъумпIыл Мурат къыхигъэщыгъ. ГущыIэм пае, журналистикэм ылъэныкъокIэ АР-м и ЛIышъхьэ ишIухьафтын мы аужырэ илъэси 4-м фэди 4-кIэ хэхъуагъ, джыдэдэм сомэ мин 200 ар мэхъу.

Зэнэкъокъум хэлэжьагъэхэм чанэу Iоф зэрашIагъэр хигъэу­нэфыкIи, Адыгеим и ЛIышъхьэ ащ щатекIуагъэхэм шIухьаф­тынхэр аритыжьыгъэх.

Къэралыгъо телерадиокомпаниеу «Адыгеим» ижурналистхэу Къуижъ Аминэт, Татьяна Беловам, ителеоператорхэу Алексей Свеженцевым, Виктор Наталухэ, ивидеоинженерэу Ольга Ефимовам «Героями не рождаются» зыфиIорэ телекъэтынхэм апае 2023-рэ илъэсым журналистикэм ылъэныкъокIэ АР-м и ЛIышъхьэ ишIухьафтын афагъэшъошагъ. Телепроектыр зыфэгъэхьыгъэр хэушъхьафыкIыгъэ дзэ операцием хэлажьэхэрэр, дзэкъулыкъушIэхэу фэхыгъэхэм яIахьыл­хэм, яныбджэгъухэм, якIэлэ­егъаджэхэм, классхэм къади­сыгъэхэм адыряIэгъэ зэIукIэ­гъухэр ары.

Очеркэу «Маятник надежды» зыфиIорэм пае гъэзетэу «Единствэм» иредактор шъхьаIэу ПхъэчыешIэ Суанди журналис­тикэм ылъэныкъокIэ АР-м и ЛIышъхьэ ишIухьафтын къыфагъэшъошагъ. Адыгеим и ЛIышъхьэ тапэкIэ редакциехэм гухэлъэу яIэхэмкIэ къэбарлъыгъэIэс амалхэм ялIыкIохэм адэгущыIагъ.

АР-м илитературнэ-художественнэ, икIэлэцIыкIу журналхэм яредакцие иредактор шъхьаIэу МэщбэшIэ Исхьакъ журналистхэм яматериалхэу хэушъхьафыкIыгъэ дзэ операцием хэла­жьэхэрэмрэ ахэм яунагъохэмрэ афэгъэхьыгъэхэр журналхэм къащыхаутыным зэрэфэхьазырыр къыIуагъ. АР-м ижурналистхэм я Союз итхьаматэу Бзэ­джэжъыкъо Абрек журналистхэм Iофэу ашIэрэм, IэнатIэхэр зэрэзэблахъухэрэм афэгъэхьыгъэу къыIотагъ. Гъэзетэу ­«Адыгэ макъэм» иредактор шъхьаIэу МэщлIэкъо Саидэ КъумпIыл Мурат «тхьауегъэпсэу» риIуагъ редакцием IэпыIэгъу къызэрэ­фэхъурэм фэшI ыкIи гъэзетым ия 100-рэ илъэс ехъулIэу къыдагъэкIыгъэ конвертыр шIухьафтынэу ритыгъ.

Республикэм и ЛIышъхьэ Адыгеим икъэбарлъы­гъэIэс амалхэм аIутхэм Iофышхо зэрашIагъэмкIэ зэрафэразэр къы­Iуагъ, псауныгъэ пытэ, щыIэкIэ-­псэукIэ дэгъу яIэ­нэу, гъэхъэгъа­кIэхэр ашIынэу, цIыфхэм ашIогъэшIэгъоныщт материал дэгъухэр тапэкIи къа­гъэхьазырынэу афэлъэIуагъ.

Адыгэ Республикэм и ЛIышъхьэ ипресс-къулыкъу